TSHITUPA 5

Pinganayi kudi “mulami wa mikoko ne mutangidi wa anyima yenu”

Uvuaku pebe ne lutatu lumue anyi ya bungi ya ku idibu batele mu broshire eu anyi? Pikalabi nanku, umanye ne: kuena nkayebe to. Bena mudimu ba Nzambi ba bungi ba lulamatu, nansha ba mu tshikondo tshivuabu bafunda Bible anyi ba lelu, bavua pabu batuilangane ne ntatu ya buena eyi. Bu muvua Yehowa mubambuluishe bua kutantamena ntatu eyi, nansha wewe pebe udi mua kuyitantamena.

Yehowa neikaleku bua kukuambuluisha paudi wenda upingana kudiye

UMANYE ne: Yehowa neikaleku bua kukuambuluisha paudi wenda upingana kudiye. Neakuambuluishe bua kupita bimpe ne ntatu yebe, kujikija tunyinganyinga tuudi natu ku muoyo, ne bua kupeta ditalala dia mu lungenyi ne dia mu muoyo didi difumina ku dikala ne kondo ka muoyo kimpe. Dîba adi, udi mua kudiumvua kabidi ne muoyo wa kuenzela Yehowa mudimu pamue ne bena Kristo nebe bakuabu. Nsombelu webe neikale mufuanangane ne wa bamue bena Kristo ba mu bidimu lukama bua kumpala bavua mupostolo Petelo mufundile ne: “Nuvua bu mikoko, nupambuka; kadi mpindieu, nudi bapingane kudi mulami wa mikoko ne mutangidi wa anyima yenu.”—1 Petelo 2:25.

Kupingana kudi Yehowa ke bualu bua mushinga buudi mua kuenza. Bua tshinyi? Neusankishe mutshima wa Yehowa bikole. (Nsumuinu 27:11) Anu bu muudi mumanye, Yehowa udi ne mutuye udiumvua, nanku bitudi tuenza bidi mua kumusankisha anyi kumunyingalaja. Tshidibi, Yehowa katu utuenzeja bua tuetu kumunanga anyi kumuenzela mudimu to. (Dutelonome 30:19, 20) Mumanyi kampanda wa malu a mu Bible udi wamba ne: “Kakuena muntu udi mua kukangula muoyo webe to, udi ne bua kuwukangula wewe nkayebe.” Tuetu tuenzela Yehowa mudimu ne muoyo wa dinanga, tudi mua kuitaba bua kukangula tshibi tshia muoyo wetu. Tuetu benza nanku, tudi tumupesha dipa dia mushinga mukole, mmumue ne: muoyo wetu mutoke, ne tudi tuenza bua ikale ne disanka dia bungi menemene ku muoyo. Bushuwa, kakuena tshintu nansha tshimue tshitudi mua kufuanyikija ne disanka ditudi tupeta patudi tupesha Yehowa ntendelelu udi mumuakanyine.—Bienzedi 20:35; Buakabuluibua 4:11.

Badi bakidila mu tshisumbu muanetu wa bakaji kampanda uvua mulekele malu a Nzambi ne dinanga dionso

Kabidi paudi utuadijilula ntendelelu webe bu kumpala, majinga ebe a mu nyuma neakumbane. (Matayi 5:3) Mmushindu kayi? Bantu ba pa buloba bujima batu badiebeja ne: ‘Bua tshinyi tudi pa buloba?’ Badi ne nzala ya kumanya mandamuna a nkonko idi itangila tshipatshila tshia muoyo wetu. Bantu badi ne dijinga edi bualu Yehowa uvua mubafuke nadi. Ne uvua mutufuke bua kuikala kudiumvua bimpe patudi tumuenzela mudimu. Bushuwa, disanka ditudi tupeta bua dimanya ne: tudi tutendelela Yehowa bua dinanga kadiena kuambangana nadi.—Musambu 63:1-5.

