Tuakajayi nyishilu wetu: Mua kupinganyina bantu

MUSHINGA: Bantu ba bungi batu bitaba mukenji wa Bukalenge batu basue kumanya bulelela budi butangila Nzambi. (Yes 55:6) Bua tuetu kubalongesha ku kakese ku kakese, bidi bikengela tuikale tubapinganyina. Bantu batu batuilangana ne ntatu mishilashilangane, pa nanku mbimpe mushindu utudi tutabalela majinga abu wikale mushilangane. Tuetu tudilongolola bimpe, bikale ne yonso wa kudibu mu meji ne tshipatshila tshia kutuadija dilonga dia Bible, netupatule bipeta bimpe menemene.

TSHIA KUENZA:

• Ditatshisha bua kubapinganyina lukasa, pamuapa panyima pa matuku makese.—Mat 13:19

• Divuija mulunda wabu, ubanemeke. Enza bua badiumvue badilekelele

• Bua kutuadija, ela muntu muoyo ne disanka. Mutela mu dîna diende. Umuvuluije tshiudi mupinganyine: pamuapa mbua kuandamuna lukonko, kumushila tshibejibeji tshipiatshipia, kumuleja mua kubuela mu site wetu wa ku Enternete, kumuelela filme anyi kumuleja mutu dilonga dia Bible dienzeka. Yeye ne dijinga dia kumanya bualu bukuabu, nubuyukidile.—Flp 2:4

• Umueleshishe meji pa mvese kampanda anyi umushile tshibejibeji bua kumiamina mâyi ku ntete ya bulelela iukavua mukune mu muoyo wende. (1Ko 3:6) Udie nende bulunda

• Wase tshishimikidi bua kumupinganyina kabidi