Bakenza disua dia Yehowa

Dibuikidilangana didi diunzulula njila wa lupandu

BANA ba balume dikumi ba Yakoba bavua bimane kumpala kua kavula-mbedi wa ditunga dia Ejipitu bavua basokoke bualu bubi bua dikema. Bidimu bivule kumpala, bavua bapane muanabu Yosefe mu bupika, kulongololabu bua kuambila tatuabu bua se: nyama wa luonji uvua mumushipe.​—Genese 37:18-35.

Mpindieu, kunyima kua bidimu bitue ku 20, nzala mikole yakenzeja bantu aba dikumi bua kuya kusumba biakudia mu Ejipitu. Kadi malu kaakenda bimpe nansha. Kavula-mbedi, uvua muikale kabidi mutangidi wa malu a biakudia, wakababanda wamba muvuabu batentekedi. Wakela umue wabu mu buloko ne kuambilaye bakuabu bavua bashale aba bua bapingane kuabu, balue ne muanabu wa mukala, Benyamina. Pakaluabu nende, kavula-mbedi eu wakakumbaja tshivuaye mulongolole: kuelesha Benyamina mu buloko.​—Genese 42:1–44:12.

Yuda, umue wa ku bana ba Yakoba, wakabenga. Wakamba ne: ‘Tuetu baye kuetu, ne Benyamina kayi netu, tatuetu neafue.’ Pashishe bualu buakenzeka buvua Yuda nansha bonso bavua benze nende luendu kabayi batekemene to. Panyima pa mumane kutuma dîyi bua bantu bonso bapatuke pambelu, pa kumbusha bana ba Yakoba, kavula-mbedi eu wakadila ne dîyi dikole. Pashishe wakakolesha muoyo, kuambaye ne: ‘Ndi Yosefe.’​—Genese 44:18–45:3.

Luse ne bupikudi

Yosefe wakebeja bana babu ne: “Tatu wanyi utshidi ne muoyo, anyi?” Nanshabu kumuandamuna. Bushuwa, bana babu ne Yosefe kabavua ne tshia kuamba to. Bavua ne bua kusanka anyi kumvua buôwa? Tuamba eku tuela kuaka, bidimu 20 kumpala, bavua bapane muntu eu mu bupika. Yosefe uvua ne bukokeshi bua kubela mu buloko, kubapingaja kuabu kabayi ne biakudia anyi​—bu muvuabu mua kuela meji—kubashipa! Mu bulelela, bana babu ne Yosefe ‘kabakamanya mua kumuitaba; bakadi batshina ku mêsu kuende.’​—Genese 45:3.

Ne lukasa Yosefe wakapolesha mioyo ya bantu aba. Wakamba ne: ‘Ndi nnutendekena ne: Semenayi pabuipi nanyi.’ Buobu e kusemena. Pashishe wakamba ne: ‘Ndi Yosefe, muakunyenu unuakapana mu Ejipitu. Mitshima yenu kayinyingaladi, kanukuatshiki tshiji bualu bua nuenu nuakampana kuneku; bualu bua Nzambi wakantuma kumpala kuenu bua kusungila mioyo ya bantu.’​—Genese 45:4, 5.

Yosefe kakaleja luse bua tshianana. Ukavua mumone tshijadiki tshia dinyingalala diabu. Tshilejilu, pavuaye mubande bana babu wamba muvuabu batentekedi, wakabumvua bambilangana ne: ‘Tuetu tuakadipisha bulelela mu bualu bubi butuakenzela muanetu; bua bualu ebu dikenga diakutukuata.’ (Genese 42:21) Kabidi, Yuda uvua mulombe bua kushala mupika pa muaba wa Benyamina bua kumonabu mua kupingana ne nsongalume eu kudi tatuende.​—Genese 44:33, 34.

Nanku Yosefe uvua ne kabingila bua kuleja luse. Bushuwa, wakajingulula ne: dienza nenku divua mua kufikisha dîku diende dijima ku lupandu. Pa nanku, Yosefe wakambila bana babu bua kupingana kudi tatuabu Yakoba ne kumuambila ne: ‘Muanebe Yosefe wakamba ne: Nzambi wakamvuija mukalenge wa buloba bua Ejipitu buonso; ulue kundi, kujanguluki. Wewe neushikame mu buloba bua Goshene, newikale pabuipi nanyi, wewe ne bana bebe ne bana ba bana bebe, ne mikoko yebe ne ngombe yebe ne bintu bionso biudi nabi; nenkudishileku.’​—Genese 45:9-11.

Yosefe Mutambe Bunene

Yezu Kristo udi mua kubikidibua ne: Yosefe Mutambe Bunene, bualu kudi difuanangana dikole pankatshi pa bantu aba babidi. Anu bu Yosefe, bakakengesha Yezu kudi bana babu, ndelanganyi ya Abalahama. (Fuanyikija ne Bienzedi 2:14, 29, 37.) Kabidi, nsombelu ya bantu aba babidi yakakudimuka mu mushindu wa dikema. Ku ndekelu, bakashintulula nsombelu wa Yosefe wa mupika kumuvuijabu kavula-mbedi, muntu muibidi panyima pa Palô. Bia muomumue, Yehowa wakajula Yezu ku bafue ne kumupesha muanzu mubandile “ku tshianza tshia balume tshia Nzambi.”​—Bienzedi 2:33; Filipoi 2:9-11.

Bu muvuaye kavula-mbedi, Yosefe uvua ufila biakudia kudi bonso bavua balua kubisumba mu Ejipitu. Lelu’eu, Yosefe Mutambe Bunene udi ne kasumbu ka mupika wa lulamatu ne wa budimu pa buloba, ku butuangaji bua mupika eu udi ufila biakudia bia mu nyuma “mu tshikondo tshiakanyine.” (Matayo 24:45-47, NW; Luka 12:42-44) Bushuwa, aba badi balua kudi Yezu ‘kabena bikala ne nzala kabidi, kabena bikala ne nyota kabidi, bualu bua Muana wa Mukoko udi munkatshi mua nkuasa wa butumbi neikale mulami wabu, ne neabalombole ku mishimi ya mâyi a muoyo.’​—Buakabuluibua 7:16, 17.

Dilongesha buetu tuetu

Yosefe udi ufila tshilejilu tshia luse tshia pa buatshi. Buakane bushidisha buvua ne bua kuikala bulombe ne: anyoke bantu bavua bamupane mu bupika. Kadi muoyo uvua mua kuikala mumusake bua kulengulula patupu bubi buabu. Yosefe kakenza nansha bumue bua ku malu aa to. Pamutu pa nanku, wakateta dishintuluka dia bana babu. Pashishe, pakamonaye ne: kanyinganyinga kabu kavua ka bushuwa, wakababuikidila.

Tudi mua kuidikija Yosefe. Padi muntu udi mutuenzele bibi uleja dishintuluka dia bushuwa dia mutshima, tudi ne bua kumubuikidila. Bushuwa, katuena ne bua kulekela patupu bidi bituvuila ku muoyo bitufofomija bua kubenga kumona bubi bunene nansha. Ku lukuabu luseke, katuena ne bua kulekela njiya itufofomija bua kubenga kumona bienzedi bia dinyingalala dia bushuwa nansha. Nenku ‘tulejangane lutulu, tulekelelangane mibi yetu.’ (Kolosai 3:13) Mu dienza nenku, netuidikije Yehowa Nzambi wetu, udi “musue kubuikidila.”​—Musambu 86:5; Mika 7:18, 19.