TUIKALAYI NE NSOMBELU WA BUENA KRISTO

Bualu bupiabupia mu Tshisangilu tshia munkatshi mua lumingu

Kutuadijila mu ngondo wa 1 wa 2018, mu tshisangilu tshia munkatshi mua lumingu nemuikale mamanyisha a kudilongela nawu Bible ne bindidimbi ne mêyi makuata bia mu Bible—Nkudimuinu wa bulongolodi bupiabupia (nwtsty) wa kudilongela nende ku Enternete, nansha yeye kayi muanji kuikalaku mu muakulu wenu. Kakuyi mpata, malu aa neakuambuluishe bikole mu dilongolola diebe dia tshisangilu. Kabidi neakusemeje pabuipi menemene ne Yehowa Tatu wetu wa dinanga!

MAMANYISHA A KUDILONGELA NAWU BIBLE

Mu mamanyisha aa mudi malu a bilele bia bantu, a miaba, ne a miakulu adi ambuluisha bua kumvua mvese ya bungi ya mu Bible.

Matayi 12:20

Mukaba wa muendu udi ufuima: Ku kale bavua batamba kutemesha tutoditodi tuenza ne diima tuvuabu buwuja ne mafuta a olive. Mukaba uvua ukoka mafuta au bua kapia kashale kateme. Tshiambilu tshia mu tshiena Greke tshia ne: “mukaba udi ufuima” tshidi mua kuikala tshileja mukaba uvua ufuima muishi pavuabu bajima mudilu, kadi dikala diawu dishala ne kapia. Mêyi a buprofete a mu Yeshaya 42:3 akavua makule bua luse lua Yezu uvua kayi ne bua kujima nansha kadikala ka ditekemena dia bena budipuekeshi ne dia bantu bavuabu bakengesha kavua kafuima.

Matayi 26:13

Bulelela: Muaku wa mu tshiena Greke wa ne: amên mmuaku wa mu tshiena Ebelu wa ne: ʼamén, udi umvuija ne: “bikale nanku,” anyi “mu bulelela.” Yezu uvua utamba kutuadija biambilu biende ne mêyi aa bua kulaya bualu kampanda, peshi kuakula bua mêyi a buprofete, pavuaye wenza nanku bivua bileja muvua mêyi ende malelela ne a kueyemena. Mushindu uvua Yezu utela mêyi a ne: “bulelela” anyi amen ngua pa buawu mu mifundu ya tshijila. Pavuaye uambulula malondangane (amen amen), tshilejilu bu mudi mu Evanjeliyo wa Yone, mbaakudimune ne: “bulelela, bulelela.”—Yne 1:51.

BINDIDIMBI NE MÊYI MAKUATA

Foto, bimfuanyi bizola, ne filme ya bimfuanyi nkayabi ne bia benda bazola bidi bileja malu mashilashilangane adibu bakuile mu Bible.

Betefaje, Mukuna wa Olive, ne Yelushalema

Kafilme kîpi aka kadi kaleja njila udi umbukila ku est kua Yelushalema mu musoko udibu babikila lelu ne: et-Tour (udibu bela meji ne: ke tshimenga tshia Betefaje tshia mu Bible) uya mutangile ku lumue lua ku nsongo mile ya mukuna wa Olive. Betania udi ku est kua Betefaje, ku luseke lua est lua mukuna wa Olive. Pavua Yezu ne bayidi bende baya ku Yelushalema bavua pa tshibidilu balala mu Betania udibu babikila lelu ne: tshimenga tshia d’el-Azariyé (Al Eizariya), dîna dia mu tshiena Arabe didi diumvuija ne: “Muaba wa Lazalo.” Kakuyi mpata Yezu uvua usomba kua ba Mâta, Mariya, ne Lazalo. (Mat 21:17; Mâk 11:11; Luk 21:37; Yne 11:1) Pavua Yezu umbuka kuabu uya ku Yelushalema, uvua mua kuikala ulonda njila udibu baleje mu filme eu. Mu dia 9 ngondo wa Nisana mu 33 panyima pa Yezu, pavua Yezu mubande pa muana wa mpunda pa mukuna wa Olive uya ku Yelushalema, uvua mua kuikala mulonde njila eu pavuaye ufumina ku Betefaje mutangile ku Yelushalema.

Njila udi ufumina ku Betania mutangile ku Betefaje
Betefaje
Mukuna wa Olive
Tshibandabanda tshia Kidilona
Mukuna wa ntempelo

Musonso mubueja mu tshikankanyi

Foto eu ngua muntu uvuabu babueje musonso wa santimetre 11,5 mu tshikankanyi. Foto wa kale eu ngua katshia ku tshikondo tshia bena Lomo, bavua bamuangule mu 1968 ku nord kua Yelushalema pavuabu bumbula bintu mu buloba. Udi ufila tshijadiki tshia ne: ku kale bavua mua kuikala bakudika muntu ku mutshi ne misonso pavuabu bamushipa. Musonso eu udi mua kuikala mufuanangane ne misonso ivua bena Lomo bakudike nayi Yezu Kristo ku mutshi. Bavua bapete foto eu mu kashete ka dibue muvua mifuba miume ya mufue kampanda ivuabu bateke pakavua mubidi wende mumane kubola. Bualu ebu budi buleja ne: bavua bajiika muntu uvuabu bakudika ku mutshi.—Mat 27:35.