Malu adibu baledile mu Mabeji a tshisangilu tshia Nsombelu ne mudimu wetu
© 2024 Watch Tower Bible and Tract Society of Pennsylvania
LUMINGU LUA DIA 2-8/9
BIUMA BIA MU DÎYI DIA NZAMBI MISAMBU 79-81
Nanga dîna dia Yehowa dia butumbi
Tshia kupikula natshi bantu ‘Ndipa dipuangane’ dia kudi Tatu
5 Mmunyi mutudi mua kuleja ne: tudi banange dîna dia Yehowa? Nku bikadilu bietu. Yehowa udi utulomba bua tuikale ba tshijila. (Bala 1 Petelo 1:15, 16.) Bidi biumvuija ne: tudi ne bua kumutendelela anu yeye nkayende ne kumutumikila ne muoyo mujima. Nansha padibu batuluisha, tudi tuenza muetu muonso bua kuenza malu mu mushindu udi Yehowa utulongesha. Patudi tutumikila mikenji ya Yehowa, tudi tutumbisha dîna diende. (Matayi 5:14-16) Tudi tuleja ne: mikenji yende mmimpe, kadi Satana yeye mmuena dishima. Katuena bapuangane to, nanku netuenze anu bilema. Kadi patudi tuenza bilema, tudi tunyingalala ne tuenza muetu muonso bua kubenga kuenza malu adi apendeshisha dîna dia Yehowa.—Misambu 79:9.
ijwbv-F 3 §4-5
Lomo 10:13—‘Ikala ubila dîna dia Mukalenge’
Mu Bible, tshiambilu ‘kubila dîna dia Yehowa’ tshidi tshiumvuija malu a bungi kupita kumanya dîna dia Nzambi ne kuditela patupu mu ntendelelu wetu. (Misambu 116:12-14) Tshiambilu etshi tshidi tshiumvuija kabidi kueyemena Nzambi ne kukeba diambuluisha diende.—Misambu 20:7; 99:6.
Yezu uvua wangata dîna dia Nzambi ne mushinga wa bungi. Monayi miaku ya ntuadijilu ya mu disambila dia tshilejilu divuaye mulongeshe: “Tatu wetu udi mu diulu, dîna diebe dijidibue” anyi badiangate ne: ndinsantu. (Matayi 6:9) Wakumvuija kabidi ne: bua kupeta muoyo wa tshiendelele, tudi ne bua kulonga mua kumanya tshidi muena dîna edi, kumutumikila ne kumunanga.—Yone 17:3, 6, 26.
Bubanji bua mu Dîyi dia Nzambi
it-2-F 53 §3-4
Jozefe
Mudi dîna dia Jozefe dimanyike bikole. Bu muvua Jozefe ne mushinga wa bungi mu bana ba Yakoba, bivua bikumbane bua dîna diende kumvuija pamuapa bisa bionso bia Isalele (Mis. 80:1), anyi bisa bivua ne bua kuenza bukalenge bua ku nord. (Mis. 78:67; Amo. 5:6, 15; 6:6) Dîna dia Jozefe didi kabidi mu mêyi a buprofete a mu Bible. Mu tshikena kumona tshivua Yehezekele mumone, bumpianyi bua Jozefe budi bitupa bibidi. (Yeh. 47:13) Tshimue tshia ku biibi bia tshimenga tshidibu babikila ne: “Yehowa udimu,” tshidi ne dîna dia Jozefe. (Yeh. 48:32, 35) Pa bidi bitangila disangisha bantu ba Yehowa, badi baleja Jozefe bu mfumu wa tshitupa tshia tshisamba tshia Isalele ne Yuda bu mfumu wa tshitupa tshikuabu. (Yeh. 37:15-26) Dîyi dia buprofete dia Obadaya divua dileja ne: “Nzubu wa Jozefe” neenze mudimu wa dibutula “nzubu wa Esau.” (Oba. 18) Dîyi dia buprofete dia Zekâya diakaleja ne: Yehowa neasungile “nzubu wa Jozefe.” (Zek. 10:6.) Jozefe ke udi mu bisa bia Isalele wa mu nyuma kadi ki Efelayima to.—Buak. 7:8.
