MUA KUBANGA KUYUKILA NE MUNTU
DILONGESHA 3
Muoyo mulenga
Dîyi dia kulonda: “Dinanga didi . . . ne bulenga.”—1 Kol. 13:4.
Tshivua Yezu muenze
1. Tangila FILME, anyi bala Yone 9:1-7. Pashishe welangane meji a nkonko idi ilonda eyi:
Tshivua Yezu muenze kumpala ntshia kuondopa mpofu au anyi ntshia kumuyisha lumu luimpe?—Tangila Yone 9:35-38.
Bua tshinyi tudi mua kuamba ne: kuya ne malu nanku kuvua kutambe buimpe?
Dilongesha
2. Muntu yeye mumone ne: tudi tumutabalela, mmufuane kuteleja mukenji wetu bimpe.
Idikija Yezu
3. Diteka pa muaba wa muntu. Teta kudifuanyikijila mudiye umvua.
Diebeja ne: ‘Mbualu kayi budi mua kuikala bumutatshisha? Ntshinyi tshidiye mua kumona bu tshidi mua kumuambuluisha anyi kumusankisha?’ Kuenza nunku nekukuambuluishe bua kuenzela muntu malu ne bulenga ne muoyo mujima.
Teleja muntu bua kuleja ne: udi wangata malu adi amutonda ne mushinga. Yeye mukuambile mudiye umona bualu kampanda anyi mukukuatshile lutatu ludiye nalu, kushintuludi tshiena-bualu to.
4. Akula bimpe ne kanemu. Paudi umvuila muntu luse anyi ujinga kumuambuluisha bushuwa, nebimuenekele mu ngakuilu webe. Sungula mêyi mimpe ne tshiona tshimpe tshia dîyi, wepuke kuamba malu adi mua kunyingalaja muntu.
5. Ambuluisha muntu. Keba bikondo bikumbane biudi mua kupesha muntu diambuluisha didi dikengedibua. Kuenzela muntu malu mimpe kudi mua kufikisha ku diyukila nende.