Ikala mumanye ne: Yehowa mmusue bua upingane kudiye. Mmunyi muudi mua kujadika bualu ebu? Tangila malu aa: bua kufundabu malu adi mu broshire eu mbasambile bikole. Mbakutuadilaye pamuapa kudi mukulu kampanda anyi muena Kristo nebe mukuabu. Pashishe, wewe kumvua muoyo ukusaka bua kumubala ne kuenza malu adimu. Bionso ebi bidi bijadika mudi Yehowa kayi mukupue muoyo. Kadi udi ukusemeja kudiye ne dinanga dionso.—Yone 6:44.

Bidi bitukolesha ku muoyo bua kumanya ne: Yehowa kena upua basadidi bende badi bapambuke muoyo to. Ke tshivua muanetu wa bakaji mukuabu diende Donna mufike ku dijingulula. Udi wamba ne: “Mvua musesuke ku bulelela ku kakese ku kakese, kadi bivua bimfikila bua kuela meji pa tshidi Musambu wa 139:23, 24 wamba tshia ne: ‘Nzambi, utangile munda muanyi, umanye mutshima wanyi. Untete, umanye meji anyi. Umone ne malu mabi adi munda muanyi, undombole mu njila wa tshiendelele.’ Mvua mumanye ne: tshiena wa mu ba pa buloba to, tshitu mene muanji kudiumvua bimpe mu ba pa buloba to; ndi mumanye ne: mvua dijinga ne bulongolodi bua Yehowa. Ngakatuadija kumona ne: Yehowa kavua mundekele to; tshimvua natshi dijinga nnjila wa kualukila kudiye. Mpindieu ndi ne disanka bua mundi mualukile kudiye.”

“Ngakatuadija kumona ne: Yehowa kavua mundekele to; tshimvua natshi dijinga nnjila wa kualukila kudiye”

Dijinga dietu dinene ndia ne: wewe pebe upeta kabidi “disanka dia Yehowa.” (Nehemiya 8:10) Kuakunyingalala musangu nansha umue bua muudi mupingane kudi Yehowa to.

Mandamuna a nkonko ya mua kupingana kudi Yehowa

NDI MUA KUBANGILA PENYI?

Muntu udi ufumina ku disama udi mua kutuadija kuenza malu ende a pa tshibidilu ku kakese ku kakese. Bia muomumue, udi mua kukolesha buena Kristo buebe, wewe wenzaku amue malu makese a mu nyuma dituku dionso. Kuedi meji ne: udi ne bua kuenza malu onso diakamue to. Imue misangu udi mua kubala Bible anyi kumuteleja mukuata mu mêyi bua minite mikese, kulonga umue wa ku mikanda yetu, ne kubala mikanda mu site wetu wa jw.org. Ukebe kabidi bua kubuela mu bisangilu bia tshisumbu ne lukasa luonso. Nangananga, sambila Yehowa ne umulombe diambuluisha. ‘Umupuile ntatu yebe yonso, bualu udi uditatshisha bua bualu buebe.’—1 Petelo 5:7.

Eeva udi wamba ne: “Pangakalekela malu a ntendelelu, mvua nguvua bundu bua bungi bua kusambila. Pangakapeta dikima dia kusambila, mukulu kampanda wa mu tshisumbu tshia pabuipi nanyi wakalua kunkumbula. Wakangambuluisha bua meme kumona ne: Yehowa ki mmundekele to. Mukulu eu wakampesha lungenyi lua kutuadija kubala Bible dituku dionso. Pangakenza bualu ebu, ngakapeta bukole bua kubuela mu bisangilu. Mu kupita kua matuku, meme kutuadijilula kabidi kuyisha. Ndi ne disanka dia bungi bua muvua Yehowa kayi mundekele.”

BENA MU TSHISUMBU NEBANGAKIDILE MUSHINDU KAYI?

