Diakama lutatu lua bulamatshi ku mikenji
“Vualayi bumuntu bupiabupia buakafukibua bilondeshile disua dia Nzambi mu buakane ne bulamatshi ku mikenji bilelela.”—EFESO 4:24, NW.
1. Bua tshinyi tudi ne dibanza dia kuleja Yehowa Nzambi bulamatshi?
DIAKAMA lutatu lua bulamatshi ku mikenji didi ne bitupa bia bungi. Tshidi ne mushinga kupita bionso nkuakama lutatu lua bulamatshi kudi Yehowa Nzambi. Bushuwa, pa kutangila tshidi Yehowa ne tshidiye mutuenzele, ne bua diditshipa dietu kudiye, tudi ne dibanza dia kumuleja bulamatshi. Mmunyi mutudi tuleja bulamatshi kudi Yehowa Nzambi? Mushindu munene mpa kuikala ne bulamatshi ku mêyi-maludiki a buakane a Yehowa.
2, 3. Ndiumvuangana kayi didi pankatshi pa bulamatshi ku mikenji ne buakane?
2 Bua kuakama lutatu alu, tudi ne bua kulonda mêyi adi asanganyibua mu 1 Petelo 1:15, 16 (NW): “Mu buobumue ne Munsantu wakanubikila, nuenu bine vuayi penu bansantu mu nsombelu wenu mujima, bualu mbifundibue ne: ‘Nudi ne bua kuikala bansantu, bualu ndi munsantu.’” Bulamatshi kudi Yehowa Nzambi nebutusake ku dimutumikila misangu yonso, pa kuvuija ngenyi, mêyi, ne bienzedi bietu mu diumvuangana ne disua diende dinsantu. Bidi biumvuija kulama kuondo kimpe ka muoyo, anu bu mudibu batutumine dîyi mu 1 Timote 1:3-5 (NW) ne: “Bushuwa tshipatshila tshia dîyi-dituma edi [dia kuepuka kulongesha malongesha mabengangane anyi kuteya ntema ku mianu ya dishima] ndinanga disonsola kudi mutshima mukezuke ne kuondo kimpe ka muoyo ne ditabuja dikena buena-mpala ibidi.” Bushuwa, nansha umue wa kutudi ki mmupuangane, kadi tudi ne bua kuenza muetu muonso mua kuenza, ki mmuomu anyi?
3 Bulamatshi kudi Yehowa nebutukande ku ditupa ne budinangi buonso ku mêyi-maludiki a buakane. Bushuwa, bulamatshi ku mikenji nebutukande ku dikala tshintu kampanda munda ne tshikuabu pambelu. Bulamatshi ku mikenji ke tshivua mufundi wa misambu natshi mu lungenyi pakimbaye ne: “Undongeshe njila webe, ô Yehowa. Nengende mu bulelela buebe. Usangishe mutshima wanyi bua kutshina dîna diebe.” (Musambu wa 86:11, NW) Bulamatshi ku mikenji budi bulomba tshidi tshiumvuijibue bimpe bu “ditumikila tshikena tshibambidika.”
4, 5. Bulamatshi ku mikenji nebutukande ku dienza tshintu kayi tshibi?
4 Bulamatshi kudi Yehowa Nzambi nebutukande kabidi ku dienza tshintu kampanda tshidi mua kufuisha dîna diende ne Bukalenge buende bundu. Tshilejilu, bena nkristo babidi bakapetangana ne difuilakana dikole, e kufikabu too ne ku difundangana ku kabadi ka bena buloba ebu. Nzuji wakebeja ne: ‘Nudi bonso Bantemu ba Yehowa anyi?’ Kakuyi mpata bivua bikole bua kukumbanaye mua kumvua tshivuabu benza ku kabadi. Mbundu kayipu buvuabi! Bulamatshi kudi Yehowa Nzambi buvua mua kusaka bana betu aba ku dilonda mubelu wa mupostolo Paulo: “Bulelela, kuikala ne bilumbu munkatshi muenu kudi kujadika dipangila dienu dikumbane. Bua tshinyi kanuena nuitabuja bua banuenzele bibi? Bua tshinyi kanuena nulekela bua kunuibabo?” (1 Kolinto 6:7, Muanda Mulenga Lelu) Bushuwa, njila wa bulamatshi kudi Yehowa Nzambi udi wa muntu kukenga bua dijimija pamutu pa kufuisha Yehowa ne bulongolodi buende bundu.
