Udi ukolela mu Nazaleta

Yezu wakakolela mu Nazaleta, tshimenga tshikese tshivua katshiyi tshia nsongo. Tshimenga etshi tshivua ku nord mu buloba bua mikuna muaba uvuabu babikila ne: Galela, ku ouest kua dijiba dinene divuabu babikila ne: Mbuu wa Galela.

Pavua Yezu pamuapa ne bidimu bibidi, Jozefe ne Mariya bakalua nende muaba au bafumina mu Ejipitu. Bidi bimueneka ne: dîba adi, yeye ke muana umuepele uvuabu nende. Kadi pashishe, bana babu ba mamuende aba badi baledibua: Yakobo, Jozefe, Simona, ne Yudasa. Jozefe ne Mariya bakalela kabidi bana ba bakaji, bana babu ne Yezu. Eyowa, Yezu uvua ne bakunyi bende ba balume ne ba bakaji, bobu bakese, mbasambombo.

Bulelela, Yezu uvua ne balela bende bakuabu. Tukadi bamanye Elizabeta ne muanende Yone. Bavua basombele ntanta wa kilometre ya bungi mu Yudaya ku sud. Salome, udi pamuapa muanabu ne Mariya ne mamuende mukuabu wa Yezu mmusombele pabuipi apu mu Galela. Bayende wa Salome n’Zebedayi. Bidi bimueneka ne: bana babu babidi, Yakobo ne Yone, bavua bana babu ne Yezu ba mua mamuende mukuabu. Katuena bamanye bikala Yezu ni uvua usomba bikole ne bana ba balume abu mu dikola diabu, kadi ndekelu wa bionso bakalua bena diende ba pa muoyo, kuluabu bapostolo babidi ba Yezu.

Jozefe uvua ne bua kuenza mudimu bikole menemene bua kukuatshisha dîku diende divua dienda didiunda edi. Mmuena mabaya. Jozefe wakakolesha Yezu anu bu wende wa munda, ke bualu kayi badi babikila Yezu ne: “muana wa muena mabaya.” (Matayi 13:55) Jozefe udi ulongesha Yezu bua kuluaye pende muena mabaya, ne udi ulonga mudimu au bimpe. Bua bualu ebu, bantu bakalua kuamba bua Yezu ne: “Yeye si mmuena mabaya.”​—Mâko 6:3.

Bena mu dîku dia Jozefe bavua bateka ntendelelu wa Yehowa pa muaba wa kumpala mu nsombelu wabu. Bu muvua Jozefe ne Mariya batumikila Mikenji ya Nzambi, bavua balongesha bana babu malu a Nzambi ‘pavuabu basomba mu nzubu muabu, pavuabu benda mu njila, pavuabu balala, ne pavuabu babika.’ (Dutelonome 6:6-9) Mu Nazaleta muvua Nsunagoga. Tudi mua kuamba ne: Jozefe uvua uyamu ne dîku diende pa tshibidilu bua kutendelela. Bakalua kuamba pashishe bua Yezu ne: wakaya ku nsunagoga “dituku dia Nsabatu bu muvua tshilele tshiende.” (Luka 4:16) Bena mu dîku edi bavua bapeta kabidi disanka dia bungi pavuabu benza ngendu pa tshibidilu bua kuya ku ntempelo wa Yehowa mu Yelushalema.