Malu adibu baledile mu Mabeji a tshisangilu tshia Nsombelu ne mudimu wetu
LUMINGU LUA DIA 7-13/12
BIUMA BIA MU DÎYI DIA NZAMBI | LEWITIKI 10-11
“Nanga Yehowa kupita muudi munange dîku dienu”
it-1-F 1203
Tshidi katshiyi tshiumvuangana ne mikenji
Kapia ne musenga wa manananshi bivua kabiyi bianyishibue. Muaku wa mu tshiena Ebelu zar anyi zara (udi umvuija tshintu tshitu katshiyi tshia pa tshibidilu) udibu batele mu Lewitiki 10:1, mbawutele bua kuleja ‘kapia kavua kakayi kanyishibue, kavua Nadaba ne Abihu bana ba Alona batemeshe kumpala kua Yehowa, pende [Nzambi] kayi mubatumine dîyi bua kukafila,’ ke yeye kubashipa pende ne kapia. (Lew 10:2; Nom 3:4; 26:61) Panyima pa bualu abu Yehowa wakambila Alona ne: “Kunu mvinyo anyi maluvu makuabu makole, wewe ne bana bebe ba balume badi nebe, panudi nubuela mu ntenta wa kusambakena, bua kanulu kufua. Eu mmukenji mufunda wa kashidi bua bipungu bienu bionso. Mbua kuikale dishilangana pankatshi pa tshintu tshia tshijila ne tshidi katshiyi tshia tshijila, ne pankatshi pa tshintu tshia bukoya ne tshidi tshikezuke, ne bua kulongesha bena Isalele mêyi ne mikandu bionso bidi Yehowa mubambile ku butuangaji bua Mose.” (Lew 10:8-11) Mêyi aa adi asua kumvuija ne: Nadaba ne Abihu bavua pamuapa bakuatshike, ke kupetabu dikamakama dia kulambula kapia kavua kakayi kanyishibue. Kapia aku kavua mua kuikala kakayi kanyishibue bua dîba divuabu bakafile, bua muaba uvuabu bakafidile, anyi bua mushindu uvuabu bakafile; peshi bavua mua kuikala balambule musenga wa manananshi kawuyi muenza ne bintu bidibu batele mu Ekesode 30:34, 35. Nzambi kavua mua kubafuila luse bua tshivuabu benze atshi anu bualu bavua batshienze mu dikuatshika nansha.
Ukadi mubuele mu dikisha dia Nzambi anyi?
16 Alona muanabu ne Mose, uvua mupete lutatu bua tshivua bana bende babidi ba balume benze. Bana bende Nadaba na Abihu bavua bafile mulambu mu mushindu uvua Yehowa kayi wanyisha. Yehowa wakatuma kapia kumbukila mu diulu, kubashipaye. Elabi meji muvuabi mua kuikala bitonde Alona. Kavua kabidi mua kuyukila ne bana bende to, bualu bakavua bafue. Kadi kuvua bualu bukuabu buvua buvuije nsombelu eu mukole menemene bua Alona ne dîku diende. Mose wakambila Alona ne bana bende bakuabu ne: Yehowa kavua musue bua banyingalale to. Mose wakamba ne: “Kanulekeledi nsuki ya ku mitu yenu peshi kanupandi bilamba bienu, bua kanufu ne bua Nzambi kalu kufiikila tshisumbu tshijima munda.” (Lew. 10:1-6) Dilongesha didi ne: dinanga ditudi banange nadi Yehowa didi ne bua kuikala dikole kupita ditudi banange nadi bena mu dîku dietu badi kabayi balamate Yehowa.