Padi dîna dia Jozefe difunda mu Buakabuluibua 7:8, bidi bitufikisha ku diela meji ne: dîyi dia buprofete divua Yakoba muambe pakavuaye ukuula muoyo mu bulalu didi ditangila Isalele wa mu nyuma. Nunku, mbia mushinga bua kumona ne: Yehowa Nzambi, Wa bukole wa Yakoba, wakafila Kristo Yezu bu Mulami muimpe uvua mufile muoyo wende bua “mikoko.” (Yone 10:11-16) Kristo Yezu udi kabidi dibue dia mu ditumba dia tshishimikidi didibu bibakile ntempelo wa Nzambi udi muenza ne bena Isalele wa mu nyuma. (Ef. 2:20-22; 1 Pet. 2:4-6) Bualu bukuabu, Mulami eu anyi Dibue edi, didi ne Nzambi Wa Bukole Buonso.—Yone 1:1-3; Bien. 7:56; Eb. 10:12; fuanyikija ne Gen. 49:24, 25.
LUMINGU LUA DIA 9-15/9
BIUMA BIA MU DÎYI DIA NZAMBI MISAMBU 82-84
Anyisha diakalenga diudi nadi
Malongesha atudi tupetela kudi nyunyi ya muulu
Bena mu Yelushalema bavua bamanye bimpe tundindi, tuvua ne tshibidilu tshia kuenza masua atu mu mbalanda ya nzubu. Tumue tuvua tuenze masua atu mu ntempelo wa Solomo. Bidi bimueneka ne: tundindi tuvua tuenza masua atu mu lupangu lua ntempelo tshidimu tshionso, tuvua tumona muaba eu muikale muaba wa bukubi, uvuatu mua kukolesha bana batu kakuyi lutatu.
Mufundi wa Musambu wa 84, tuambe ne: umue wa ku bana ba Kola uvua wenza mudimu ku ntempelo lumingu lumue payima pa ngondo isambombo, wakamona masua au mu lupangu lua ntempelo. Uvua musue kuikala bu kandindi kadi kasombele anu mu nzubu wa Yehowa bua kashidi. Wakakema wakamba ne: ‘Yehowa wa misumba, ke mudi muaba webe uudi mushikame mulengele nunku! Mutshima wanyi udi ujinga, e, udi mupange ne dijinga dia biendedi bia mu tshitendelelu tshia Yehowa. E, mushamusha wakudisanganyina nzubu, ne kandindi kakadisanganyina disua dia kutekamu bana baku; bidi pepi ne bioshelu biebe, Yehowa wa misumba, Mukelenge wanyi ne Nzambi wanyi.’ (Misambu 84:1-3) Tuetu ne bana betu tutuku tuleja dijinga dia muomumue ne tuleja dianyisha dîba dionso bua kudisangisha ne bantu ba Nzambi anyi?—Musambu 26:8, 12.
Enza malu audi mua kukokesha bua wikale ne disanka
Bukulakaje anyi disama didi mua kutupangisha bua kuenzela Yehowa mudimu mutudi basue. Biwikala muledi, udi mua kumona bu ne: udi ne dîba dikese dia kudilongela anyi kubuela mu bisangilu bualu bana badi bakuangata dîba dia bungi ne bukole. Kadi wewe utamba kuimanyina anu pa malu audi kuyi mua kuenza, kuakumona malu audi mua kuenza to.
Kukadi bidimu bia bungi, muena Lewi mukuabu wakaleja dijinga kampanda divuaye kayi mua kukumbaja to. Uvua ne diakalenga dia kuenza mudimu ku ntempelo mbingu ibidi ku tshidimu. Kadi yeye uvua ujinga bua kuikala ku ntempelo matuku onso. (Mus. 84:1-3) Ntshinyi tshivua tshimuambuluishe bua kuikala ne disanka? Wakamona ne: nansha dituku dimue mu lubanza lua ntempelo divua diakalenga dia pa buadi. (Mus. 84:4, 5, 10) Bia muomumue, pamutu pa kuimanyina pa malu atudi katuyi mua kuenza tudi ne bua kumona malu atudi mua kuenza ne kuanyisha.
Yehowa Nzambi webe udi ukuangata ne mushinga!
