Nuvuluke badi mu nzubu ya dilamina bakulakaje
1. Bidi bikengela kuyisha bantu badi mu nzubu ya dilamina bakulakaje lumu luimpe bua tshinyi?
1 Mubidi wa bantu ba bungi udi wenda uteketa padibu benda bakulakaja. (Muam. 12:1-7) Bamue bakulakaje batu mu nzubu itubu babalamina, ke bualu kayi kakutu mushindu wa kubapeta patudi tuyisha ku nzubu ne ku nzubu to. Bitu bienzeka nanku nansha miaba idi baledi bakadi bakulakaje bikale ne tshibidilu tshia kuya kusombelamu ne bana babu anyi ne balela babu. Nansha mudi bakulakaje aba batekete ku mubidi ne mu lungenyi, bobu ne bantu bakuabu badi mu nzubu idibu babalamina, badianu ne mushindu wa kulonga, kumanya ne kufika ku dinanga Yehowa. Ntshinyi tshitudi mua kuenza bua kubayisha lumu luimpe lua “ditekemena dia disanka”?—Tito 2:13.
2. Mmunyi mutudi mua kumanya miaba idi Nzubu ya dilamina bantu ba kutangila?
2 Mua kutuadija: Misangu ya bungi bidi bikengela kukeba liste wa nzubu ya dilamina bakulakaje ku diambuluisha dia kakanda ka nimero ya telefone ka muaba unudi. Ukebe miaba bu mudi: nzubu ya “kulamina bakulakaje,” “nzubu ya kulamina bantu bakese badi dijinga ne diambuluisha ne bibambalu bidi bienza midimu ya kuambuluisha bantu. Mutangidi wa mudimu udi ne bua kulongolola bua bamanyishi bakumbane bikala baya kutangila bantu miaba eyi. Kulongolola malu bimpe ne kueyemena Yehowa, kudi kutupetesha mushindu wa kutuadija kulonga Bible ne kasumbu ka bantu.—Nsu 21:5; 1 Yone 5:14, 15.
3, 4. a) Nnganyi utudi ne bua kuyukila nende bua kutuadija kulonga ne kasumbu ka bantu? b) Mmunyi mutudi mua kuleja muntu tshitudi balongolole bua kulonga ne bantu?
3 Tudi mua kutuadija kulonga Bible ne bantu bilondeshile muaba udibu babalamine. Bua nzubu minene ya dilamina bakulakaje idi ne bantu ba bungi ne bena mudimu ba bungi, mbimpe kuyukila ne muntu udi wakidilangana bua kumulomba bua kuyukila ne muntu udi ulombola midimu muaba au. Kadi bua nzubu mikese idi ne bantu bakese ne bantu babidi anyi basatu badi babalama, bidi mua kuikala bimpe kulongolola dîba dia kulua kuyukila ne muena nzubu nkayende.
4 Mu nsombelu yonso eyi, uleje muntu ne: udi ufila dîba diebe ku budisuile bua kukankamija bantu badi basue kubala ne kuyukila malu a mu Bible. Webeje bua kumanya ni kudi badi basue kulonga malu a mu Bible mu kasumbu pamue ne bakuabu mu minite 30 lumingu luonso. Udi mua kuenza mudimu ne mikanda mishilashilangane. Kadi bamanyishi ba bungi mbamone ne: bantu batu batamba kuangata mukanda wa Miyuki ya mu Mukanda wa Nzambi ne wa Muntu Munene wa katshia ne katshia. Udi mua kuleja muntu udi ulombola midimu muaba au mikanda eyi. Nudi mua kuenza nende programe bua dituku, dîba ne muaba wa kulongela bidiye mua kuteka mu kalandriye ka midimu ya mu nzubu wa dilamina bakulakaje. Kutshinyi bua kumumanyisha ne: udi Ntemu wa Yehowa to. Wambuluishe kabidi mulombodi wa midimu au bua amanye ne: kua kuikala ulua muaba au bua kuenzela bantu mudimu wa Nzambi to, kadi mbua kubalongesha Bible.
