Bua tshinyi bayidi ba Yezu kabavua babuela mu tshijila tshia biakudia?

Yone Mubatiji uvua mu buloko kukavua ndambu wa matuku panyima pa Yezu mumane kubuela mu Pasaka wa mu tshidimu tshia 30. Yone uvua musue bua bayidi bende balue bayidi ba Yezu, kadi mu ngondo yakalonda diedibua dia Yone mu buloko, buonso buabu kabakenza nanku to.

Nunku, bu muvua Pasaka wa mu 31 musemene pabuipi, bamue bayidi ba Yone bakalua kudi Yezu ne kumuebejabu ne: “Tuetu ne Bafalese tutu tubuela mu tshijila tshia biakudia, kadi bayidi bebe kabatu babuela mu tshijila tshia biakudia bua tshinyi?” (Matayi 9:14) Bafalese bavua babuela mu tshijila tshia biakudia bilondeshile tshilele tshia ntendelelu. Pashishe Yezu wakabapesha tshilejilu tshia Mufalese mukuabu uvua usambila udiamba muvuaye muntu muakane wamba ne: “Nzambi wanyi, ndi nkuela tuasakidila bualu tshiena bu bantu bakuabu . . . Ntu mbuela mu tshijila tshia biakudia misangu ibidi ku lumingu.” (Luka 18:11, 12) Bayidi ba Yone bavua mua kuikala pabu babuela mu tshijila tshia biakudia balonda tshilele tshivuaku. Anyi bavua mua kuikala babuele mu tshijila tshia biakudia badila bua diedibua dia Yone mu buloko. Bantu bavua bamone bualu ebu bavua badiebeja pabu bua tshinyi bayidi ba Yezu kabavua babuela mu tshijila tshia biakudia, pamuapa bua kuleja pabu kanyinganyinga bua tshivuabu benzele Yone.

Yezu wakabandamuna ne tshilejilu etshi: “Balunda ba musedianganyi kabena ne bualu bua kudila patshidi musedianganyi muikale nabu, ki mmuomu anyi? Kadi matuku nealue umbushabu musedianganyi kudibu, dîba adi nebabuele mu tshijila tshia biakudia.”​—Matayi 9:15.

Yone muine wakamba muvua Yezu muikale musedianganyi. (Yone 3:28, 29) Nunku, patshivua Yezu koku, bayidi bende kabavua babuela mu tshijila tshia biakudia to. Pafua Yezu, bayidi bende nebadile ne kabakujinga bua kudia to. Kadi malu avua ashintuluka pavuaye ubishibua ku lufu! Dîba adi, kabakuikala kabidi ne bualu buvuabu mua kubuelela mu tshijila tshia biakudia bua kanyinganyinga to.

Pashishe, Yezu wakafila bilejilu bibidi ebi: “Muntu kena mua kutelela tshipese tshia tshilamba tshidi katshiyi tshianji kutunyama pa tshilamba tshia pa mutu tshia kale to, bualu tshipese tshipiatshipia tshidi tshikoka tshilamba atshi ne kupandika kuatshi kudi kulua kubi menemene. Kabidi, bantu kabatu bela mvinyo mupiamupia mu milondo ya biseba ya kale to. Bobu benze nanku, dîba adi milondo idi ipandika ne mvinyo udi uya panshi, ne milondo ya biseba idi inyanguka. Kadi bantu batu bela mvinyo mupiamupia mu milondo ya biseba mipiamipia.” (Matayi 9:16, 17) Yezu uvua usua kuamba tshinyi?

Yezu wakambuluisha bayidi ba Yone Mubatiji bua bamanye ne: muntu nansha umue kavua ne bua kutekemena bua bayidi ba Yezu balonde bilele bia bena Yuda bia kale bu mudi tshia kubuela mu tshijila tshia biakudia to. Kavua mulue bua kutelakaja anyi kutungunuja ntendelelu wa kale ukavua munyanguke to, mmumue ne: ndongoluelu mujima wa ntendelelu ukavuabu pa kumbusha. Ntendelelu uvua Yezu ukankamija bantu bua kutendelela ki nguvua ulonda bilele bia buena Yuda ne bilele bia bantu to. Kavua ukeba bua kutelela tshipese tshia tshilamba tshipiatshipia pa tshia kale, anyi kuela mvinyo mupiamupia mu mulondo wa tshiseba wa kale mukayabale to.