Malu adibu baledile mu Mabeji a tshisangilu tshia Nsombelu ne mudimu wetu
LUMINGU LUA DIA 4-10/2
BIUMA BIA MU DÎYI DIA NZAMBI | LOMO 1-3
“Tungunuka ne kulongesha kondo kebe ka muoyo”
Kondo ka muoyo kimpe ku mêsu kua Nzambi
6 Nansha bantu badi kabayi bamanye Yehowa batu bajingulula ne: kudi malu adi mimpe ne adi mabi. Bible udi wamba ne: “Badi bapishibua anyi babingishibua kudi meji abu bobu nkayabu.” (Lomo 2:14, 15) Tshilejilu, bantu ba bungi mbamanye ne: kushipangana anyi kuiba nkubi. Nansha mudibu kabayi bamanye ne: tshidi tshibambila atshi nkondo kabu ka muoyo (bukole budi Yehowa muteke munda muabu bua kubambila tshidi tshimpe ne tshidi tshibi), mu bulelela badi bakateleja. Badi kabidi balonda mêyi manene a Nzambi anyi bulelela bua nshindamenu budi Yehowa mufile bua kutuambuluisha bua kuangata mapangadika mimpe mu nsombelu wetu.
Kondo ka muoyo kimpe ku mêsu kua Nzambi
8 Kudi bantu badi bela meji ne: kuteleja kondo kabu ka muoyo kudi kumvuija kulonda mudibu badiumvua tshianana. Badi bela meji ne: badi mua kuenza tshionso tshidibu basue bua kuenza padibu bobu batshimona ne: ntshimpe. Kadi dipanga dietu dia bupuangane didi mua kutusaka bua tudiumvue mu mushindu kampanda anyi kansanga, ne mushindu au udi mua kutupambuisha. Mushindu utudi tudiumvua udi mua kuikala ne bukole bua bungi, ufika too ne ku dilenga kondo ketu ka muoyo. Bible udi wamba ne: “Muoyo udi udinga kupita tshintu tshikuabu kayi tshionso ne mmubi mutambe. Nnganyi udi mua kuwumanya?” (Yelemiya 17:9) Nunku tudi mua kutuadija kuela meji ne: bualu kampanda mbuimpe nansha buobu buikale bubi. Tshilejilu, kumpala kua Paulo kulua muena Kristo uvua ukengesha bantu ba Nzambi bibi bitambe, wela meji ne: tshivuaye wenza atshi tshivua tshimpe. Buende yeye, uvua ne kondo ka muoyo kimpe. Kadi wakalua kuamba pashishe ne: “Yehowa ke udi undumbuluisha.” (1 Kolinto 4:4; Bienzedi 23:1; 2 Timote 1:3) Pavua Paulo mumanye muvua Yehowa umona bualu buvuaye wenza, wakajingulula ne: uvua ne bua kushintuluka. Nunku kumpala kua kuenza bualu kampanda, tudi ne bua kudikonka ne: ‘Yehowa mmusue bua ngenze tshinyi mu bualu ebu?’
9 Wewe munange muntu, kuakujinga kumubungamija to. Bu mutudi banange Yehowa, katuena basue kuenza bualu kampanda budi mua kumubungamija to. Ditshina dietu dia kubungamija Yehowa didi ne bua kuikala dikole menemene. Tudi tumuenena bualu ebu ku tshilejilu tshia Nehemiya. Wakabenga bua kubuelela pa muanzu wende wa bunguvena bua kupeta bubanji. Bua tshinyi? Wakamba ne: uvua muenze nanku “bua ditshina dia Nzambi.” (Nehemiya 5:15) Nehemiya kavua musue kuenza bualu buvua mua kubungamija Yehowa to. Anu bu Nehemiya, tuetu petu tudi tutshina bua kubungamija Yehowa patudi tubenga kuenza malu mabi. Tudi mua kumanya malu adi asankisha Yehowa patudi tubala Bible.—Tangila Dimanyisha dia ku ndekelu 6.
LUMINGU LUA DIA 25/2–3/3
BIUMA BIA MU DÎYI DIA NZAMBI | LOMO 9-11
it-1-F 1234 §6
Mukawu, Muena mukawu
Tshisumi tshibi. Muntu udi mua kuikala ne tshisumi anyi mukawu bua bualu kampanda, kadi tshisumi atshi anyi mukawu au udi mua kuikala mubi ku mêsu kua Nzambi. Ke muvuabi bua bena Yuda ba bungi ba mu bidimu lukama bia kumpala. Bavua bakeba kujadika buakane ku malu avuabu benza bilondeshile Mikenji ya Mose. Kadi Paulo wakabaleja ne: tshisumi tshiabu katshivua tshimpe to, bualu kabavua natshi bilondeshile dimanya dijalame to. Nunku kabakapeta buakane bulelela bua kudi Nzambi to. Bavua ne bua kuitaba tshilema tshiabu ne kupingana kudi Nzambi ku butuangaji bua Kristo bua bobu kupeta buakane ne budikadidi ku tshibawu tshia Mikenji ya Mose. (Lom 10:1-10) Shaula wa ku Tâso uvua umue wa ku bantu abu. Uvua ne tshisumi tshiamba kumudia bua buena Yuda, uvua ‘ukengesha tshisumbu tshia Nzambi ne utshinyangakaja.’ Uvua ulonda Mikenji ya Mose ne mu katoba, udileja ‘kayi ne tshivuabu mua kumubanda natshi.’ (Gal 1:13, 14; Flp 3:6) Kadi mukawu wende bua buena Yuda uvua mubi. Uvua muntu wa muoyo mutoke, ke bualu kayi Yehowa wakamuenzela ngasa mu Kristo pakamuambuluishaye bua kubuela mu ntendelelu mulelela.—1Tm 1:12, 13.