Dikeba bubanji bua mu Dîyi dia Nzambi
Tudi ne bua kuikala ba tshijila mu bikadilu bietu bionso
18 Bua kuikala ba tshijila, tudi ne bua kulonga Mifundu minsantu ne ntema yonso ne kuenza malu adi Nzambi utulomba. Ela meji bua Nadaba ne Abihu, bana ba Alona bavuabu bashipe bualu bavua balambule ‘kapia kavua kakayi ka tshijila’ pamuapa pavuabu bakuatshike mvinyo. (Lew. 10:1, 2) Mona tshivua Nzambi muambile Alona pashishe. (Bala Lewitiki 10:8-11.) Mvese eyi idiku ileja ne: katuena ne bua kunua maluvu makole kumpala kua kuya mu bisangilu anyi? Elabi meji bua malu aa: katuena muinshi mua mikenji ya Mose to. (Lomo 10:4) Mu amue matunga, bena Kristo netu batu banua maluvu makole ne nkatshinkatshi padibu badia kumpala kua kuyabu mu bisangilu. Bavua benza mudimu ne makopo a mvinyo mu Pasaka. Pavua Yezu muenze Tshivulukilu, uvua mupeshe bapostolo bende mvinyo uvua tshimfuanyi tshia mashi ende bua kunuabu. (Mat. 26:27) Bible udi ukandika kunua maluvu a bungi ne kukuatshika. (1 Kol. 6:10; 1 Tim. 3:8) Bena Kristo ba bungi badi mua kudiumvua basakibue kudi kondo kabu ka muoyo bua kubenga kunua maluvu makole nansha makese kumpala kua kuenza mudimu kayi wonso wa tshijila. Kadi, nsombelu udi ushilangana bilondeshile ditunga ne ditunga, ne bualu budi ne mushinga bua bena Kristo ‘nkujingulula bintu bia tshijila ne bidi kabiyi bia tshijila’ bua benze malu a tshijila bua kusankisha Nzambi.
it-1-F 124 §6
Nyama
Nyama ivuabu bakandike bua kudia eyi, bavua bayikandike anu bantu bavua benzejibue bua kulonda Mikenji ya Mose, bualu mêyi adi mu Lewitiki 11:8 a ne: “Ki mmikumbane buenu nuenu,” avua atangila bena Isalele. Pakafila Kristo Yezu muoyo wende bu mulambu, mikenji ya Mose yakimana; nanku bionso bivuayi ikandika biakimana pabi, ne bukua bantu buonso buakatuadijilula kudia nyama ya bungi anu muvua Nzambi muanyishile Noa panyima pa Mvula wa kabutu.—Kls 2:13-17; Gen 9:3, 4.
LUMINGU LUA DIA 14-20/12
BIUMA BIA MU DÎYI DIA NZAMBI | LEWITIKI 12-13
“Tshidi mikenji ya disama dia nsudi itulongesha”
Ukadi mupitshile matuku anyi udi wakula bua matuku atshivua alua?
• Diteka babedi wabu muaba.
Mikenji ya Mose ivua ilomba bua kumbusha bena nsudi munkatshi mua bantu, kubateka wabu muaba. Anu pavua bipupu binene bienzeke mu bidimu bia pankatshi pa 500 too ne bia 1 500 panyima pa Yezu ke pavua baminganga bafike ku ditumikila dîyi dinene ditshidibu bangata ne mushinga edi.—Lewitiki, nshapita wa 13 ne wa 14.
Uvua mumanye anyi?
Ku kale bena Yuda bavua batshina nsudi ivua mimanyike tshikondo tshivuabu bafunda Bible atshi. Disama divua dienza buôwa edi divua dikuata tujilu tukese ne dinyanga mubidi ne diwushiya ne bibangu. Kakuvua buanga bumanyike buvua buondapa nsudi to. Kadi bantu bavua disama edi dikuata bavua babateka kule ne bavua ne bua kuambila bakuabu ne: bavua ne disama edi.—Lewitiki 13:45, 46.
