“Tshidi Nzambi musuike kaba kamue”

Mikenji ya Mose ivua ilomba muntu uvua musue kushipa dibaka bua kufunda mukanda wa dishipa nawu dibaka. Dienza nanku divua dipangisha bantu bua kushipa mabaka abu lukasa lukasa. Kadi mu tshikondo tshia Yezu, bamfumu ba bitendelelu bavua bavuije dishipa dia dibaka bualu bupepele. Balume bavua babenga bakaji babu bua bualu kayi buonso. (mamanyisha a mu nwtsty bua Mâk 10:4, 11) Yezu wakakoka ntema ya bantu bua kubaleja ne: Yehowa ke uvua muanyishe bua dibaka dikalaku, ne yeye ke uvua mudituadije. (Mâk 10:2-12) Mulume ne mukajende bavua ne bua kulua “mubidi umue” ne kusomba pamue bua kashidi. Bilondeshile muyuki wa buena eu udi mu Matayi, bualu bumue budi Bible wanyishila dishipa dia dibaka budi anu bua “masandi.”—Mat 19:9.

Lelu eu, bantu ba bungi kabena bamona dibaka bu muvua Yezu udimona to, kadi badi badimona bu muvua Bafalese badimona. Padi bilumbu bijuka, bena panu badi bashipa dibaka ne lukasa luonso. Kadi bena Kristo bobu badi bangata mitshipu yabu ya dibaka ne mushinga ne badi badienzeja bua kujikija bilumbu biabu padibu batumikila mêyi manene a mu Bible. Nuenu bamane kutangila filme wa Dinanga ne kanemu bidi bipetesha mêku buobumue, nuandamune nkonko eyi:

• Mmunyi muudi mua kutumikila mêyi adi mu Nsumuinu 15:1 mu dibaka dienu? Bua tshinyi mbimpe kuatumikila?

• Mmushindu kayi udi Nsumuinu 19:11 mua kukuambuluisha bua kuepuka bilumbu?

• Wewe mumone ne: dibaka dienu didi mu njiwu, pamutu pa ‘kuela meji a kudishipa,’ nnkonko kayi iudi mua kudiela?

• Mmunyi mudi Matayi 7:12 mua kukuambuluisha bua kuikala mulume muimpe anyi mukaji muimpe?