5 Bulamatshi kudi Yehowa Nzambi budi kabidi bukonga kubenga kushiila buôwa bua bantu muaba. ‘Patshina muntu bakuabu, bualu ebu budi buteyi kudiye, kadi udi weyemena Yehowa neapanduke.’ (Nsumuinu 29:25) Nunku, katuena tutupa ku mikenji patudi mpala ne mpala ne dikenga, kadi tudi tulonda tshilejilu tshifila kudi Bantemu ba Yehowa mu Union Soviétique wa kale, mu Malawi, mu Ethiopie, ne mu matunga makuabu a bungi.
6. Bulamatshi ku mikenji nebutukande ku didia bulunda ne banganyi?
6 Bituikala ne bulamatshi kudi Yehowa Nzambi, netuepuke kudia bulunda ne bena lukuna bende bonso. Ke bualu kayi muyidi Yakobo wakafunda ne: ‘Nuenu, bena masandi kanuena bamanye ne: bulunda ne bena buloba budi ne Nzambi lukuna, anyi? Nunku muntu yonso wasua kuikala mulunda wa bena buloba, udi udivuija muena lukuna kudi Nzambi.’ (Yakobo 4:4) Tudi basue bua kuikala ne bulamatshi ku mikenji buakaleja Mukalenge Davidi pakambaye ne: “Tshiena nkina badi bakukina menemene anyi, Ô Yehowa, Ne tshiena ngumvua muengu bua badi bakutombokela anyi? Ndi mbakina ne lukinu lujima. Mbavue bena lukuna banyi ba bushuwa.” (Musambu wa 139:21, 22, NW) Katuena basue kudia bulunda ne benji ba mpekatu ku bukole, bualu katuena ne tshintu nansha tshimue tshidi tshituteka nabu mu buobumue. Bulamatshi kudi Nzambi kabuakutukandaku ku didia bulunda ne bena lukuna ba Yehowa ba mushindu’eu, bobu bine peshi ku butuangaji bua televizion anyi?
Dibingisha dia Yehowa
7. Bulamatshi ku mikenji nebutuambuluishe bua kuenza tshinyi pa bidi bitangila Yehowa, ne mmunyi muakenza Elihu nunku?
7 Bulamatshi ku mikenji nebutusake ku dibingisha Yehowa Nzambi. Ntshilejilu bulengapu kayi tshituleja kudi Elihu! Yobo 32:2, 3 udi utulondela ne: ‘Pashishe tshiji tshia Elihu . . . tshiakatema. Tshiakatemena Yobo, bualu bua yeye wakadibingisha, kakabingisha Nzambi. Tshiji tshiende tshiakatemena balunda bende basatu kabidi, bualu bua bobo kabakamona mêyi a kukudimuna n’au Yobo, kadi bakapisha [Nzambi, NW].’ Mu Yobo nshapita wa 32 too ne ku wa 37, Elihu udi ubingisha Yehowa. Tshilejilu, wakamba ne: ‘Anji kungindila tshitupa bua meme mmanye mua kukuleja manga malu; bualu bua ndi ne mêyi makuabo a kuamba bua kubingisha nawu Nzambi. . . . Nennuleje ne: Mufuki wanyi udi ne buakane. . . . Kêna umbusha mêsu ende kudi bantu bakane.’—Yobo 36:2-7.
8. Bua tshinyi bidi bikengela bua tuetu kubingisha Yehowa?
8 Bua tshinyi bidi bikengela bua kubingisha Yehowa? Lelu’eu, Nzambi wetu Yehowa udi upetudibua mu mishindu kabukabu. Batu bamba ne: katuku, ne: udi tshitupa tshia Busatu kampanda, ne: udi ukengesha bantu bua tshiendelele mu inferno wa kapia, ne: udi ne lujoko luonso uteta bua kukudimuna buloba bujima mutshima, ne se: kêna uditatshisha bua bukua-bantu, ne bikuabu kabidi. Tudi tuleja bulamatshi buetu kudiye pa kumubingisha ne kufila bujadiki se: Yehowa udiku; ne: udi Nzambi wa meji, muakane, wa bukole buonso, ne muena dinanga; ne: udi ne tshikondo bua tshintu kayi tshionso; ne se: palua tshikondo tshiende tshijadika, neatuishe bubi buonso ku tshibungubungu ne kuvuija buloba bujima mparadizu. (Muambi 3:1) Ebi bidi bilomba bua tubabidile mushindu wonso bua kufila bumanyishi budi butangila dîna ne Bukalenge bia Yehowa.