5. Mmalu kayi ikala mua kuenza bua dilonga dikale disankisha bantu ne dibambuluisha?
5 Kulombola dilonga: Udi ne bua kulombola dilonga bilondeshile nsombelu ne muaba wa dilamina bantu; nunku wikale wenza malu bilondeshile nsombelu udiku, wikale kabidi ne busunguluji. Mulombodi udi ne bua kulua ne mikanda ya bungi ya kulonga bua kupesha bantu kadi kuyangata padi dilonga dijika. Bidi mua kuikala bimpe bua kuluaye ne mikanda ya bungi bua kupesha bamue. Badi mua kubala bikoso, kuela nkonko ne kufila mandamuna anu bu mututu tuenza. Badi mua kulomba bantu badi basue ne badi bakumbane bua kubalabu bikoso anyi mvese. Panudi nuenda nulonga, wikale wakula mu mushindu udi usankisha bantu, ubanyisha ne udienza mulunda wabu. Muntu udi utangila malu muaba au yeye mukuanyishile, udi mua kuikala imue misangu ubaleja imue ya ku filme yetu idi isaka bantu bua kuitaba Bible anyi idi yakula bua malongesha a miyuki kampanda ya mu Bible. Bidi mua kuikala bimpe bua kutuadija ne disambila bua dilonga dionso. Bamue bamanyishi batu mene bimba too ne misambu yetu.
6. Mmunyi muudi mua kupita ne tshipumbishi kampanda?
6 Ntshinyi tshiudi mua kuenza bikala muntu ubenga bualu kampanda buudi mubale anyi buudi ulongesha panudi nuenda nulonga? Wikale ne busunguluji paudi wandamuna. (Kolos. 4:6) Udi mua kumuambila mêyi a mu Bible adi mua kujikija lutatu ludiye nalu. Wewe mumone ne: ki mbimpe kuenza nanku, udi mua kumuleja ne: udi mumvue bimpe tshilumbu tshiende atshi, pashishe umulombe bua nulue kutshiyukila babidi pa nkayenu panyima pa dilonga.
7. Muntu yeye muele lukonko ludi lumutangila anyi muleje dijinga dikole, tshiudi mua kuenza ntshinyi?
7 Misangu mikuabu, muntu udi mua kuela lukonko anyi kuleja dijinga dia kumanya bia bungi. Muanetu wa bakaji kampanda utu wamba ne: “Udi muele lukonko luimpe lutambe. Kadi bu mudilu lukutangila anu wewe nkayebe, tuindile too ne patuajikija dilonga dietu. Pashishe, netuyukile nebe babidi pa nkayetu.” Misangu ya bungi mbimpe kudilongolola bua kulonga Bible ne bantu badi baleja dijinga dia kumanya bulelela tshikondo tshikuabu ne muaba mukuabu.
8. Mmunyi mutudi mua kubala malonga atudi tuenza ne bantu mu tusumbu ne a bantu pa nkayabu?
8 Bitu bimpe bua Ntemu umue umue au kuikalaye ne tshibidilu tshia kulombola dilonga dia Bible mu kasumbu ka bantu misangu yonso mu nzubu ya dilamina bantu. Bamanyishi bonso badi balombola dilonga edi, badi mua kuangata mêba. Padi dilonga dishindama, mumanyishi udi mua kubala dikumbula dipiadipia dimue misangu yonso idiye ulonga Bible ne kasumbu ka bantu aku ne dilonga dia Bible dimue ngondo yonso. Balongi ba Bible ba mu nzubu au badi ne mushindu wa kumvua ne kulonga baudi mutuadije kulonga nabu muntu ne muntu pa nkayende udi mua kubabala anu bu pa tshibidilu.
9, 10. Bamanyishi badi balongesha badi ne bua kuikala ne ngikadilu kayi? Umvuija.
9 Enza bua dilonga diye kumpala: Mbimpe tuteke dituku ne dîba bua kasumbu kuonso. Bantu badi mu nzubu eyi ne bena mudimu badimu mbatekemene bua kuikalabu balonga pa tshibidilu, batuadija ne bajikija pa dîba. (Mat. 5:37) Nunku, mbimpe kunemeka programe, kuikala ne tshisumi ne bulongame. Bilondeshile malu mamonamona, bamanyishi babidi bakumbane bobu balonga Bible ne bantu pamue mu kasumbu, mbimpe bitambe. (Muam. 4:9, 10) Bua nzubu minene ya dilamina bantu, mbimpe kuikale bamanyishi ba bungi.
10 Bidi bikengela kabidi kuditatshisha bua bantu ne kudienza mulunda wabu. (Filip. 2:4) Mu dikumbula dia kumpala, uyukile ne muntu yonso udi mubuele mu dilonga. Ufunde mêna abu ne uakuate mu mutu kumpala kua dilonga didi dilua. Kadi, bamue bantu bakulumpe batu bumvua bibi padi muntu udibu kabayi bamanye ubabikila mu mêna abu a ku tshilelelu. Kuikala ne lutulu ne kuditeka pa muaba wabu nekuambuluishe yonso wa kudibu bua adiumvue ne: badi bamuanyisha ne mbamunange.
