Dilongesha bua diakidilangana ne bua disambila

Ku luseke lua Mukuna wa Olive ku est, kuvua musoko wa Betania uvua mutantshi wa kilometre mitue ku isatu kumbukila ku Yelushalema. (Yone 11:18) Yezu wakayaku ne kubuelaye mu nzubu mua bana ba muntu babidi ba bakaji, Mâta ne Mariya. Bobu ne muanabu wa balume Lazalo mbalunda ba Yezu ne bakamuakidila ne disanka.

Kuikala ne Masiya bu muenyi ndiakalenga dinene. Mâta mmusue kuakidila Yezu bimpe, nunku udi uditua mu dimulambila biakudia bia bungi. Padi Mâta eku wenza mudimu, Mariya wabu mmusombe yeye ku makasa a Yezu wenda umuteleja. Padi mutantshi upita, Mâta udi wambila Yezu ne: “Mukalenge, kabienaku bikuambila bualu bua mudi muanetu mundekeele midimu nkayanyi anyi? Muambila koku alue kungambuluisha.”​—Luka 10:40.

Pamutu pa Yezu kuakula bibi bua Mariya, udi ubela Mâta bua muvuaye mudine ne kasuki mu dienza bintu bia ku mubidi wamba ne: “Mâta, Mâta, udi uditatshisha ne usumpakana bua bintu bia bungi. Kadi bintu bikese ke bidi ne bualu anyi anu tshimue. Mariya yeye mmusungule tshitupa tshimpe ne kabakumunyengatshi to.” (Luka 10:41, 42) Eyowa, Yezu udi uleja ne: ki mbimpe kupitshisha dîba dia bungi bua kulamba biakudia bia bungi to. Tshiakudia anu tshikese tshivua tshikumbane.

Tshivua Mâta ujinga kuenza tshivua tshimpe. Uvua musue kuikala muakididi wa benyi. Kadi bu muvuaye mutume anu ntema ku biakudia, bivua bileja ne: uvua upangila mibelu ya mushinga ya kudi Muana wa Nzambi. Yezu wakashindika ne: Mariya uvua muenze disungula dimpe, divua mua kumupetesha masanka a kashidi, ne bualu ebu budi dilongesha didi yonso wa kutudi ne bua kuvuluka.

Musangu mukuabu, Yezu wakafila dilongesha dishilangane ne edi kadi divua padi dia mushinga. Muyidi kampanda wakamukonka ne: “Mukalenge, tulongesha mua kusambila anu bu muvua Yone pende mulongeshe bayidi bende.” (Luka 11:1) Yezu ukavua mufile dilongesha edi kukavua kupite bu tshidimu tshijima ne tshitupa mu Muyuki wende wa pa Mukuna. (Matayi 6:9-13) Kadi muyidi eu uvua mua kuikala pamuapa kayipu dîba adi to, nunku Yezu udi wambulula malu manene. Pashishe kufilaye tshilejilu bua kuleja mudibi ne mushinga bua kusuminyina mu disambila.

“Fuanyikijayi ne: Umue wa kunudi udi ne mulunda wende, udi uya kudiye mundankulu, umuambila ne: ‘Mulunda wanyi, nsombeshaku mampa asatu, bualu umue wa ku balunda banyi mmulue kuanyi mpindieu ufumina ku luendu, tshiena ne tshintu tshia kumupesha to.’ Kadi au wakamuandamuina mu nzubu ne: ‘Lekela kuntatshisha. Tshiibi tshikadi tshikanga, meme ne bana banyi batekete tukadi pa bulalu. Tshiena mua kujuka bua kukupesha tshintu to.’ Ndi nnuambila ne: nansha yeye kayi mujuke bua kumupesha tshintu bualu mmulunda wende, bushuwa bua disuminyina diende dia dikima, yeye neajuke ne neamupeshe tshionso tshidiye natshi dijinga.”​—Luka 11:5-8.

Yezu kavua musue kuleja muaba eu ne: Yehowa katu musue kuandamuna malomba bu mulunda au to. Kadi uvua musue kuleja ne: bikala mulunda uvua kayi musue muandamune ku dilomba dia disuminyina, bushuwa Tatuetu wa mu diulu neandamune masambila a batendeledi bende ba lulamatu a muoyo mujima. Yezu udi utungunuka wamba ne: “Nunku ndi nnuambila ne: tungunukayi ne kulomba, nebanupeshe; tungunukayi ne kukeba, nenupete; tungunukayi ne kukokola, nebanunzuluile. Bualu muntu yonso udi ulomba badi bamupesha, muntu yonso udi ukeba udi upeta, ne muntu yonso udi ukokola nebamunzuluile.”​—Luka 11:9, 10.

Pashishe Yezu udi ufila dilongesha pa kufuanyikija Tatuende ne batatu ba pa buloba wamba ne: “Mu bulelela, ntatu kayi wa munkatshi muenu, muanende yeye mumulombe mushipa, umupesha nyoka pamutu pa mushipa? Anyi yeye mumulombe kabidi diyi, umupesha kaminyiminyi? Nunku, binuikala nuenu, nansha munudi bantu babi, bamanye mua kupesha bana benu bintu bimpe, kadi Tatu wa mu diulu kakupesha badi bamulomba nyuma muimpe anyi?” (Luka 11:11-13) Edi ndishindika dimpe dia ne: Tatuetu mmusue kututeleja ne kutukumbajila majinga etu.