Bulamatshi ku bulongolodi bua Yehowa
9. Mpa mianda kayi padi bamue baleje dipanga diabu dia bulamatshi ku mikenji?
9 Tudi mpindieu tufika ku bualu bua bulamatshi ku bulongolodi bua Yehowa budi bumueneka. Bushuwa, tudi ne dibanza dia kubuleja bulamatshi, pa kukonga ne “mupika wa lulamatu ne wa budimu,” údí ku butuangaji buende tshisumbu tshia bena nkristo tshidiishibua mu nyuma. (Matayo 24:45-47, NW) Fuanyikija ne: bualu kampanda budi bupatuka mu mikanda ya Watch Tower butudi katuyi tumvua anyi tuitaba dîba adi. Netuenze tshinyi? Kufiika munda ne kumbuka mu bulongolodi anyi? Ke tshiakenza bamue kukaadi bidimu bivule, pakatumika Tshibumba tshia Nsentedi ne tshiovo tshipiatshipia bua Milenyume. Bakuabu bakasuyibua bua tshivua Tshibumba tshia Nsentedi tshiambe musangu kampanda pa bualu bua ndubidilu. Bu aba bakalenduka bua malu aa balame bulamatshi ku bulongolodi ne kudi bana babu, bavua mua kuindila Yehowa bua kutokeshaye malu aa, ke tshiakenzaye mu tshikondo tshiende tshijadika. Nunku, bulamatshi ku mikenji budi bukonga kuindila ne lutulu too ne padi diumvuija dia pa mutu dipatudibua kudi mupika wa lulamatu ne wa budimu.
10. Bulamatshi ku mikenji nebutukande ku dikala ne dijinga dia kumanya bivule pa tshinyi?
10 Bulamatshi ku bulongolodi bua Yehowa bùdì bumueneka budi kabidi bumvuija kubenga kushemesha malanda ne batontolodi. Bena nkristo balamatshi ku mikenji nebepuke bua kuikala ne dijinga dia kumanya bivule pa bidi bantu ba mushindu’eu bamba. Bushuwa, aba badi Yehowa Nzambi utumika nabu bua kulombola mudimu wende pa buloba kabena bapuangane. Kadi ntshinyi tshidi Dîyi dia Nzambi ditulomba bua kuenza? Kumbuka mu bulongolodi bua Nzambi? Tòo. Disuangana dia buena-muntu didi ne bua kutuenzeja bua tulame bulamatshi kudibu, ne tudi ne bua kutungunuka ne ‘kunangangana mu mitshima yetu bikole.’—1 Petelo 1:22.
Bulamatshi kudi bakulu balamatshi ku mikenji
11. Bulamatshi ku mikenji nebutuambuluishe bua kuepuka ngelelu kayi mubi wa meji?
11 Padi bualu kampanda butudi tumvua ne lutatu buambibua anyi buenjibua mu tshisumbu, bulamatshi ku mikenji nebutukande ku dijana ne nebutuambuluishe bua kudima mmuenenu wa se: pamu’apa mbualu budi bukengela busunguluji. Kabienaku bitambe buimpe bua kushindamena pa ngikadilu mimpe ya bakulu bateka ne bena kuitabuja netu pamutu pa kushindamena pa ntupakanyi yabu anyi? Eyowa, tudi ne bua kudikanda ku ngelelu mubi wa meji wa mushindu’eu, bualu mmusuikakaja ku dipanga bulamatshi ku mikenji! Bulamatshi ku mikenji nebutuambuluishe kabidi bua kutumikila mubelu wa Paulo wa ‘kubenga kuakula mêyi mabi bua muntu.’—Tito 3:1, 2.
