Bukalenge bua Nzambi mbutuadije kukokesha tshidimu kayi?​—Tshitupa 2

DIAMBULULA MU TSHIKOSO TSHILOTA TSHIA NEBUKADENESÂ

Cameron: Ndi ne disanka dia kumonangana kabidi nebe, Jon. Ntu nganyisha bikole programe wetu wa dilonga dia Bible wa lumingu luonso.a Bishi katshia washale?

Jon: Ndi bimpe.

Cameron: Ndi ne disanka bua muudi bimpe. Musangu mushale pamvua muaba eu, tuvua bayukile bua kumanya bua tshinyi Bantemu ba Yehowa badi bamba ne: Bukalenge bua Nzambi mbutuadije kukokesha mu 1914.b Anu bu mutuvua bayukile, tuvua bapete tshijadiki tshinene mu mulayi udi mu Danyele nshapita 4 mu Bible. Utshidi muvuluke tshivuabu bakulamu anyi?

Jon: Bavua bakula bua tshilota tshia mutshi munene tshivua mukalenge Nebukadenesâ mulote.

Cameron: Anu muudi muambe amu. Mu tshilota etshi, Nebukadenesâ uvua mumone mutshi munene uvua muye too ne mu diulu. Yeye kumvua mutumibue wa Nzambi utuma dîyi bua bakose mutshi, kadi bashiye tshikuku ne miji yatshi mu buloba. Panyima pa ‘bikondo muanda mutekete’ mutshi au uvua ne bua kukola kabidi.c Tuvua kabidi bayukile bua muvua mulayi eu mua kukumbana misangu ibidi. Utshidi muvuluke dikumbana diawu dia kumpala anyi?

Jon: Mbualu buvua bukumbanyine Nebukadenesâ yeye nkayende, ki mmuomu anyi? Uvua mujimije lungenyi munkatshi mua bidimu muanda mutekete.

Cameron: Mmuomu. Nebukadenesâ uvua mujimije lungenyi bua tshikondo kampanda, nunku bavua bimanyike bukokeshi buende. Kadi mu dikumbana diawu dinene, bukokeshi bua Nzambi buvua buimane mu mushindu kampanda bua lupolo lua bikondo muanda mutekete. Anu bu mutuvua bamone, bikondo muanda mutekete bivua bituadije pavuabu babutule Yelushalema mu 607 K.B.B. Mu tshikondo atshi, kakuvua mukalenge nansha umue pa buloba uvua uleja mpala wa Yehowa Nzambi mu dikokesha bantu bende. Kadi ku ndekelu kua bikondo muanda mutekete, Nzambi uvua ne bua kuteka Mukokeshi mupiamupia wa mu diulu pa bantu bende. Mu mêyi makuabu, ndekelu wa bikondo muanda mutekete uvua ne bua kuleja ntuadijilu wa bukokeshi bua Bukalenge bua Nzambi mu diulu. Tukavua bayukile dîba divua bikondo muanda mutekete bituadije. Nunku tuetu bamanye bule buvua bikondo ebi mua kunenga, netumanye dîba divua Bukalenge bua Nzambi butuadije kukokesha. Udi munteleje anyi?

Jon: Eyowa, diambulula edi ndingambuluishe bua kuvuluka malu aa.

Cameron: Bimpe. Mpindieu tukonkonone bule bua bikondo ebi muanda mutekete. Nkadi mujikije dibala dia tshiena-bualu etshi bua kuvuluka malu manene adimu. Nengenze muanyi muonso bua kukumvuija malu aa anu mudibi bikengela.

Jon: Bimpe.

BIKONDO MUANDA MUTEKETE BIJIKA: MATUKU A KU NSHIKIDILU ATUADIJA

Cameron: Mu dikumbana dia kumpala dia mulayi udi utangila Nebukadenesâ, bikondo muanda mutekete bivua bidimu muanda mutekete bietu biena dîna ebi. Kadi mu dikumbana diawu dinene didi ditangila Bukalenge bua Nzambi, bikondo muanda mutekete bidi ne bua kunenga bikole kupita bidimu muanda mutekete biena dîna.

Jon: Bua tshinyi udi wamba nanku?

Cameron: Vuluka ne: bikondo muanda mutekete bivua bituadije pavuabu babutule Yelushalema mu 607 K.B.B. Tuetu batuadije kubala kumbukila ku tshidimu etshi, bidimu muanda mutekete biena dîna ebi bidi mua kutufikisha mu 600 K.B.B. Kadi kakuvua bualu nansha bumue buvua buenzeke mu tshikondo atshi buvua butangila tshidimu tshia bukokeshi bua Nzambi. Bualu bukuabu, anu bu mutuvua bamone musangu mukuabu, bidimu bia bungi kumpala patshivua Yezu pa buloba, wakaleja ne: bikondo muanda mutekete kabivua bianji kufika ku ndekelu to.

Jon: Eyowa, ngavuluki mpindieu.

Cameron: Nunku, pamutu pa bikondo ebi muanda mutekete kuikalabi biena dîna, bidi biangata lupolo lule lua tshikondo kampanda.

Jon: Bule kayi?