Ikala mushindika ne: bena mu tshisumbu nebakuakidile ne dinanga dionso. Kabakukupisha anyi kukulumbuluisha to, kadi nebakuleje mudibu bakunange bikole ne nebenze muabu muonso bua kukukankamija.—Ebelu 10:24, 25.

Javier udi wamba ne: “Bivua bingenza bundu bua kupingana ku Nzubu wa Bukalenge. Mvua ndiebeja muikala balunda banyi mua kummona. Umue wa ku bana betu ba bakaji ukavua mukulakaje ne muenze bidimu 30 mu bulongolodi wakangambila ne: ‘Muanayi, ndi nkujingila dipingana dilenga.’ Bualu ebu buakansankisha bikole ku muoyo. Mvua ndiumvua anu kuetu.”

Marco udi wamba ne: “Ngakaya ku Nzubu wa Bukalenge meme kusomba mu mulongo wa ndekelu bua muntu kammonu to. Kadi, ba bungi bavua bamanye katshia ngatuadija kubuela mu bisangilu pantshivua muana. Bakangakidila ne disanka banjingila difika dilenga, meme kumvua too ne ditalala dia bungi. Mvua anu bu muntu mupingane kumbelu kuabu.”

MMUSHINDU KAYI WANGAMBULUISHA BAKULU?

Bakulu nebakuenzele malu ne bulenga. Nebakuele kalumbandi bua dijinga diebe dia kupingajilula “dinanga diuvua nadi kumpala.” (Buakabuluibua 2:4) Nebakuambuluishe ne dinanga dionso bua kulongolola tshilema kayi tshionso tshiuvua mua kuikala muenze, benza nunku ne “meji a bupole.” (Galatiya 6:1; Nsumuinu 28:13) Bakulu badi mua kulongolola bua muanetu kampanda kukulongesha Dîyi dia Nzambi, pamuapa nulonga mukanda bu mudi: Semene pabuibi ne Yehowa anyi “Nudilame mu dinanga dia Nzambi.” Wikala mushindika ne: bakulu nebakukoleshe ne nebakuambuluishe mu tshidia tshionso tshiudi wela.—Yeshaya 32:1, 2.

Victor udi wamba ne: “Munkatshi mua bidimu 8 bimvua mulekele bulelela, bakulu bavua bende bankeba. Dimue dituku, mukulu kampanda wakandeja imue foto ivuaye mutukuate. Biakamvuluija malu mimpe be, ke meme kutuadija kujinga disanka dimvua nadi pamvua ngenzela Yehowa mudimu. Bakulu bakangambuluisha ne dinanga bua meme kutuadijilula tshibidilu tshianyi tshia kuenza malu a mu nyuma.”

“Neakukoleshe”

Mu mukanda wetu wa misambu wa Tuimbilayi Yehowa misambu, mudi misambu mimpe idi mua kukusankisha ne kukukolesha paudi eku wenda ukolakana mu nyuma. Tuangata tshilejilu tshia musambu wa numero wa 60. Mmuangatshila mu mvese wa 1 Petelo 5:10, ne udi ne tshiena-bualu ne: “Neakukoleshe.”

Kuvua tshivua Nzambi mukubuejile mu munya, mukumbushe mu mîdima.

Wakamona kûdi dijinga diebe dia

kumukeba ne kuenda mu nyuma.

We’ kulaya bua kumusadila.

Neakuambuluishe bulelela.
Yezu kukufuila; Nzambi kumufila,

bualu mmusue bua uye kumpala.

Muvuaye kayi mutuimine Muanende,

n’akupe bukole bua kukola.

Kakupua dinanga diebe muoyo.

Bantu Bende, n’abasambe bonso.

(DIPUNGULUJA)

Muakakusumba Nzambi, yeye mMfumu webe.

Neakujadike, neakukoleshe.

Yeye neakulombole, neakukube.

Ê, n’akujadike; neakukoleshe.

Bua kuteleja mêyi makuata a musambu wa Bukalenge eu ne mikuabu, buela mu MIKANDA > MISAMBU.