12, 13. Nntatu kayi ya pa buayi idi bakulu ne bua kuakama?
12 Bulamatshi ku mikenji budi ne ntatu ya pa buayi kudi bakulu. Lumue lua ku ntatu eyi mbualu bua malu masokoka. Muena mu tshisumbu kampanda udi mua kukuatshila mukulu kansanga bualu. Bulamatshi kudi muntu eu nebukande mukulu ku ditupa ku dîyi-diludiki dia malu masokoka. Nealonde mubelu udi mu Nsumuinu 25:9 wa se: “Kusokolodi bualu busokoka bua munga muntu.” Ebi bidi biumvuija kuepuka kubusokoluela nansha mukajende muine!
13 Bakulu badi kabidi ne mateta makuabu a bulamatshi ku mikenji a kuakama. Nebikale basankishi ba bantu, peshi nebambuluishe ne bukitu ne bupole aba badi bakengela dilongamijibua, nansha bikalabu balela ba mashi amue peshi balunda ba pa muoyo anyi? Bulamatshi ku bulongolodi bua Yehowa nebusake ba kutudi badi bakulu bua kuteta mua kuambuluisha muntu kayi yonso udi ukengela diambuluisha dia mu nyuma. (Galatia 6:1, 2) Nansha mutualeja kalolo, bulamatshi ku mikenji nebutuenzeje bua kuleja bululame kudi mukulu netu, anu bu muakakula mupostolo Paulo kudi mupostolo Petelo ne bululame. (Galatia 2:11-14) Ku luseke lukuabu, batangidi badi ne bua kudimuka, padibu benza malu mabule meji anyi baleja kansungasunga anyi batumika mu mushindu kampanda bibi ne bumfumu buabu, badi bavuija kuikala ne bulamatshi ku bulongolodi bua Nzambi kukole bua aba badi muinshi mua butangidi buabu.—Filipoi 4:5.
14, 15. Mmalu kayi adi mua kuteka bulamatshi ku mikenji bua bena tshisumbu mu diteta?
14 Kudi bitupa bikuabu bia bualu bua diakama lutatu lua bulamatshi kudi tshisumbu ne kudi bakulu batshi. Bikalaku mu mushindu kampanda nsombelu mikodiakane mu tshisumbu, ebi bidi bipetesha mushindu wa kuleja bulamatshi kudi Yehowa ne kudi aba badi baleja mpala wende. (Tangila Tshibumba tshia Nsentedi tshia mu dia 15 Kabalashipu 1987, mabeji 15-17 [mu Mfualanse].) Padiku kuenzeke dipatshibua, bulamatshi ku mikenji budi bulomba se: tutue bakulu nyama ku mikolo, katuyi tuteta bua kutshinka tshiakabidi né kuvua tubingila tukumbane bua kuangata dipangadika edi.
15 Bulamatshi ku mikenji budi kabidi bulomba bua tuetu kutua bisangilu bionso bitanu bia ku lumingu nyama ku mikolo bilondeshile nsombelu wetu ne bukokeshi buetu. Bulamatshi ku mikenji budi bulomba ki ng’anu bua kumubuela pa tshibidilu kadi bua kubilongolola kabidi ne kufila mumvuija miibaki padiku mushindu.—Ebelu 10:24, 25.
Bulamatshi mu dibaka
16, 17. Nntatu kayi misuikakaja ku bulamatshi ku mikenji idi bena nkristo babake ne bua kuakama?
16 Tudi kabidi ne dibanza dia kuleja bulamatshi kudi nganyi? Bituikala babake, mu diumvuangana ne mitshipu yetu ya dibaka, tudi ne bua kuakama lutatu lua dikala ne bulamatshi kudi muena dibaka netu. Bulamatshi kudi muena dibaka netu nebutukande ku dienza tshilema tshia kutamba kuleja kalolo kudi bakaji peshi balume bakuabu kupita kudi mukajetu anyi bayetu nkayetu. Bulamatshi kudi muena dibaka netu budi kabidi bulomba bua katusokolodi kudi bantu ba pambelu matekete anyi ntupakanyi bia muena dibaka netu. Mbipepele bitambe bua kudiabakena kudi bakuabu kupita kuenza madikolela bua kulama njila ya diumvuangana ne muena dibaka netu miunzulula, tshitudi ne bua kuenza mu diumvuangana ne Mukenji wa Tshishiki. (Matayo 7:12) Bushuwa, nsombelu wa dibaka udi ne lutatu lulelela bua bulamatshi ku mikenji buetu bua Buena-nkristo.