it-2-F 128 §2
Nsudi
Ku bilamba ne mu nzubu. Nsudi ivua mua kukuata kabidi ku bilamba bienza ne miosa ya mikoko anyi bia line, peshi ku tshintu tshienza ne tshiseba. Disama divua dijika pavuabu basukula tshilamba anyi tshintu atshi, ne kuvua malu avuabu balongolole bua kuteka tshintu tshia nanku pa nkayatshi. Kadi pavua ditoba dia dikala dia mâyi a matamba a manyimanyi anyi dikunzubile ditungunuka ne kuikala ku tshintu atshi, mmumue ne: disama divua anuku, nanku bavua batshiosha. (Lew 13:47-59) Pavuabu bamona ditoba dia dikala dia mâyi a matamba a manyimanyi anyi dikunzubile ku tshimanu tshia nzubu, muakuidi uvua ukangisha nzubu au bua matuku. Pavuabi bikengela, bavua mua kutula mabue a ku nzubu aku avua makuatshike disama, bavua bamukonesha munda muonso ne baya kuimansha mabue ne bionso bivuabu bakona abi muaba wa bukoya wa pambelu pa tshimenga. Pavua disama dipingana muakuidi uvua wamba ne: nzubu au uvua ne bukoya, ne bavua bamupula, baya kuimansha bivuabu bupule abi muaba wa bukoya; kadi pavuabu bamba ne: disama ndijike, kuvua malu avuabu balongolole bua kukezula nzubu au. (Lew 14:33-57) Kudi bantu badi bamba ne: tshivuabu babikila bu disama dia nsudi ku bilamba anyi ku nzubu atshi ntshivua tshimueneka pavua tshilamba anyi tshimanu tshimuma anyi tshikuata bundundu (tshitapa nsumba); kadi kakuena anu udi mujadike muvuabi menemene to.
Dikeba bubanji bua mu Dîyi dia Nzambi
Malu manene a mu mukanda wa Lewitiki
12:2, 5—Bua tshinyi dilela muana divua dipangisha muntu mukaji ‘buakane’? Mudimu wa bitupa bia lulelu uvua wa kulela bana bapuangane. Kadi bua mpekatu uvuabu bapiane, bantu bavua balela bana bapange bupuangane ne bena mpekatu. Bikondo bîpi bia dipanga ‘buakane’ bivua bifumina ku dilela muana anyi ku malu makuabu bu mudi katshietshie ne diela bilume bivua bivuluija bena Isalele muvuabu bapiane mpekatu. (Lewitiki 15:16-24; Musambu 51:5; Lomo 5:12) Mikenji ivua ilomba bena Isalele bua kudikezula ivua ibambuluisha bua kumvua bua tshinyi bavua dijinga ne mulambu wa tshia-bupikudi bua kubuikidila bantu mpekatu yabu ne kubapingajilula ku bupuangane. Ke muvua mikenji milue ‘ndeji uvua ne bua kubafikisha kudi Kristo.’—Galatia 3:24.
Ukadi mupitshile matuku anyi udi wakula bua matuku atshivua alua?
• Tshikondo tshia kutengudibua.
Mikenji ya Nzambi ivua ileja ne: muana wa balume uvua ne bua kutengudibua dituku dia muanda mukulu dia diledibua diende. (Lewitiki 12:3) Mashi a muana mutoke adi mua kukuatakana mu mushindu mukumbane padiye ukumbaja lumingu lumue. Mu bikondo bivuabu bafunda Bible, kumpala kua malu a londapu kulubulukawu, kuindila lumingu lujima kumpala kua kutengula muana kuvua kukuba muana.
LUMINGU LUA DIA 21-27/12
BIUMA BIA MU DÎYI DIA NZAMBI | LEWITIKI 14-15
“Ntendelelu mukezuke udi utulomba bua kuikala ne mankenda”
it-1-F 258 §1
Diowa mâyi
Bena Isalele bavua bakumbaja mukiya wa diowa mâyi bua malu mashilashilangane. Muntu yonso uvua wondopibua disama dia nsudi, anyi uvua ulenga tshintu tshivua tshilenga kudi muntu uvua “bintu bipatuka,” peshi muntu mulume uvua muele bilume, anyi muntu mukaji uvua ku tshijila anyi ne mashi amupatuka, peshi bantu bavua bangatangana bavua balua “bakoya,” ne bavua ne bua kuowa mâyi. (Lew 14:8, 9; 15:4-27) Muntu yonso uvua mu ntenta muvua tshitalu tshia muntu anyi uvua utshilenga uvua “mukoya,” ne uvua ne bua kuowa mâyi bua kudikezula. Muntu uvua ubenga kutumikila mukenji au bavua “ne bua kumbusha muntu au mu tshisumbu, bualu mmunyange muaba munsantu wa Yehowa.” (Nom 19:20) Ke bualu kayi bakalua kutuadija kuakula bua diowa mâyi bua kuleja mudi muntu udi uwowa au mukezuke kumpala kua Yehowa. (Mis 26:6; 73:13; Yes 1:16; Yhz 16:9) Dîyi dia Yehowa ndifuanyikija padi ne mâyi, nunku kuowa mâyi aa kudi paku kukezula bantu.—Ef 5:26.
