Tuakajayi mishindu yetu ya kuyisha: Miaba idi bantu bapanyishila bintu

Mushinga: Bantu ba bungi batu benza mudimu mêba a bungi; nunku misangu ya bungi mushindu muimpe wa kubapeta bua kubayisha mpatudi tuya muaba wabu wa mudimu. Kuyisha miaba idibu bapanyishila bintu kudi mua kutusankisha bikole ne kupatula bipeta bimpe, bualu katuakupangila bantu to, ne basumbishi batu bamueneka bikale ne kanemu kudi bantu badibu bamona ne: badi mua kuikala bakiliya babu. Bua kupatula bipeta bimpe, bamanyishi badi ne bua kuikala ne bukalanga ne busunguluji, kuvuala ne kudilengeja bimpe. (2 Kol. 6:3) Nanku, mutangidi wa mudimu udi ne bua kulondesha bua kumanya bungi bua misangu idibu bayisha mu teritware eyi ne mbanganyi batu bayishamu.

Mushindu wa kuenza malu:

Longolola mêyi a kubanga nawu muyuki mîpi. Wewe muangate mupanyishi wa bintu mêba a bungi, pamuapa kakukuanyishila bua uyukile nende mukuabu musangu to.
Usungule bua kuya kutangila bapanyishi padibu kabayi ne bia bungi bia kuenza, bu mudi patshidibu bakanguilaku.
Udienzeje bua kuanji kuyukila ne mfumu wa mudimu. Wikale ne musangelu ne disanka. Udi mua kuamba ne: “Tudi tuenda tuyukila ne bantu bua minite mikese pa miaba yabu ya midimu bualu mbikole bua kubapeta kumbelu.” Umuambile mêyi makese, pashishe umupeshe trakte, bibejibeji anyi mukanda mukuabu. Bua kabatufuanyikiji ne bapanyi ba bintu, ki mbimpe kulomba mapa to, anu muntu yeye mutuebeje mushindu udi mudimu wetu wenda.
Mfumu wa mudimu yeye muntu muimpe, umulombe dianyisha bua kuyukila ne bena mudimu bakuabu. Mu imue miaba ya kupanyishila bintu, pamuapa mbimpe kulomba ni kudi mushindu wa kushiya mikanda yetu muaba utu bena mudimu badiila anyi bikishila.
Wikale ne busunguluji ne wenze malu bilondeshile nsombelu. Tshilejilu, mupanyishi yeye uyukila ne kiliya anyi wenza mudimu mukuabu, indila too ne pajikijaye bua wewe kuyukila nende.

Tshitudi mua kuenza mu ngondo eu:

Mu Ntendelelu wenu wa mu Dîku udi ulonda, enzayi dinaya dia mua kubanga muyuki diudi mua kuyisha nadi mu teritware udi bantu bapanyishila bintu.