Mandamuna ku nkonko yenu

▪ Mbimpe bua Ntemu wa Yehowa kudiondapishila mu lupitadi kampanda anyi kusombela mu nzubu wa bakulakaje udibu batangila kudi tshitendelelu kansanga anyi?

Bitendelelu bia bungi bitu ne mpitadi itubu bondapila bantu masama a mishindu mishilangane. Pa tshibidilu, mpitadi eyi kayitu miasa bua kutantshisha midimu ya bitendelelu bia mu Babulona munene to. (Buak. 18:2, 4) Itu pamuapa miasa kudi tshitendelelu kampanda anu bua kupeta makuta. Imue mpitadi mmishale ya bena bitendelelu kampanda anyi kasanga anu ku dîna patupu, mikuabu payi mmishale ne bena mu tshitendelelu tshivua tshiyilombola ndambu benzamu mudimu.

Bikala Ntemu wa Yehowa kampanda usama, udi ne bua kudiangatshila dipangadika dia muaba udiye musue bamondapile nansha bikala lupitadi alu lulombola kudi tshitendelelu kampanda. Muoyo wa umue wetu udi mua kuitaba bua yeye kuya mu lupitadi lua nunku, kadi wa mukuabu udi mua kubenga. (1 Tim. 1:5) Kadi kudi malu kampanda adi akengela kutangila bua kuangata dipangadika edi, ne bidi bikengela kuatangila bimpe.

Tshilejilu, kudi mua kuikala anu lupitadi anyi nzubu wa bakulakaje umuepele wa tshitendelelu kampanda muaba unudi basombele. Anyi bikalaku lupitadi lukuabu muaba unudi, ludibu bondopa bantu bimpe ludi mua kuikala pamuapa anu lua tshitendelelu atshi. Pamuapa anu lupitadi lua tshitendelelu atshi ke lumuepele ludi ne biamu bikumbane bia kuondapa nabi disama diudi wewe nadi, anyi ludi mua kuikala lumuepele ludi doktere udi ukuondopa mua kukuondopela bimpe. Misangu mikuabu, mpitadi idi milombola kudi bitendelelu idi mua kunemeka ditabuja diebe dia buena Kristo dia kubenga mashi padi mikuabu ya bantu anyi ya mbulamatadi mua kubenga kudinemeka. Nunku udi mua kuelela malu aa meji paudi ukeba kusungula lupitadi lua kukuondapilabu.

Wewe musungule bua kukuondopabu mu lupitadi lua tshitendelelu kampanda anyi kusombela mu nzubu yatshi ya bakulakaje, udi pamuapa mua kubimona anu bu muutu ufuta muntu udi mukuenzele mudimu kampanda. Udi mua kubimona anu bu ne: tshitendelelu atshi tshitu ne mudimu wa dipana bintu kampanda, nunku paudi ubisumba, kabiena biumvuija ne: makuta ebe au ndipa ditshipesha bua kutungunuja ntendelelu wa dishima to. Tshiudi wewe musumbe ntshintu atshi patupu anyi mufutangane bua mudimu mukuenzela.

Nansha nanku, mu bualu bua mushindu eu muena Kristo udi ne tshia kuikala mudianjile kudimuka bua ne: kabuelakanyi mu bualu nansha bumue bua ntendelelu wa dishima. Kabidi, kuena mua kuikala ubikila bantu badi benza mudimu mu lupitadi alu anyi badi baluamu mu mianzu yabu ya mu tshitendelelu, bu mudi: “Mpasata” anyi “Mansela” to. (Mat. 23:9) Wenze bua ne: dipetangana dienu nabu dimanyine anu pa luondapu anyi pa midimu idibu bakuenzela, kadifiki ku bualu bukuabu to.

Paudi ubuela mu lupitadi, udi mua kudimanyisha ne: udi Ntemu wa Yehowa, ne se: bakulu ba mu tshisumbu tshienu nebikale balua kukutangila. Abi nebiambuluishe bua bobu kulua kukukankamika mu nyuma paudi mu lupitadi.​—1 Tes. 5:14.

Bantemu badi balela ba muanetu mukulakaje udi musombele mu nzubu ya bakulakaje, bakulu, ne bena mu tshisumbu bonso ke badi ne bujitu bua kukuatshisha muanetu eu mu ditabuja, nangananga padi nzubu idiye eyi milombola kudi tshitendelelu kampanda. Dienza bualu ebu ne mitalu nedikoleshe bana betu bakulakaje aba bikole ne nebibepule bua kubuelakana mu malu a ntendelelu anyi mafesto ende nansha malu makuabu kayi onso bua dipanga adibu benzela mu nzubu ayi.

Tuetu bikale ne malu aa mu lungenyi, muntu yonso nealonge tshidi nsombelu wende ne wa lupitadi ludiye mua kuya anyi nzubu wa bakulakaje udiye mua kusombela, pashishe kuangata dipangadika.​—Gal. 6:5.