it-2-F 753 §5
Tshijila tshia mukaji
Muntu mukaji uvua ulua mukoya tshikondo tshionso tshivua mashi amupatuka dîba divuaye kayi ku tshijila, anyi pavua mashi amupatuka “matuku a bungi kupita bungi bua matuku atuwu apatuka padiye ku tshijila tshia mashi,” tshiotshi tshikondo atshi, muntu yonso uvua umulenga uvua ulua pende mukoya, nansha bintu bivuaye uladila anyi usombela. Pavua dipatuka dia mashi adi dijika, uvua ubala matuku muanda mutekete, pashishe ulua mukezuke. Dituku dia muanda mukulu, mukaji au uvua uya ne tumanda nkutshi tubidi anyi bana ba nkudimba babidi kudi muakuidi bua bamubuikidile mpekatu; muakuidi uvua ulambula Yehowa umue wa ku nyunyi ayi bu mulambu wa mpekatu, mukuabu bu mulambu wa kuosha.—Lew 15:19-30; tangila MUKEZUKE, BUKEZUKE.
it-2-F 141 §7
Muaba wa tshijila
2. Ntenta wa kusambakena ne pashishe ntemepelo. Lupangu lujima lua ntenta wa tshitendelelu ne lua ntempelo, pamue ne mbanza yabi, bivua muaba wa tshijila. (Eks 38:24; 2Ku 29:5; Bz 21:28) Bintu binene bivua mu lubanza ntshioshelu tshia milambu ne dilongo dinene dia mâyi dia tshiamu tshia mitaku. Bintu abi bivua bia tshijila. Anu bantu bavua benza mukiya wa kudikezula ke bavua mua kubuela mu lubanza lua ntenta wa tshitendelelu dîba dionso; bia muomumue, muntu kavua mua kubuela mu mbanza ya ntempelo pende muikale mukoya to. Tshilejilu, muntu mukaji uvua kayi mukezuke kavua mua kulenga tshintu tshia tshijila anyi kubuela muaba wa tshijila nansha. (Lew 12:2-4) Bidi bimueneka kabidi ne: pavua bukoya butungunuka ne kuikala mu tshitudilu tshia bena Isalele, bavua bangata bualu abu bu kunyanga ntenta wa tshitendelelu. (Lew 15:31) Bantu bavua balua ne milambu bua babakezule ku disama dia nsudi bavua bimanyina pa bule, ntanta ne tshiibi tshia ku lubanza. (Lew 14:11) Muntu uvua ne bukoya kavua mua kudia bintu bia mulambu wa diumvuangana pamue ne bakuabu ku ntenta wa tshitendelelu anyi ku ntempelo nansha, tshianana uvua ufua.—Lew 7:20, 21.
Dikeba bubanji bua mu Dîyi dia Nzambi
it-2-F 453 §5
Ditshi
Pavuabu babanjija buakuidi bua mu Isalele, Nzambi wakambila Mose bua angate ndambu wa mashi a tshimpanga tshia mukoko tshia dibanjijibua bua kualaba Alona ne bana bende ku lusongo lua ditshi lua ku dia balume, ne ku biala biabu bia ku bianza ne bia ku makasa bia ku dia balume, bua kuleja ne: malu avuabu ne bua kuteleja, mudimu uvuabu ne bua kuenza, ne mushindu uvuabu ne bua kuenda, bivua ne bua kumvuangana ne mudimu wabu wa buakuidi. (Lew 8:22-24) Mikenji ivua yamba kabidi bua muena nsudi uvua disama diende dijika ne: muakuidi uvua ne bua kumulaba mashi a tshimpanga tshia mukoko tshivuabu bafila bu mulambu wa dipila ku lusongo lua ditshi diende dia ku dia balume, umulabaku kabidi mafuta avuabu bawulambula nawu. (Lew 14:14, 17, 25, 28) Kuvua kabidi mukenji mufuanangane ne wowu eu, uvua utangila muntu uvua musue kutungunuka ne kuikala mupika wa mfumuende bua kashidi. Bavua baya ne mupika au ku dibaya dia ku tshiibi, ne mfumuende uvua umutubula ditshi ne tshintu tshia kutubula natshi masoso. Tshimanyinu tshienza ku ditshi atshi tshivua tshileja ne: mupika au uvua musue kutungunuka ne kuteleja mfumuende ne kumutumikila.—Eks 21:5, 6.
