Dikolesha bana bimpe​—Ditshidi mua kuenzeka anyi?

ROBERT GLOSSOP wa ku Institut Vanier bua malu a Dîku mu Ottawa, ku Canada udi wamba ne: “Mpindieu tudi mu nsangilu wa bantu mutambe kuikala muenza ne nkongo ne nsanzu, mu nshidimukilu wa malu a mishindu mishilangane bikole, mudi mikenji ya nsombelu mulenga kayiyi mifuanangane.” Ntshipeta kayi tshidiku? Luapolo kampanda mu tshikandakanda tshia The Toronto Star ludi luamba ne: “Diimita mafu kudi mishikankunde, tshinyangu tshia bansonga ne didishipa dia bana bionso bidi bienda bibanda.”

Lutatu elu ndusambuke too ne mikalu ya Amerike wa ku Nord. Bill Damon, mulombodi wa Centre pour le Développement Humain mu Université wa Brown mu Rhode Island, ku États-Unis, mmukonkonone ntatu eyi mu Grande-Bretagne ne mu makuabu matunga a ku Mputu, pamue ne mu Australie, Israël, ne mu Japon. Udi wakula bua dipangila dia ekleziya, dia bilongelu, ne dia makuabu malongolodi mu dipesha bansonga buludiki. Udi wela meji ne: nshidimukilu wetu “ki mmumanye bidi bana bakengela bua kufumba bumuntu ne ngikadilu miakanyine.” Muikale utela bamanyi ba nkoleshilu wa bana kudi baledi babu, aba badi balongesha ne: “dinyoka didi ne njiwu ku makanda a mubidi ne ku dikala-bimpe dia bana,” Damon udi ujadika ne: au ke “ngenzelu bua kukolesha bana ba tshitunu ne ba tshishiku.”

Ntshinyi atshi tshidi bana ba lelu bakengela? Badi bakengela ku musangu ne ku musangu dilongesha diashila pa dinanga didi dilulamija tshieledi tshia lungenyi ne mutshima. Bana bashilangane badi balomba mishindu mishilangane ya dinyoka. Padi dinyoka disaka kudi dinanga, didi mua kufidibua misangu mivule ku dieleshisha meji. Ke bua tshinyi mbatuambile mu Nsumuinu 8:33 (NW) bua ‘kuteleja dinyoka.’ Kadi, bamue kabena ‘mua kubabela ne miaku patupu.’ Buabu buobu, bidi mua kukengela dinyoka diakanyine bua tshishiku, difila mu mushindu mukumbanyine. (Nsumuinu 17:10; 23:13, 14; 29:19, MMM) Mu difila mubelu eu, Bible kêna ukankamija diela mfimbu ne tshiji anyi dituta ne tshikisu, bidi mua kujiwula anyi kutapa muana mputa. (Nsumuinu 16:32) Tshidibi, muana udi ne bua kumvua bua tshinyi udi upeta dinyoka edi ne kumvua se: bidi nenku bualu muledi udi pamue nende, ku luseke luende.​—Fuanyikija ne Ebelu 12:6, 11.

Mibelu ya mu Bible mikuatshishi ne milenga ya nunku mmileja mu mukanda wa Nsapi wa disanka mu dîku.