Cameron: Mukanda wa Buakabuluibua wa mu Bible udi upetangana bikole ne mukanda wa Danyele, udi utuambuluisha bua kumanya lupolo lujalame lua bikondo muanda mutekete. Udi uleja lupolo lua bikondo bisatu ne tshitupa bu lupolo lua matuku 1 260.d Nunku, bikondo muanda mutekete mmumue ne: bikondo bisatu ne tshitupa misangu ibidi bidi bienza matuku 2 520. Udi undonda bimpe anyi?

Jon: Eyowa, ndi nkulonda. Kadi tshiena mumone mudi bualu ebu buleja ne: Bukalenge bua Nzambi mbutuadije kukokesha mu 1914 to.

Cameron: Bimpe, tuanji kumona mudi malu aa umvuangana. Imue misangu mu milayi ya mu Bible, dituku dimue didi dileja tshidimu tshijima.e Tuetu balonde dîyi dia ne: dituku dimue didi bu tshidimu tshijima, bikondo muanda mutekete nebikale bidimu 2 520. Tuetu batuadije kubala bidimu 2 520 ebi kubangila mu tshidimu tshia 607 K.B.B., bidi bitufikisha mu tshidimu tshia 1914.f Ke mutudi tufika mu tshidimu tshia 1914 tshivua bikondo muanda mutekete bifike ku ndekelu, ne Yezu kutuadija kukokesha bu Mukalenge wa Bukalenge bua Nzambi. Mu mushindu wa pa buawu, katshia mu tshidimu tshia 1914, malu manene avua menzeke pa buloba, malu akavua Bible mumanyishe ne: avua ne bua kuenzeka mu matuku a ku nshikidilu.

Jon: Mmalu a mushindu kayi?

Cameron: Tukonkonone tshivua Yezu muambe tshidi mu Matayi 24:7. Pa bidi bitangila tshikondo tshivuaye ne bua kutuadija kukokesha mu diulu, Yezu wakamba ne: “Tshisamba netshiluishe tshisamba tshikuabu, bukalenge nebuluishe bukalenge bukuabu, nekuikale biyole bia nzala, bikumina nebienzeke bilondangane ku muaba ne ku muaba.” Mona ne: Yezu uvua mudianjile kumanyisha bua biyole bia nzala ne bua bikumina mu tshikondo atshi. Buloba buetu ebu bukadi butuilangane ne malu a bungi a mushindu eu mu bikondo bia kale, ki mmuomu anyi?

Jon: Mmuomu.

Cameron: Mu mvese eu, Yezu uvua kabidi mumanyishe bua mvita ivua ne bua kuenzeka mu tshikondo tshidiye Mukalenge wa Bukalenge bua Nzambi. Mukanda wa Buakabuluibua kauvua muakule bua mvita ivua mua kuenzeka muaba umue kadi bua mvita ivua ne bua kuenzeka pa buloba bujima mu matuku a ku nshikidilu.g Udiku mumanye dîba divua mvita ya kumpala ya buloba bujima mienzeke anyi?

Jon: Ivua mienzeke mu tshidimu tshia 1914, tshidimu tshiudi muleje ne: ke tshidi Yezu mutuadije kukokesha! Tshivua mumanye ne: bidi bipetangana mushindu eu to.

Cameron: Patudi tusangisha ngenyi yonso eyi mmumue ne: mulayi udi wakula bua bikondo muanda mutekete pamue ne milayi mikuabu ya mu Bible idi yakula bua matuku a ku nshikidilu, bidi biumvuika bimpe menemene. Bantemu ba Yehowa mbatuishibue ne: Yezu uvua mutuadije kukokesha bu Mukalenge wa Bukalenge bua Nzambi mu tshidimu tshia 1914, ne matuku a ku nshikidilu avua matuadije mu tshidimu atshi.h

Jon: Ndi nditatshisha bua kumvua malu onso aa.

Cameron: Bidi biumvuika bimpe menemene. Anu bu mumvua mudianjile kukuleja, bivua bingangate panyi matuku a bungi bua kumvua bimpe bualu ebu. Kadi ndi mutekemene ne: muyuki wetu mmukuambuluishe bua kumona ne: nansha mudi Bible kayi utela tshidimu tshia 1914, malu adi Bantemu ba Yehowa bitabuja pa bidi bitangila tshidimu etshi mmimanyine mu Bible.

Jon: Eyowa, ndi ne disanka dia bungi bualu bualu buonso buudi wamba, udi ubujadika ne Bible. Bimueneka ne: ki ngenyi yebe to. Ndi mumone bua tshinyi bualu ebu buvua bukole bua kubumvua. Bua tshinyi Nzambi kavua mua kutuambila diakamue mu Bible ne: Yezu uvua ne bua kutuadija kukokesha mu diulu mu tshidimu tshia 1914?

Cameron: Ndukonko luimpe lutambe, Jon. Mu bulelela, kudi malu a bungi adi Bible kayi mumvuije patoke. Nunku bua tshinyi Nzambi uvua mufundishe Bible mu mushindu wa ne: bantu bikala badienzeja bua kumumvua bimpe? Pamuapa tudi mua kuyukila bualu ebu musangu udi ulonda.

Jon: Tuetu benze nanku mbimpe.