11. Mmunyi mudi aba badi balonga ne bantu mu tusumbu mua kuleja ne: badi banemeka bena mudimu ba muaba au ne bena mu mêku a badibu balamamu?
11 Mbimpe kuikala kabidi ne kanemu ne bulenga kudi bantu badi benza mudimu mu nzubu ne bena mu mêku a bantu badibu balamamu. Nuenu bamane kumvuangana dîba dia kulonga, ki mbimpe kudishintulula dîba anyi kushintulula bungi bua mêba a nuenu kulonga kuyi muanji kuyukila ne mulombodi wa muaba au to. Wikale misangu yonso webeja mulombodi wa muaba au bua aleje tshidiye umona bua mudi dilonga dienda. Padi bena mu dîku balua kutangila banudi nulonga nabu, ukebe mushindu wa kuyukila nabu. Ubumvuije tshipatshila tshia mudimu wa dilongesha bantu Bible. Ubaleje ne: udi uditatshisha bikole bua bena mu mêku abu. Ubalombe pabu bua basombe bua kuteleja binudi nulonga.
12, 13. Leja masanka a kuyisha mu nzubu idibu balamina bakulakaje.
12 Bipeta: Batangidi bena ngendu ne bena mu bisumbu mbaleje malu mimpe adi mushindu wa kuyisha eu mupatule. Muaba mukuabu, bantu 20 bavua babuele mu dilonga dia kumpala. Kufikishabi ku dilonga ne bantu basambombo muntu pa nkayende. Umue wa kudibu kufikaye ku ditambula. Mamu mukuabu wa bidimu 85 uvua ulonga Bible mu nzubu mukuabu wa dilamina bantu. Biakamusaka bua kuikala kubuela mu bisangilu bia tshisumbu tshivua pabuipi apu, pashishe kulejaye dijinga dia kutambula. Pavua mulombodi wa nzubu kampanda wa dilamina bantu muangate dipangadika dia kuvudija midimu ya mu nzubu au, usua ushipa kasumbu ka bantu bavua balonga Bible ne Bantemu ba Yehowa, bakulakaje bavuamu bakadidila mulombodi wa nzubu au. Ndekelu wa bionso, bakatuadija kabidi kulonga ne pakapita matuku bantu kufikabu 25 anyi 30.
13 Ba bungi badi mu nzubu ya dilamina bantu, batu bakema bikole bua mushindu utudi tuleja bakulakaje badimu dinanga. Tshilejilu, bena mudimu ba mu nzubu eyi batu ne tshibidilu tshia kulua kusomba ne bandamuna patudi tulonga. Bionso bitudi tuenza bua kutabalela bakulakaje badi mu nzubu eyi, mmushindu wa kuyisha bukua bantu. (1 Pet. 2:12) Panyima pa mumanyishi mumane kuambila mulombodi kansanga tshipatshila tshia dilonga, Mulombodi au wakamba ne: “Kuonso aku uvua kuepi? Netutuadije dîba kayi?” Mukuabu pende wakafunda ne: “Mvua njinga ne muoyo wanyi onso ne: dilonga dia nunku dienzeke kabidi mu nzubu mikuabu ya dilamina bantu. Bantemu ba Yehowa badi benza mudimu eu tshianana kabayi bafushisha makuta anu bu mudimu wabu wa kuyisha bantu bonso.” Bena nzubu wa dilamina bakulakaje wa mu Hawaii bakapesha Bantemu ba Yehowa mukanda bua kubela kalumbadi bua mudimu wabu muimpe, mukanda eu uvua wamba muvuabu “tshiuma tshia mushinga mukole” kudi bantu bavua mu nzubu au.
14. Bua tshinyi tudi ne bua kuambuluisha bakulakaje badi mu nzubu ya dilamina bantu?
14 Yehowa udi ulomba bakulakaje bua bamutumbishe. (Mus. 148:12, 13) Dibikila edi didi ditangila kabidi bakulakaje badi mu nzubu ya dilamina bantu. Mu teritware wenu mudiku nzubu ya dilamina bakulakaje banudi mua kuambila lumu luimpe anyi? Ku diambuluisha dia bakulu ne dia bantu badi batangila nzubu eyi, tudi mua kuyisha bakulakaje badimu. Patudi tuvuluka bantu bakadi bakulakaje, tudi tuidikija Yehowa—Mus. 71:9, 18.