12 Biwikala usama, ikala mutuishibue ne: Yehowa mmumanye ne: udi usama. Mulomba diambuluisha bua wikale umona nsombelu webe mu mushindu muimpe. Pashishe ikala ubala Bible bua kupeta mêyi mimpe adi Yehowa mukulaminamu. Imanyina pa mvese idi ileja mudi Yehowa wangata batendeledi bende ne mushinga. Wewe wenza nanku, neumone ne: Yehowa udi wenzela bantu badi bamuenzela mudimu ne lulamatu malu mimpe.—Mis. 84:11..
Bubanji bua mu Dîyi dia Nzambi
it-2-F 459
Bana badi bafuishe batatuabu
Bu muvuabi bipepele bua kubenga kutabalela bantu badi ne tunyinganyinga, kabayi ne wa kubakuila, Yehowa wakatela tshiambilu “bana badi bafuishe batatuabu” bua kuleja bimanyinu bivua bileja buakane anyi dipanga buakane dia Isalele. Pavua tshisamba tshia Isalele tshitendelela Yehowa bimpe, bantu bavua benzela bana ba nshiya malu mimpe. Kadi pavua bantu kabayi benza malu ne buakane, bavua balengulula bana ba nshiya abu, ne tshivua tshimanyinu tshia dikuluka dia tshisamba. (Mis. 82:3; 94:6; Yesh. 1:17, 23; Yel. 7:5-7; 22:3; Yeh. 22:7; Zek. 7:9-11; Mal. 3:5) Yehowa uvua unyoka bantu bavua bakengesha bana ba nshiya. (Dut. 27:19; Yesh. 10:1, 2) Yehowa udi udileja bu Mubakuidi (Nsu. 23:10, 11), Mubambuluishi (Mis. 10:14), ne Tatu (Mis. 68:5) wabu. Yeye ke udi ubalumbuluila (Dut. 10:17, 18), ubumvuila luse (Hosh. 14:3), ubambuluisha (Mis. 146:9), ne ubalama ne muoyo.—Yel. 49:11.
Kutabalela bakaji bakamba ne bana ba nshiya ntshimue tshia ku bimanyinu bia pa buabi bia bena Kristo balelela. Muyidi Yakobo wakafundila bena Kristo ne: “Ntendelelu udi mukezuke ne kayi munyanguke ku mêsu kua Nzambi wetu ne Tatu udi nunku: kutangila bana ba nshiya ne bakaji bakamba mu makenga abu, ne kudilama katuyi katoba ka malu a panu.”—Yak. 1:27.
LUMINGU LUA DIA 16-22/9
BIUMA BIA MU DÎYI DIA NZAMBI MISAMBU 85-87
Disambila didi dituambuluisha bua kunanukila
Utuku umuenesha butumbi bua Yehowa anyi?
10 Tuetu basue kumuenesha butumbi bua Nzambi, tudi kabidi ne bua ‘kunanukila mu kutendelela.’ (Lomo 12:12) Tudi ne bua kusambila bua Yehowa atuambuluishe bua tumuenzele mudimu mu mushindu udiye wanyisha. Nanku, tudi ne bua kumulomba nyuma muimpe, ditabuja dikole, bukole bua kutantamena mateta ne mushindu wa ‘kuludikila bantu njila mululame mu dîyi dia Nzambi dia bushuwa.’ (2 Tim. 2:15; Mat. 6:13; Luka 11:13; 17:5) Anu mutu muana weyemena tatuende mu malu onso, ke mutudi petu ne bua kueyemena Yehowa Tatuetu wa mu diulu. Tuetu bamulombe bua atuambuluishe bua kumuenzela mudimu bikole, tudi ne bua kuikala bashindike ne: neatuambuluishe. Katuena mua kuela meji ne: tudi tumutatshisha to. Kadi patudi tusambila tudi ne bua kumutumbisha, kumuela tuasakidila, kukeba bua atulombole nangananga patudi mu ntatu ne kumulomba bua atuambuluishe bua tumuenzele mudimu mu mushindu udi utumbisha dîna diende dinsantu.—Mus. 86:12; Yak. 1:5-7.
Mutu Yehowa wandamuna masambila etu
17 Bala Misambu 86:6, 7. Davidi, muimbi wa misambu uvua mutuishibue ne: Yehowa uvua uteleja masambila ende ne uandamuna. Ikala mutuishibue pebe nanku. Bilejilu bitudi bakuile mu tshiena-bualu etshi bidi bitujadikila ne: Yehowa udi mua kutupesha meji ne bukole bitudi tukengela bua kunanukila. Udi mua kusaka bena Kristo netu anyi mene bantu badi kabayi banji kuikala batendeledi bende bua kutuambuluisha mu mishindu kampanda.
