Yezu wondopa bena nsudi dikumi​—Umue uleja dianyisha

Bua Yezu kupangisha tshivua bena ku Tshilumbuluidi tshinene balongolole bua kumushipa, wakaya mu tshimenga tshia Efelayima pabuipi ne ku nord-est kua Yelushalema. Wakasomba muntu amu ne bayidi bende, kule ne baluishi bende. (Yone 11:54) Kadi bu muvua tshikondo tshia Pasaka wa mu 33 B.B, tshienda tshisemena, nunku Yezu udi udimona muenzejibue kabidi bua kuenza luendu. Wakaya ku nord kua Samalea, kuya too ne ku Galela, wendakana muaba eu bua musangu wende wa ndekelu kumpala kua kufuaye.

Ku ntuadijilu kua luendu luende, pavuaye wenda mu musoko ne musoko, wakatuilangana ne bantu balume dikumi bavua ne nsudi. Disama edi divua mua kudia bimue bitupa bia mubidi ku kakese ku kakese, bu mudi minu, bana ba nkasa anyi matshi. (Nomba 12:10-12) Mikenji ya Nzambi ivua ilomba muena nsudi bua kuela dîyi ne: “Ndi mukoya, ndi mukoya!” ne kuikala muaba wa nkayende.​—Lewitiki 13:45, 46.

Bua kutumikila mukenji eu, bena nsudi dikumi aba bakimanyina kule ne Yezu. Nunku bakela dîyi dikole ne: “Yezu, Mulongeshi, tumvuilaku luse!” Pakabamonaye, wakabambila ne: “Ndayi, nudileje kudi bakuidi.” (Luka 17:13, 14) Nunku wakanemeka Mikenji ya Nzambi ivua ipesha bakuidi bukenji bua kumanyisha muvua muena nsudi kampanda muondopibue. Bavua mua kusomba kabidi munkatshi mua bantu bavua kabayi basama.​—Lewitiki 13:9-17.

Bena nsudi dikumi aba bavua bashindike muvua Yezu ne bukole bua kuenza bishima. Bakaya bua kumona bakuidi kumpala mene kua bobu kuondopibua. Patshivuabu mu njila, bakafutshibua bua muvuabu bitabuje Yezu. Bakatuadija kumona ne kumvua ne: mubidi wabu uvua wenda wakana.

Bena nsudi tshitema bavua pabu buondopibue bakatungunuka ne luendu luabu. Kadi umue wakapingana. Muntu eu uvua muena Samalea uvua mupingane bua kukeba Yezu. Bua tshinyi? Bualu uvua musue kuleja Yezu dianyisha dia bungi bua tshivua tshienzeke. Muntu uvua ne nsudi kumpala eu udi “utumbisha Nzambi ne dîyi dikole,” mumanye ne: Nzambi ke uvua bushuwa muenze bua mubidi wende wakane. (Luka 17:15) Pakamonaye Yezu, wakakuluka kumpala kuende, kumuelaye tuasakidila.

Yezu wakambila bantu bavuaye nabu ne: “Bantu bonso dikumi bavua balengejibue, ki mmuomu anyi? Kadi bakuabu tshitema badi penyi? Kakuvua muntu mukuabu mupingane bua kutumbisha Nzambi anu muntu wa tshisamba tshikuabu eu anyi?” Pashishe Yezu wakambila muena Samalea eu ne: “Juka, ndaku; ditabuja diebe ndikuondope.”​—Luka 17:17-19.

Pavua Yezu muondope bena nsudi dikumi aba, wakaleja ne: uvua ne bukole bua kudi Yehowa Nzambi. Mpindieu umue wa ku bena nsudi dikumi aba mmuondopibue ku diambuluisha dia Yezu kadi udi kabidi pamuapa mu njila wa muoyo. Katuena mu tshikondo tshidi Nzambi wenza mudimu ne Yezu bua kuondopa bantu mushindu eu to. Kadi bu mutudi bitabuje Yezu, tudi mu njila wa muoyo, mmumue ne: muoyo wa kashidi. Tudiku tuleja petu dianyisha anu bu muena Samalea anyi?