g-F 1/06 14, kazubu
Bulenga bua nsumba ne bubi buayi
IVUA MIMANYIKE PAVUABU BAFUNDA BIBLE ANYI?
Bible udi wakula bua “disama dia nsudi ku nzubu,” mmumue ne: mu nzubu wetu muena dîna eu. (Lewitiki 14:34-48) Kudi bantu badi bamba ne: tshintu tshivuabu babikila kabidi bu “disama dia nsudi idi itampakana” atshi tshivua mushindu kampanda uvua bimanu bimuma anyi bikuata bundundu (bitapa nsumba); kadi kakuena anu udi mujadike muvuabi menemene to. Nansha biobi nanku anyi kabiyi nanku, mikenji ya Nzambi ivua ilomba muena nzubu au bua kumbusha mabue avua ne bubedi, kukona ku bimanu munda mua nzubu mujima, ne kuya kuimansha bintu bivuabu bumbushe abi pambelu pa tshimenga “muaba wa bukoya.” Pavua disama dialukila, nzubu yonso mujima uvua ulua mukoya; bavua bamupula baya kuimansha bionso bivuabu bupule abi. Mikenji ya Yehowa ivua itangila kalu ne kalu eyi idi ileja muvuaye munange bantu bende bikole ne musue bua bikale ne makanda a mubidi.
LUMINGU LUA DIA 28/12–3/1
BIUMA BIA MU DÎYI DIA NZAMBI | LEWITIKI 16-17
“Mudi dituku dia dibuikidila dia mpekatu dikutangila”
Malu adi mukanda wa Lewitiki mua kutulongesha
4 Bala Lewitiki 16:12, 13. Mona muvua malu enzeka mu Dituku dia Dibuikila dia mpekatu: Muakuidi munene udi ubuela mu ntenta wa tshitendelelu. Eu mmusangu wa kumpala wa ku misangu isatu idiye ne bua kubuela Muaba Mutambe Tshijila dituku adi. Tshianza tshiende tshimue tshidi ne tshintu tshidiye muwuje ne musenga wa manananshi wa mupuya muimpe, tshikuabu ntshikuate tshintu tshia or tshia kuambuila kapia tshiuwule tente ne makala a kapia. Udi wanji wimana kumpala kua tshilamba tshidi tshijike Muaba Mutambe Tshijila. Udi ubuelamu ne kanemu konso, wimana kumpala kua mushete wa tshipungidi. Mu ngumvuilu wa mu tshimfuanyi, mmuimane kumpala menemene kua Yehowa Nzambi! Mpindieu udi wela musenga wa manananshi a tshijila au mu makala a kapia bimpe bimpe, dipembu dimpe dikuatakana muaba wonso au. Udi ulua kubuelamu kabidi ne mashi a milambu ya mpekatu. Mona ne: udi wanji ufuimisha musenga wa manananshi kumpala kua kulambulaye mashi a milambu ya mpekatu.
