Misambu mipiamipia ya kutendelela nayi Yehowa
1 Mu tshisangilu tshia ku tshidimu tshia Watch Tower Bible and Tract Society of Pennsylvania, tshivua tshienzeke mu dia 4 ngondo wa 10 wa 2014, bavua bamanyishe ne: mbalongolole bua kuakajilula mukanda wetu wa misambu utudi nawu mpindieu. Bushuwa, bualu ebu buakasankisha bantu bikole. Bakavuluija bantu bonso bavua mu tshisangilu atshi mushinga udi misambu yetu ya Bukalenge ne bua kuikala nawu mu ntendelelu wetu.—Mus. 96:2.
2 Udi mua kudiebeja ne: ‘Bua tshinyi bidi ne mushinga bua kuakajilula mukanda wetu wa misambu?’ Bua amue malu. Bua kumpala, ngumvuilu wetu wa Dîyi dia Nzambi udi utungunuka ne kutokeshibua, nanku bidi mua kuenza bua mêyi a misambu ashintuluka. (Nsu. 4:18) Bualu bukuabu budi ne: mêyi a bungi ne biambilu bidi mu mukanda wa misambu utudi nawu mpindieu bivua biangatshila mu Nkudimuinu wa bulongolodi bupiabupia wa mu Anglais uvuaku kumpala. Ke bualu kayi bivua bikengela kuakajilula mêyi a misambu bua apetangane ne Nkudimuinu wa bulongolodi bupiabupia muakajilula. Bu muvuabi bilomba mudimu wa bungi anu bua kuakajilula mêyi a misambu bua apetangane ne ngumvuilu wa Dîyi dia Nzambi utudi nende lelu, tudi bangate dipangadika dia kukumbaja misambu mipiamipia mikese mu mukanda wetu wa misambu.
3 Tudi ne bua kuindila too ne papatuka mukanda mupiamupia wa misambu pa mabeji bua tuetu kushisha kutuadija kuimba misambu mipiamipia anyi? Tòo. Tudi ne disanka dia kunumanyisha ne: kumpala eku, netuele ndambu wa misambu mipiamipia mu site wetu wa jw.org. Padi musambu mupiamupia upatuka, nebawuteke bua kuwimba ku ndekelu kua Tshisangilu tshia Mudimu. Nebafunde ku luseke luawu ne: “musambu mupiamupia.”
4 Mua kulonga misambu mipiamipia: Bidi mua kutukolela bua kulonga musambu mupiamupia. Kadi anu bu mufundi wa misambu, tudi basue kuimba misambu mu bisangilu bietu, katuyi ‘tupuwa’ to. (Mus. 30:12) Bua kulonga musambu mupiamupia, wenze malu adi alonda aa.
Uteleje tshikuma tshia musambu tshidibu bakuate tshikalabu mua kuela mu site wetu. Wenze nanku misangu ne misangu. Wewe utamba kuteleja tshikuma tshia musambu, nebikale bipepele bua wewe kuuvuluka.
Ulonge mêyi a musambu, pashishe ukebe bua kuakuata ku muoyo.
Wimbe musambu pamue ne tshikuma tshiawu. wenze nanku too ne pawawukuata.
Nuambulule misambu mipiamipia misangu mikese dîba dionso dinudi nuenza ntendelelu wa mu dîku too ne padi bena mu dîku bayimanya.
5 Mu ngondo idi kumpala eku, bobu baleje ne: netuimbe musambu mupiamupia ku ndekelu kua Tshisangilu tshia Mudimu, bena mu tshisumbu nebanji kuteleja tshikuma tshiawu musangu umue. Pashishe, nebimbe musambu au benda balondesha tshikuma tshiawu, anu mututu tuenza bua misambu yetu mikuabu.
6 Paudi wela meji bimpe bua bualu ebu, neumone ne: kusangisha mêyi etu pamue bua kutumbisha Yehowa kudi kutupesha disanka. Nanku, patudi mu bisangilu ki mbimpe tuikale ne tshilele tshia kumbuka tshianana tshianana muaba utudi basombe padibu batulomba bua kuimba musambu to.
7 Kudi mushindu mukuabu wa kuleja mutudi ne dianyisha bua misambu yetu ya tshijila. Mu mpuilu ne mu mpungilu, batu bela mizike kumpala kua tshitupa tshionso kutuadija. Misangu ibidi ku tshidimu, bana betu ba balume ne ba bakaji ba ku ntengu inayi ya buloba badi badifila ne muoyo mujima batu badifutshila njila bua kuya ku Patterson, mu New York bua kuenza mizike mimpe ya kutendelela nayi Yehowa eyi. Nanku, padi mulombodi utulomba bua kusomba miaba yetu bua kuteleja mizike idi bimbi ba misambu batulongoluele, mbimpe tusombe. Kuenza nunku, nekutuambuluishe bua kulongolola muoyo wetu bua malu atulongeshabu.—Eze. 7:10.
8 Netujikije bisangilu bietu lelu ne musambu mupiamupia udi ne tshiena-bualu ne: “Bukalenge bukadi bukokesha. Mbimpe bulue!” Musambu eu, uvuabu bimbe mu tshisangilu tshia ku tshidimu tshivuabu benze atshi, bavua bawenze nangananga bua bidimu 100 bia mufikilu wa diledibua dia Bukalenge.
9 Bulelela, misambu mipiamipia eyi idi “bintu bimpe” bia kudi Yehowa. (Mat. 12:35a) Tudisuikayi bua kulonga misambu mipiamipia eyi, tuyimbayi ne muoyo wetu wonso; bua kupesha Nzambi wetu butumbi ne bunême bidi bimuakanyine.—Mus. 147:1.