Muena Samalea wakadileja muntu muimpe

Patshivua Yezu pabuipi ne Yelushalema, bena Yuda ba bungi bakaya kudiye. Bamue bavua basue bua abalongeshe ne bakuabu bakeba kumuteta. Umue wa kudibu uvua mumanyi wa mikenji, wakebeja Yezu ne: “Mulongeshi, ndi ne bua kuenza tshinyi bua kupiana muoyo wa tshiendelele?”​—Luka 10:25.

Yezu wakajingulula ne: muntu eu kavua musue anu kumanya amue malu patupu to. Uvua mua kuikala ujinga bua Yezu andamune mu mushindu uvua mua kufiikisha bena Yuda munda. Yezu uvua mujingulule ne: muntu eu ukavua ne diandamuna kampanda. Nunku wakamuandamuna ne meji mu mushindu uvua muenze bua apatule tshivuaye natshi mu lungenyi luende.

Yezu udi webeja ne: “Mbafunde tshinyi mu Mikenji? Mmunyi muudi ubala?” Muntu eu uvua mulonge Mikenji ya Nzambi, nunku wakafila diandamuna dimanyine mu mikenji. Wakatela mêyi adi mu Dutelonome 6:5 ne adi mu Lewitiki 19:18, wamba ne: “‘Udi ne bua kunanga Yehowa Nzambi webe ne muoyo webe wonso, ne anyima webe yonso, ne bukole buebe buonso, ne lungenyi luebe luonso,’ ne ‘kunanga mukuebe bu muudi mudinange.’” (Luka 10:26, 27) Edi ke diandamuna anyi?

Yezu wakambila muntu eu ne: “Udi muandamune bimpe; tungunuka ne kuenza nunku, neupete muoyo.” Kadi muyuki kawakimanyina apu to. Muntu eu kavua ukeba diandamuna menemene ku lukonko to, uvua ukeba “kudileja muakane,” bua ajadike ne: lungenyi luende ndulelela ne bua kuleja muvuaye wenzela bantu malu mu mushindu muimpe. Ke kuebejaye ne: “Mukuanyi nnganyi menemene?” (Luka 10:28, 29) Lukonko luvua lumueneka lupepele elu luvua lukonga malu a bungi. Mmushindu kayi?

Bena Yuda bavua bela meji ne: muaku “mukuanyi” uvua utangila anu aba bavua banemekela bilele bia bena Yuda, ne bivua bimueneka bu ne: Lewitiki 19:18 uvua ushindika bualu ebu. Mu bulelela, muena Yuda uvua mua kuamba ne: ‘kabivua bianyishibue’ bua kulamakana ne muntu uvua kayi muena Yuda to. (Bienzedi 10:28) Nunku muntu eu pamuapa ne bamue bayidi ba Yezu bavua badimona bakane pavuabu benzela bena Yuda nabu malu ne bulenga. Kadi bavua mua kuenzela muntu uvua kayi muena Yuda malu mu mushindu mubi; bualu buabu bobu kavua ‘muinabu’ mulelela to.

Mmunyi muvua Yezu mua kuakaja lungenyi elu kayi unyingalaja muntu eu ne bena Yuda bakuabu? Wakenza nunku pakabalondelaye muyuki eu: “Muntu mukuabu uvua umbuka ku Yelushalema upueka ku Yeliko, wakakuluka mu bianza bia banyengi, kumunyengabu bionso bivuaye nabi, kumukumabu ne kuyabu, bamushiye mufue tshipuka.” Yezu udi utungunuka ne: “Mpindieu, muakuidi mukuabu uvua upuekela njila au ku mpukapuka, kadi pakamumonaye, wakayila luseke lukuabu lua njila. Bia muomumue, muena Lewi mukuabu pende, pakafikaye muaba au ne kumumonaye, wakayila luseke lukuabu lua njila. Kadi muena Samalea mukuabu uvua upitshila mu njila au wakalua kudiye, pakamumonaye, luse luakamukuata.”​—Luka 10:30-33.

Bushuwa muntu uvua Yezu ulondela bualu ebu uvua mumanye ne: bakuidi ba bungi ne bena Lewi bavua benza mudimu ku ntempelo bavua basombele mu Yeliko. Pavuabu bumbuka ku ntempelo, bavua ne bua kuenda mutantshi wa kilometre 23. Njila au uvua mua kuikala ne njiwu, ne banyengi bavua basokomamu bua kuenzelangana bibi. Bu muakuidi ne muena Lewi bapete muena Yuda nabu mu lutatu kabavuaku ne bua kumuambuluisha anyi? Mu muyuki udi Yezu ulonda, udi wamba ne: kabavua benze nanku to. Kadi muena Samalea, muntu wa mu tshisamba tshivua bena Yuda bapetula ke uvua muambuluishe muntu au.​—Yone 8:48.

Mmunyi muvua muena Samalea eu muambuluishe muena Yuda uvuabu batape mputa eu? Yezu udi utungunuka wamba ne: “Nunku, wakasemena kudiye, kusuikaye mputa yende, kuyelaye manyi ne mvinyo. Pashishe wakamubandisha pa nyama wende, kuyaye nende ku nzubu wa tshilala benyi ne kumulamaye bimpe. Dituku diakalonda, wakangata ndenaliyo ibidi, kuyipesha mutangidi wa nzubu wa tshilala benyi, kuambaye ne: ‘Umulame bimpe, ne tshionso tshiwatula tshia pa mutu, nenkupingajilatshi pangalukila.’”​—Luka 10:34, 35.

Yezu Mulongeshi munene mumane kufila tshilejilu etshi, wakela muntu eu lukonko lua meji lua ne: “Buebe wewe, nnganyi wa ku bantu basatu aba udi mua kuikala mudivuije mukuende wa muntu uvua mukuluke mu bianza bia banyengi?” Pamuapa muntu eu uvua mumvue bibi bua kuamba ne: “Mmuena Samalea” ke kuambaye ne: “Mmuntu uvua mumuenzele malu ne luse au.” Pashishe Yezu wakaleja patoke dilongesha dia mu muyuki wende eu umukankamija ne: “Ndaku, wenze pebe bia muomumue.”​—Luka 10:36, 37.

Eu uvua mushindu muimpe wa kulongesha! Bu Yezu muambile muntu eu patupu ne: bantu badi kabayi bena Yuda bavua pabu binende, yeye ne bena Yuda bakuabu bavua bateleja bavuaku mua kuitaba bualu abu anyi? Pamuapa kabavua mua kuitaba to. Kadi padiye umulondela muyuki mupepele eu, wenza mudimu ne malu adi bamuteleji mua kumvua, diandamuna dia lukonko lua ne: “Mukuanyi nnganyi menemene?” diakamueneka patoke. Muntu udi uleja mudiye mukuetu mulelela ngewu udi uleja dinanga ne bulenga bidi mukanda wa Nzambi utulomba bua kuleja.