17 Bua kuakama lutatu elu lua bulamatshi ku mikenji, tudi ne bua kuepuka ki ng’anu dipia tshibawu tshinene tshia dienda masandi kadi tudi kabidi ne bua kukanda ngenyi yetu ne mutshima wetu. (Musambu wa 19:14) Tshilejilu, bikala mitshima yetu midingianganyi mikale ne lukuka bua masanka ne milowo, mbipepele menemene bua kuanyina kuetu kukudimukaku kuzukila. Pa kukankamija bulamatshi mu dibaka, Mukalenge Solomo udi ubela balume mu ngakuilu wa mu tshimfuanyi bua ‘banue mâyi a mu tshina tshiabu nkayabu.’ (Nsumuinu 5:15) Ne Yezu wakamba ne: “Muntu yonso udi utungunuka ne kutangila mukaji too ne ku dimujinga, mmumane kuenda nende masandi mu mutshima muende.” (Matayo 5:28, NW) Balume badi badiine ne kasuki mu dibandila bindidimbi bia bandumba butaka badi mu njiwu ya dilobeshibua bua kuenda masandi, nunku badi badinga bakaji babu ne bapanga bulamatshi kudibu. Bua kabingila kamue kamue aku, mukaji udi mudiine ne kasuki mu dibandila dia programe idi izangika mpampakenu minekesha misuikakaja ku malu a dienda masandi udi mua kutetshibua ne kulua kupanga bulamatshi kudi bayende. Pabi, pa kuikala ne bulamatshi bulelela kudi muena dibaka netu, tudi tukolesha tshisuikidi tshia dibaka, ne tudi tuambuluishangana umue ne mukuabu mu madikolela etu bua kusankisha Yehowa Nzambi.
Malu adi ambuluisha bua kushala ne bulamatshi
18. Ndianyisha dia tshinyi diatuambuluisha bua kuikala ne bulamatshi ku mikenji?
18 Ntshinyi tshiatuambuluisha bua kuakama lutatu lua bulamatshi ku mikenji mu nsombelu eyi inayi: bulamatshi kudi Yehowa, kudi bulongolodi buende, kudi tshisumbu, ne kudi muena dibaka netu? Diambuluisha dimue nkuanyisha ne: kuakama lutatu lua bulamatshi ku mikenji nkusuikakaja bikole ku dibingishibua dia bumfumu butambe bunene bua Yehowa. Ee, pa kushala ne bulamatshi ku mikenji tudi tuleja ne: tudi tuangata Yehowa bu Mfumu mutambe bunene wa bukua-bifukibua. Nunku tudi mua kuikala ne didinemeka ne ditekemena dia muoyo wa kashidi mu bulongolodi bupiabupia bua Yehowa. Tudi mua kudiambuluisha tuetu bine bua kushala ne bulamatshi ku mikenji pa kukonkonona bilejilu bilenga bia bulamatshi ku mikenji, kumbukila ku tshia Yehowa too ne ku bia aba badi batedibue mu Bible ne mu mikanda ya Watch Tower, pa kusangisha ne miyuki ya mu Annuaire.
19. Mmuaba kayi udi nawu ditabuja mu dikala dietu ne bulamatshi ku mikenji?
19 Ditabuja dikole kudi Yehowa Nzambi ne ditshina dia kupanga kumusankisha nebituambuluishe bua kuakama lutatu lua bulamatshi ku mikenji. Tudi tukolesha ditabuja dietu kudi Nzambi ne dimutshina dietu pa kulonga ne disuminyina Dîyi dia Nzambi ne pa kudifila mu mudimu wa Buena-nkristo. Ebi nebituambuluishe bua kuenza malu mu diumvuangana ne mubelu wa Paulo mufunda mu Efeso 4:23, 24 (NW): “Nudi ne bua kuvuijibua bapiabapia mu bukole budi bukokesha tshieledi tshienu tshia lungenyi ne nudi ne bua kuvuala bumuntu bupiabupia buakafukibua bilondeshile disua dia Nzambi mu buakane ne bulamatshi ku mikenji bilelela.”
