Newenze pebe tshinyi?
Tshivulukilu tshikadi pa kuenzeka etshi tshidi tshituambuluisha bua kuleja dianyisha
1. Tshivulukilu netshitupeteshe mpunga kayi muimpe?
1 Tshivulukilu tshienzeka mu dia 14 ngondo 4 netshitupeshe mpunga muimpe wa kuleja dianyisha bua malu mimpe adi Yehowa mutuenzele. Muyuki udi mu Luka 17:11-18 udi uleja mudi Yehowa ne Yezu bamona dianyisha. Bia dibungama, mu bena nsudi dikumi bavua Yezu muondape, anu umue ke uvua mupingane bua kumuela tuasakidila. Kumpala eku, tshia kupikula natshi bantu netshijikije ntatu yonso ya bantu ne tshibapetesha muoyo wa tshiendelele. Kakuyi mpata, netuele Yehowa tuasakidila dituku dionso bua mabenesha aa. Mmunyi mutudi mua kuleja dianyisha mu mbingu idi kumpala eku?
2. Ntshinyi tshitudi mua kuenza bua kuikala ne dianyisha bua tshia-bupikudi?
2 Wikale ne dianyisha: Dianyisha didi difumina mu lungenyi. Bua kukolesha dianyisha dietu bua tshia kupikula natshi bantu, mbatuenzele programe wa dibala dia Bible dia pa buadi mu tshikondo tshia Tshivukilu udi miaba ya bungi bu mudi mu Kalandriye ketu ne mu kakanda ketu ka Tukonkononayi Mifundu dituku dionso. Kanuenaku mua kuyukila bua malu aa mu dîku dienu anyi? Kuenza nanku nekuvudije dianyisha dietu bua tshia-bupikudi. Dianyisha dia nunku nedituambuluishe bua kuikala ne bienzedi bimpe.—2 Kol. 5:14, 15; 1 Yone 4:11.
3. Mmalu kayi atudi mua kuenza bua kuleja dianyisha mu tshikondo tshia Tshivulukilu?
3 Uleje dianyisha: Dianyisha ditu dimuenekela mu bienzedi. (Kolos. 3:15) Muena nsudi uvua ne dianyisha au uvua mudienzeje bua kukeba Yezu bua kumuela tuasakidila. Kakuyi mpata uvua mua kuikala muambile bantu bakuabu muvua Yezu mumuondope mu tshishima. (Luka 6:45) Dianyisha dietu bua tshia-bupikudi kadienaku mua kutusaka bua kuenza mudimu wa diabanya mabeji a dibikila nawu bantu mu Tshivulukilu ne tshisumi anyi? Kuangata mudimu wa bumpanda-njila buambuluishi anyi kuvudija mudimu wetu wa buambi mu tshikondo tshia Tshivulukilu mmushindu mukuabu muimpe wa kuleja dianyisha. Dilolo, dituku dia Tshivulukilu, muoyo wa dianyisha neutusake bua kuakidila benyi ne kuikala badiakaje bua kuandamuna nkonko yabu.
4. Ntshinyi tshitudi mua kuenza bua tshikondo tshia Tshivulukilu tshikale tshia disanka?
4 Tshivulukilu etshi netshikale tshia ndekelu anyi? (1 Kol. 11:26) Katuena bamanye to. Kadi tudi bamanye bimpe ne: tshiotshi tshipite, netupangile mpunga mutambe buimpe wa kuleja dianyisha. Ke tshiwenza anyi? Tuenzaku bua mêyi mimpe a mukana muetu ne dielangana meji mu muoyo wetu bisankishe Yehowa, Mufidi wa tshia-bupikudi.—Mus. 19:14