Dîyi dia Nzambi didi dituambuluisha bua kulongesha

1. Mpuilu wa tshijengu wa 2014 udi ne tshiena-bualu kayi? Nebandamunamu lukonko kayi?

¹ Yehowa udi ‘mulongeshi wetu munene’; yeye ke mulongeshi mutambe buimpe mu diulu ne pa buloba ponso. (Yesh. 30:20, 21, NW) Kadi Yehowa udi utulongesha mushindu kayi? Mmutupeshe mukanda udi mupite mikanda mikuabu yonso; mukanda eu ke Bible, Dîyi diende difundisha ku nyuma wende. Mmunyi mudi malongesha a Nzambi mua kutuambuluisha ku mubidi, mu lungenyi, mu malanda etu ne Nzambi ne bua kudiumvua bimpe? Mpuilu wetu wa tshijengu wa tshidimu tshia mudimu tshia 2014 neandamune lukonko elu. Tshiena-bualu tshiende tshidi ne: “Dîyi dia Nzambi didi dituambuluisha bua kulongesha,” tshiangatshila mu 2 Timote 3:16.

2. Nebandamune nkonko kayi bua kutuleja malu manene?

² Utabalele malu manene aa: Bua kutuleja malu manene a mu mpuilu eu, nebandamune nkonko idi ilonda eyi:

• Malongesha a Nzambi adi ne diambuluisha kayi mu nsombelu wetu? (Yesh. 48:17, 18)

• Tuetu tukeba bua kushintulula malu mu nsombelu wetu bua kuenzela Yehowa mudimu bu bampanda-njila, tudi mua kuikala ne dishindika kayi? (Mal. 3:10)

• Tudi ne bua kuenza tshinyi patudi tupetangana ne “malongesha menyi”? (Eb. 13:9)

• Tudi mua kuenza tshinyi bua kuidikija ‘mushindu uvua Yezu ulongesha’? (Mat. 7:28, 29)

• Bua tshinyi bantu badi balongesha mu tshisumbu badi ne bua kudilongesha bobu nkayabu? (Lomo 2:21)

• Dîyi dia Nzambi didi ne diambuluisha kayi? (2 Tim. 3:16)

• ‘Dizakeja’ dia bisamba didi diambuluisha bantu mushindu kayi? (Hag. 2:6, 7)

• Mbualu kayi budi Yehowa mushindike buetu tuetu? (Ef. 5:1)

• Tudi ne bua kudienzeja bua kushala mu malongesha a Yehowa bua tshinyi? (Luka 13:24)

3. Mbimpe kubuela mu mpuilu eu ne kuikalamu ne ntema ya bungi bua tshinyi?

³ Ku ntuadijilu kua mukanda wa 2 Timote nshapita 3, kumpala kua Paulo kufundaye mêyi adi enza tshiena-bualu tshia mpuilu eu, wakakula bua bikondo bikole bivua mua kuleja ne: tudi mu matuku a ku nshikidilu. Wakafunda ne: “Bantu babi ne badi badinga bakuabu nebatungunuke ne kunyanguka bibi menemene, bapambuishangana ne babapambuisha.” (2 Tim. 3:13) Tuetu basue bua kabatushimi, tudi ne bua kuteleja malongesha a Nzambi bimpe menemene ne kuatumikila. Nanku, tuikalayi badisuike bua kubuela mu mpuilu udibu batulongoluele pa dîba diakanyine eu, ne tumulonde ne ntema yonso.