20. Ku mutu kua bionso, nngikadilu kayi watuambuluisha bua kuikala ne bulamatshi kudi Yehowa ne kudi bakuabu bonso batudi ne bua kufuta dibanza dia bulamatshi ku mikenji?
20 Dianyisha dia ngikadilu ya Yehowa didi dituambuluisha bua kuikala ne bulamatshi ku mikenji. Ku mutu kua bionso, dinanga dikena budinangi bua Tatu wetu wa mu diulu ne dianyisha bua bionso bidiye mutuenzele, kumunanga ne mutshima ne anyima ne tshieledi tshia lungenyi ne bukole bietu bionso nebituambuluishe bua kuikala ne bulamatshi kudiye. Kupita apu, dikala ne dinanga divua Yezu muambe ne: nedisunguluje balondi bende nedituambuluishe bua kuikala ne bulamatshi kudi bena nkristo bonso mu tshisumbu ne mu dîku dietu. Mu mêyi makuabu, bidi bushuwa bualu budi bumvuija kuikala ne budinangi peshi kubenga kuikala ne budinangi. Kupanga bulamatshi ku mikenji kudi kumvuija kuikala mudinangi. Bulamatshi ku mikenji budi bumvuija kubenga budinangi.—Mâko 12:30, 31; Yone 13:34, 35.
21. Mmunyi mudi muanda wa diakama lutatu lua bulamatshi ku mikenji mua kuambibua mu mêyi makese?
21 Mu mêyi makese: Bulamatshi ku mikenji nngikadilu mutambe buimpe muleja kudi Yehowa Nzambi, kudi Yezu Kristo, ne kudi basadidi bonso balelela ba Yehowa. Bua kuikala ne malanda mimpe ne Yehowa Nzambi, tudi ne bua kuakama lutatu lua bulamatshi kudiye pa kukumbaja malu malomba ende a buakane, pa kubenga kudia bulunda ne bena lukuna bende, ne pa kubingisha Yehowa mu difila bumanyishi mu mushindu mulongolola ne ukena mulongolola. Tudi kabidi ne bua kuakama lutatu lua dikala ne bulamatshi ku bulongolodi bua Yehowa budi bumueneka. Tudi ne bua kuikala ne bulamatshi kudi bisumbu bietu ne kuikala ne bulamatshi kudi bena dibaka netu. Pa kutshimuna lutatu lua bulamatshi ku mikenji, netuikale ne tshietu tshitupa mu dibingisha dia bumfumu butambe bunene bua Yehowa, ne netuditeke ku luseke luende mu tshilumbu etshi. Nunku netupete dianyisha diende ne kupeta difutu dia muoyo wa kashidi. Tshiakamba mupostolo Paulo bua budiambiki kudi Nzambi tshidi kabidi mua kuambibua bua diakama lutatu lua bulamatshi ku mikenji. Bidi ne dikuatshisha bua muoyo wa mpindieu ne bua utshilualua.—Musambu wa 18:25; 1 Timote 4:8.
Mmunyi muwandamuna?
◻ Mmu mishindu kayi mutudi mua kuakama lutatu lua bulamatshi kudi Nzambi?
◻ Ntshinyi tshidi bulamatshi ku bulongolodi bua Yehowa butulomba?
◻ Mmunyi mudi bakulu mua kuakama lutatu lua bulamatshi ku mikenji?
◻ Ndutatu kayi ludi lutangila bulamatshi ku mikenji ludi bena nkristo babake ne bua kuakama?
◻ Nngikadilu kayi yatuambuluisha bua kuakama lutatu lua bulamatshi ku mikenji?
[Tshimfuanyi mu dibeji 17]
Bulamatshi kudi bena mu tshisumbu nebukande bakulu ku disokolola malu masokoka
[Bimfuanyi mu dibeji 18]
Bulamatshi kudi muena dibaka budi bukolesha tshisuikidi tshia dibaka