Tuakajayi mishindu yetu ya kuyisha: Tuase tshishimikidi bua kupinganyina muntu

Mushinga: Patutu tupeta muntu udi uleja dijinga, tutu basue kumupinganyina dîba didiye kumbelu bua tuetu kumiamina mâyi ku ntete ya bulelela ituvua bakune. (1 Kol. 3:6) Bualu ebu butu butulomba kuasa tshishimikidi kumpala kua tuetu kushiyangana ne muntu, ne kumanya dîba ditudi mua kumupinganyina. Bitu bimpe kushila kabidi muntu lukonko lutualua kuandamuna musangu udi ulonda. Kuenza nunku kudi kulongolola lungenyi lua muntu bua patualua musangu mukuabu, bikalabu bandamuna lukonko alu mu mukanda utudi bamushile, bidi pamuapa mua kumusankisha bikole bua kuwubala. Kuasa tshishimikidi bua malu atualua kuyukila musangu udi ulonda kudi kabidi kutuambuluisha bimpe bua kupinganyina bantu, bualu tukavua bamane kusungula tshiena-bualu ne muntu ukadi mumanye tshituayukila nende. Patudi tupinganyina muntu, tumuambile ne: tudi balue kuandamuna lukonko lutuvua bashiye musangu mushale, pashishe tudi mua kutungunuka.

Mushindu wa kuenza malu:

Paudi ulongolola mushindu wa kubanga muyuki bua kuyisha ku nzubu ne ku nzubu, ulongolole kabidi lukonko ludi mua kukolesha dijinga dia muntu lunualua kuandamuna. Ludi mua kuikala luangatshila mu tshiena-bualu tshidi mu mukanda uudi mumupeshe dituku adi, anyi ludi mua kuikala ludibu bandamune mu umue wa ku mikanda itutu tulongesha nayi bantu, uudi mua kutuadija kumulongesha nawu pawamupinganyina.
Paudi ujikija kuyukila ne muntu udi muleje dijinga, umuleje dijinga diudi nadi dia kulua kuyukila nende musangu udi ulonda, pashishe umuambile lukonko luuvua mulongolole ludi mua kukolesha dijinga diende. Bantu ba mu imue teritware batu ne midimu ya bungi, ke bualu kayi kabatu basue tumvuangane nabu bua kubapinganyina to. Mu nsombelu ya buena eyi, udi mua kuamba ne: “Meme ndua kukutangila dîba dia buena edi, nengikale nkusangana anyi? [Lekela muntu andamune.] Lumingu lualonda, nempitshile muaba eu bua kukuandamuna lukonko elu . . . Pangalukila wewe muikale ne mudimu wa bungi, udi anu mua kungambila.”
Wewe muambile muntu bua kumupinganyina dîba kampanda, ukumbaje tshiudi mumulaye. (Mat. 5:37) Paudi upinganyina muntu ne nujikija kuyukila nende, wase tshishimikidi bua dikumbula dialonda.

Tshitudi mua kuenza mu ngondo eu:

Paudi ulongolola mushindu wa kubanga muyuki, ulongolole kabidi lukonko ludi mua kujula muntu dijinga lunuandamuna musangu walonda. Uluambile bamanyishi banudi nuyisha nabu.