Semena pabuipi ne Nzambi
Tatu wa bana ba nshiya
‘MU MUABA wende wa tshijila mudiye mushikame mudi Nzambi, Tatu wa bana ba nshiya.’ (Musambu 68:5) Mêyi au mafundisha ku nyuma adi atupesha dilongesha dinene pa bidi bitangila Yehowa Nzambi dia ne: mmumone majinga a badi bakenga. Mushindu udiye utabalela bana badi bafuishe muledi wabu, mmumuenekele mu mukenji uvuaye muelela bena Isalele. Tukonkononayi mêyi a kumpala adi Bible wamba bua “bana ba nshiya,” adi mu Ekesode 22:22-24.
Nzambi udi udimuija ne: ‘Kanukengeshi bana ba nshiya.’ (Mvese 22) Kavua ulomba bua bambuluishe bana aba bu muvuabu bafuishe baledi babu to; kadi tshivua mmukenji muela kudi Nzambi. Muana uvua mufuishe tatuende kavua ne muntu uvua mua kumukuba nansha kumupesha bivuaye nabi dijinga to, bavua mua kumukengesha. Muntu nansha umue kavua ne bua ‘kukengesha’ muana wa nunku mu mushindu kampanda anyi kansanga to. Mu imue Bible mbakudimune muaku ‘kukengesha’ ne: ‘kuenzela malu mabi,’ ‘kukisa’ anyi ‘kunyanga.’ Kuenzela muana wa nshiya malu mabi kuvua ntshilumbu tshinene ku mêsu kua Nzambi. Tshilumbu tshivua tshikolele pa tshinyi?
Mukenji udi utungunuka nunku: ‘Biwabakengesha ne biadilabu kundi, meme nengumvuile muadi wabu.’ (Mvese 23) Bualu ebu budi bumbuka ku bungi mu mvese wa 22 bamba ne: “kanukengeshi,” baye batangile nabu ku bumue mu mvese wa 23 ne: “biwabakengesha.” Muntu pa nkayende ne tshisamba tshijima bavua ne bujitu bua kutumikila mukenji wa Nzambi eu. Yehowa uvua utangila ne utuma matshi ende kudi bana ba nshiya, muikale pabuipi bua kuandamuna ku miadi yabu.—Musambu 10:14; Nsumuinu 23:10, 11.
Ntshinyi tshidi mua kuenzekela muntu udi wenzela muana wa nshiya malu mabi adi mua kufikisha muana eu ku dididila Nzambi? Yehowa udi wamba ne: ‘Tshiji tshianyi netshitambe bukole, nennushipe ne muele wa mvita.’ (Mvese 24) Mukanda kampanda udi umvuija Bible udi wamba ne: mêyi aa “mu kabujima kawu adi ne: ‘diûlu dianyi nediteme mudilu’ ne tshiji, mu ngakuilu wa tshikulumpe udi uleja tshiji tshikole.” Tangila ne: Yehowa kavua mupeshe balumbuluishi ba mu Isalele bukenji bua kukolesha mukenji eu to. Bualu yeye nkayende ke uvua mua kulumbuluisha muntu yonso uvua mua kuenzela muana wa nshiya bibi.—Dutelonome 10:17, 18.
Yehowa ki mushintuluke nansha. (Malaki 3:6) Udi umvuila bana badi bafuishe muledi anyi baledi bonso babidi luse lua bungi. (Yakobo 1:27) Katupu muoyo ne: tshiji tshiakane tshitu tshijuka Tatu wa bana ba nshiya padibu babanyanga anyi babakengesha. Bantu badi mua kukeba bua kuenzela muana udi kayi ne mukuatshishi bibi, kabakupanda ku “tshiji tshikole tshia Yehowa” nansha. (Sefanya 2:2) Bantu babi ba nunku nebafike ku diumvua ne: ‘mbualu bua buowa bua kupona mu bianza bia Nzambi udi ne muoyo.’—Ebelu 10:31.