Enza mudimu bimpe ne bibejibeji biebe bia kale

Bu mudi bibejibeji bia kale bitudi bateke mu nzubu anyi bitudi tukeba kuimansha kabiyi bituambuluisha, mbimpe tubipesha bantu. Tshibejibeji tshimue patupu tshidi mua kujula muntu dijinga dia kumanya bulelela ne tshidi mua kumusaka bua kutuadija kubikila dîna dia Yehowa. (Lomo 10:13, 14) Imue ngenyi idi ilonda eyi neyikuambuluishe bua kuenza mudimu bimpe ne bibejibeji biebe bia kale.

• Paudi uyisha mu teritware mudibu kabayi batamba kuyisha, udi mua kushiya tshibejibeji kumbelu kudi kakuyi bantu, muaba udi bantu bakuabu kabayi mua kutshimona.

• Paudi uyisha muaba udi bantu ba bungi bu mudi muaba udi mashinyi anyi kawulu kimanyina, webeje bantu ni mbasuaku kubala mukanda kampanda, pashishe ubaleje bibejibeji bia kale biudi nabi, ubalekele badisunguile.

• Paudi uya mu mpitadi anyi miaba mikuabu ya muomumue idi mu teritware wa tshisumbu tshienu, ushiye ndambu wa bibejibeji bia kale muaba wa dindilangana. Bitu bimpe kulomba dianyisha kudi muntu udi utangila muaba au bikalayiku. Wewe mumone ne: kukadi bibejibeji muaba au, ki mbimpe kushiyapu bikuabu bia bungi to.

• Paudi udilongolola bua kupinganyina bantu, wele meji bua majinga a muntu ne muntu uudi uya kutangila. Udi ne dîku anyi? Utu musue kuenza ngendu anyi? Utu musue kudima anyi? Utangile mpindieu mu bibejibeji biebe bia kale bua kumona ni mudi mua kuikala tshiena-bualu kampanda tshidi mua kumusankisha bua kubala, pashishe umulejatshi paudi umupinganyina.

• Wewe mumane kupinganyina muntu udi muanyishe bulelela misangu ne misangu kuyi umupeta, paudi upetangana nende, umupeshe nimero ya bibejibeji bietu bia kale bivuaye kayi mupete.