Malu adi mukanda wa Lewitiki mua kutulongesha
5 Difuimisha musenga wa manananshi Dituku dia Dibuikila dia mpekatu didi mua kutulongesha tshinyi? Bible udi uleja ne: masambila mimpe adi batendeledi ba Yehowa ba lulamatu benza adi bu musenga wa manananshi. (Mis. 141:2; Buak. 5:8) Vuluka ne: pavua muakuidi munene ubuela ne musenga wa manananshi kumpala kua Yehowa, uvua ne kanemu ka bungi. Bia muomumue, patudi tusemena kudi Yehowa mu disambila, tudi tusemena kudiye ne kanemu kakole. Tudi tumutshina bikole. Tudi ne dianyisha dia bungi bua mudi Mufuki wa diulu ne buloba utuanyishila bua kusemena kudiye ne kudia nende bulunda, anu mutu muana ne tatuende. (Yak. 4:8) Mmusue bua tuikale balunda bende! (Mis. 25:14) Dianyisha ditudi nadi bua diakalenga edi ndia bungi be! Didi ditusaka bua kubenga kumuela mâyi ku makasa nansha musangu umue.
Malu adi mukanda wa Lewitiki mua kutulongesha
6 Vuluka ne: muakuidi munene uvua ne bua kufuimisha musenga wa manananshi kumpala kua kufilaye milambu. Pavuaye wenza nanku, bivua bimujadikila ne: Nzambi uvua ne bua kumuanyisha pavuaye ufila milambu. Bidi bitulongesha tshinyi? Pavua Yezu pa buloba, uvua ne bua kuenza bualu bua mushinga kumpala kua kulambulaye muoyo wende. Bualu abu buvua ne mushinga wa bungi kupita kusungila bukua bantu. Mbualu kayi abu? Uvua ne bua kushala ne muoyo mutoke ne kulamata Yehowa bua kushishaye kuitaba mulambu wende. Pavua Yezu wenza nanku, uvua uleja ne: kuenza malu mudi Yehowa musue ke bualu budi bukengela kuenza. Yezu uvua kabidi ubingisha bumfumu bua Tatuende anyi mushindu wende wa kulombola, peshi uleja ne: mbuimpe ne mbujalame.
Dikeba bubanji bua mu Dîyi dia Nzambi
it-1-F 242 §3
Azazele
Anu muakalua mupostolo Paulo kumvuija, pakalambula Yezu muoyo wende wa buntu mupuangane bua mpekatu ya bukua bantu, wakenza bualu bunene bikole kupita tshivua “mashi a ngombe milume ne a mbuji” enza. (Eb 10:4, 11, 12) Pakawulambulaye, wakalua anu bu “mbuji udi ujimina,” ‘kuambulaye mabedi etu,’ mmumue ne: ‘kumutubulabu bua dishipa dietu dia mikenji.’ (Yes 53:4, 5; Mat 8:17; 1Pt 2:24) ‘Wakambula’ mpekatu ya bantu bonso badi baleja ditabuja mu mulambu wende wa mushinga mukole. Wakaleja ne: Nzambi uvua mulongolole malu bua kupua mpekatu muoyo bua kashidi. Nunku, mbuji “bua Azazele” udi uleja mulambu wa Yezu Kristo.
Bua tshinyi tudi ne bua kuikala ba tshijila?
10 Bala Lewitiki 17:10. Yehowa wakambila bena Isalele bua kabadi “mashi” kayi onso. Kulekela mashi, a nyama peshi a muntu, mmukenji udi muelela kabidi bena Kristo. (Bien. 15:28, 29) Tudi tuepuka meji onso adi mua kufikisha Nzambi ku ‘diumbusha matshi ende kutudi’ ne ku ditumbusha mu tshisumbu tshiende. Tudi bamunange ne tudi basue kumutumikila. Nansha patudi tupetangana ne nsombelu mikole, tudi tudienzeja bua kubenga kuenza tshidibu batulomba kudi bantu badi kabayi bamanye Yehowa ne badi kabayi baditatshisha bua kumutumikila. Eyowa, tudi tuitaba bua batupuekeshe milongo bua mutudi balekele mashi, kadi tusungula bua kutumikila Nzambi. (Yuda 17, 18) Ntshinyi tshidi mua kutukolesha mu tshilumbu etshi bua ‘kudisuika ne muoyo umue’ bua kubenga kudia mashi anyi kuitaba bua batuelawu?—Dut. 12:23, NWT.