Bakenza disua dia Yehowa

Muntu mutambe bunene udi wenza mudimu mupuekele

YEZU uvua mumanye ne: mêba ende a ndekelu ne bapostolo bende avua ne bua kuikala a mushinga. Bavua ne bua kumukuata mu katupa kakese, ne ditabuja diende divua ne bua kutetshibua bikole kupita kumpala. Yezu uvua kabidi mumanye ne: mabenesha a bungi avua mamuindile. Mu katupa kîpi bavua ne bua kumubandisha ku diboko dia balume dia Nzambi ne kumupesha ‘dîna didi pa mutu pa dîna dionso; ne bua mu dîna dia Yezu binu bionso bitue panshi, ne bia [“bonso badi,” NW] mu diulu ne pa buloba ne muinshi mua buloba.’​—Filipoi 2:9, 10.

Kadi, nansha kanyinganyinga bua lufu luende lukavua pabuipi anyi dijinga dia kupeta difutu divuabu bamulaye kabiakumbusha ntema yende ku majinga a bapostolo bende nansha. Yone wakafunda panyima mu Evanjeliyo wende ne: ‘[“Wakabananga,” NW] too ne ku nshikidilu.’ (Yone 13:1) Ne mu mêba aa makole a ndekelu a muoyo wende bu muntu mupuangane, Yezu wakapesha bapostolo bende dilongesha dia mushinga mukole.

Dilongesha dia budipuekeshi

Bapostolo bavua basombe ne Yezu mu nzubu kampanda wa kuulu mu Yelushalema bua kusekelela Pasaka. Kumpala, Yezu ukavua mubumvue belangana mpata bua kumanya uvua mutambe bakuabu munkatshi muabu. (Matayo 18:1; Mâko 9:33, 34) Uvua muyikile nabu pa muanda eu ne uvua mudienzeje bua kuakaja mmuenenu wabu. (Luka 9:46) Kadi, mpindieu Yezu wakela kashonyi pa malongesha aa, wenza mudimu ne mushindu mukuabu. Wakasungula ki ng’anu bua kuyikila nabu pa malu avua atangila budipuekeshi, kadi bua kubuleja.

Yone udi ufunda ne: Yezu ‘wakabika ku mesa, wakavula bivualu biende, wakangata dituaya, wakadijingiladi. Pashishe wakela mâyi mu dilonga, wakabanga kuowesha bayidi makasa ne kuakupula ne dituaya diakadiye mudijingile.’​—Yone 13:4, 5.

Kale ku Moyen-Orient, mu tshikondo tshia luya bantu bavua pa tshibidilu bavuala sandale ivua ishiya makasa patoke pavuabu bendela mu njila ya lupuishi. Pavuabu babuela mu nzubu mua muntu mupele, muntu eu uvua ubela muoyo. Uvua ne bua kufila mâyi mu malongo bua kuowabu ku makasa. Mu nzubu ya babanji, mupika uvua wenza mudimu wa dioweshangana mâyi ku makasa.​—Balumbuluishi 19:21; 1 Samuele 25:40-42.

Mu nzubu wa kuulu, Yezu ne bapostolo bende kabavua benyi ba muntu nansha. Kakuvua muntu uvua mubakidile bua kubapeshaye malongo, ne kakuvua bapika bavua mua kubowesha mâyi ku makasa nansha. Pakatuadija Yezu kubowesha mâyi ku makasa, bapostolo bakalubakana. Muntu uvua mutambe bunene munkatshi muabu wakenza mudimu mutambe bupuekele!

Kumpala, Petelo wakabenga bua Yezu kumuoweshaye mâyi ku makasa. Kadi Yezu wakamuambila ne: “Meme tshiyi mukuoweshe, kuena kabidi mulongi wanyi to.” Pakajikija Yezu kuowesha bapostolo bende bonso mâyi ku makasa, wakamba ne: “Nudi bumvue tshindi munuenzele etshi anyi? Nudi numbikila Mulongeshi, kabidi Mukalenge; nudi nuamba anu biakane, ke mundi. Pangikala meme Mukalenge, kabidi Mulongeshi, munuoweshe mayi ku makasa, nuenu penu nuikale nuoweshangana mayi ku makasa. Ndi munuleje tshilejilu etshi bua nuenze penu mundi munuenzele emu.”​—Yowanese 13:6-15, MMM.

Yezu kavua ujadika tshilele tshia dioweshangana mâyi ku makasa to. Kadi uvua wambuluisha bapostolo bende bua bikale ne mmuenenu mupiamupia​—wa budipuekeshi ne budisuile bua kuenzela bana babu bena Kristo midimu mitambe kupuekela. Bushuwa, bakumvua dilongesha adi. Tangila tshiakenzeka panyima pa bidimu bivule pakajuka tshilumbu tshia ditengula. Nansha muvuabu belangane “mpata ya bungi,” bantu bavuapu bakenza malu mu bulongame ne bakateleja ne kanemu mmuenenu wa umue ne mukuabu. Kabidi, nanshsa mutuvua mua kutekemena ne: umue wa ku bapostolo alombole tshisangilu etshi bualu bavuamu, bidi bimueneka ne: muyidi Yakobo ke wakatshilombola. Bualu ebu budibu bafunde mu Bienzedi budi buleja ne: bapostolo bavua benze madikolela a bungi mu dileja budipuekeshi.​—Bienzedi 15:6-29.

Dilongesha buetu tuetu

Mu diowesha bayidi bende mâyi ku makasa, Yezu wakafila dilongesha dia bukole bua budipuekeshi. Bushuwa, bena Kristo kabena ne bua kuela meji ne: badi ne mushinga wa bungi mu mushindu wa se: misangu yonso bakuabu bikala ne tshia kubenzela mudimu, anyi kabena ne bua kukeba mianzu ya butumbi ne lumu nansha. Pamutu pa nanku, badi ne bua kulonda tshilejilu tshishiya kudi Yezu, uvua kayi ‘muluile bua bantu bamukuatshile mudimu, [kadi] bua kubakuatshila mudimu ne kufila muoyo wende bua kupikula nawu bantu ba bungi.’ (Matayo 20:28) Bushuwa, balondi ba Yezu badi ne bua kuikala badiakaje bua kuenzelangana midimu mitambe bupuekele.

Petelo uvua muambilemu pakafundaye ne: ‘Buonso buenu nudiluatshishe ne bupuekele, bua kukuatshishangana; bualu bua Nzambi udi upidia badi badisue, kadi udi upa badi badipuekesha [“bulenga bukena butuakanyine,” NW].’ (1 Petelo 5:5) Muaku wa tshiena-Greke bua ‘kudiluatshisha’ udi ufumina ku muaku udi umvuija “tshilamba tshidi mupika uvuala mu tshifuka bua kuenza natshi mudimu,” muinshi muatshi muvua tshilamba tshidilekelele tshivuabu basuika. Petelo uvua mua kuikala wakula bua tshienzedi tshia Yezu tshia kudijingila dituaya ne kuowesha bapostolo bende mâyi ku makasa anyi? Katuena mua kuamba bualu ebu ne dishindika to. Nansha nanku, mudimu mupuekele wa Yezu uvua mushiye tshipeta katshiyi kukupula mu mutshima wa Petelo, anu bu mudiwu ne bua kuikala natshi mu mitshima ya bonso badi basue kuikala balondi ba Kristo.​—Kolosai 3:12-14.