Tuakajayi nyishilu wetu tuyishe muntu yonso wa mu teritware wetu

MUSHINGA: Zekâya wakadianjila kumanyisha ne: bantu ba miakulu yonso ya bisamba bavua ne bua kuteleja lumu luimpe. (Zek 8:23) Kadi nnganyi wabayisha? (Lom 10:13-15) Tudi ne diakalenga ne bujitu bua kuyisha lumu luimpe kudi muntu yonso mu teritware wetu.—od-F 84 §10-11.

TSHIA KUENZA:

• Dilongolola. Utuku utuilangana ne bantu badi bakula muakulu mukuabu anyi? Udi mua kuenza mudimu ne programe wa kulonga nende miakulu wa JW Language bua kumanya mua kutuadija kuyukila ne bantu. Peshi udi mua kuleja muntu mu tshiamu tshiebe mudiye mua kumanya malu a bungi mu muakulu wende mu jw.org

• Tabalela nsombelu wa muntu. Wewe uyisha ku nzubu ne ku nzubu, kupitshishi mpunga nansha umue wa kuyisha bapitshi ba njila anyi bantu badi bindile mashinyi to. Wewe uyisha miaba idi bantu ba bungi, imanyina anu pa tshipatshila tshiebe tshia kuyisha

• Ikala ne tshisumi. Tungunuka ne kudienzeja bua kupetangana ne bantu bauvua kuyi musangane kumbelu. Dienzeja bua kutuilangana ne muntu ku nzubu yonso, pamuapa mu mêba mashilangane anyi mu matuku mashilangane. Bua kutuilangana ne bena ku imue nzubu bidi mua kulomba bua kubafundila mikanda, kubabikila ku telefone, anyi kubayisha mu njila

• Tungunuka ne kukolesha dijinga diabu. Bapinganyina diakamue bua kukolesha dijinga divuabu baleje nansha diodi dikese. Muntu yeye wakula muakulu mukuabu, keba muntu udi mua kumuambuluisha mu mukualu wende. Tungunuka ne kuyukila ne muntu au too ne paudi upeta bamanyishi badi bakula muakulu wende.—od-F 94 §39-40

NUMONE FILME WA NE: KUYISHA TOO NE “KU MIABA YA KULE MENEMENE YA PA BULOBA,” PASHISHE NUANDAMUNE NKONKO EYI:

• Ntshinyi tshivua bana betu ba balume ne ba bakaji aba benze bua kuyisha bantu ba mu teritware ya kule menemene? (1Ko 9:22, 23)

• Mbipumbishi kayi bivuabu ne bua kutantamena?

• Mmasanka kayi avuabu bapete?

• Ntshinyi tshiudi mua kuenza bua kupetangana ne bantu ba bungi ba mu teritware webe?