18 Padi Yehowa kayi wandamuna masambila etu mu mushindu utudi batekemene, tudi bamanye ne: neaandamune anu. Neatupeshe tshitudi tukengela, utupeshatshi pa dîba ditudi natshi dijinga menemene. Nunku ikalayi nusambila batuishibue ne: Yehowa neanutabalele mpindieu ne ‘neakumbaje dijinga dia tshintu tshionso tshidi ne muoyo.’—Mis. 145:16.
Bubanji bua mu Dîyi dia Nzambi
it-1-F 492 §2
Muoyo
Mua kuenza mudimu ne “muoyo umue.” Bua muoyo wetu muena dîna eu kuenza mudimu mudibi bikengela, mbimpe wikale mujima, kadi wa mu tshimfuanyi badi mua kuwupandulula. Davidi wakasambila wamba ne: “Vuija muoyo wanyi muoyo umue bua ntshine dîna diebe,” mêyi adi umvuija ne: tudi mua kuikala ne muoyo mupanduluke bua mutudi tudiumvua ne bua ditshina ditudi nadi. (Mis. 86:11) Muntu wa mushindu eu udi mua kuikala ne “muoyo mukuatshidile”, mbuena kuamba ne: utendelela Nzambi ne tshiuyuya. (Mis. 119:113; Buak. 3:16) Muntu udi mua kuikala kabidi ne “mioyo ibidi” (ku muaku ku muaku: “ne muoyo ne muoyo”), padiye ujinga kuenzela bamfumu babidi mudimu anyi padiye wamba bualu bubi mu mushindu muimpe eku wela meji ku malu makuabu. (1 Kul. 12:33; Mis. 12:2, dim) Yezu wakela patoke lubombo lua bantu badi ne mioyo ibidi kayi udia tshibanga to.—Mat. 15:7, 8.
LUMINGU LUA DIA 23-29/9
BIUMA BIA MU DÎYI DIA NZAMBI MISAMBU 88-89
Bukokeshi bua Yehowa mbutambe buimpe
Lamata bumfumu bua Yehowa!
5 Ela meji bua bualu bukuabu budi buenza bua Yehowa ikale ne bukenji bua kukokesha. Udi wenza mudimu ne bukokeshi buende mushindu muakane menemene. Udi utuambila ne: ‘Meme Yehowa ngudi wenzeja luse ne kulumbulula kuimpe ne buakane pa buloba. Bualu ndi nsanka ne malu aa.’ (Yel. 9:24) Yehowa kena dijinga ne mikenji ya bantu bua imuambuluishe bua kusungula tshidi tshimpe to. Kadi udi wela mikenji ya tshidi tshimpe. Yehowa wakapesha bantu mikenji mimanyine pa buakane buende bupuangane. Mufundi wa Misambu mukuabu udi wamba ne: ‘Buakane ne kulumbulula kuakane bidi tshishimikidi tshia nkuasa webe wa butumbi.’ Nunku mukenji wonso, dîyi dinene dionso, ne dipangadika dionso dia kudi Yehowa ndiakane. (Mis. 89:14; 119:128) Satana udi wamba ne: Yehowa ki Mmukokeshi muakane to. Kadi Satana muine kena mua kufikisha buakane pa buloba to.
Lamata bumfumu bua Yehowa!
10 Bukokeshi bua Yehowa ki mbua tshikisu to. Kadi bantu badi bamutumikila badi badiumvua ne budikadidi ne badi ne disanka. (2 Kol. 3:17) Davidi wakamba bua Yehowa ne: ‘Butumbi ne bunême bidi kumpala kuende; bukole ne disanka bidi mu tshitendelelu tshiende.’ (1 Kul. 16:7, 27) Mufundi wa Misambu Etana wakafunda ne: ‘Disanka didi kudi bantu badi bamanye tshiona tshia badi basanka. Yehowa, badi benda biabu mu munya wa pa mpala pebe. Badi basanka mu dîna diebe dinda too ne ku dilolo, ne bua buakane buebe badi batumbishibue.’—Mis. 89:15, 16.
11 Patudi tuelela buimpe bua Yehowa meji bikole, tudi tutuishibua bikole ne: bukokeshi buende ke butambe buimpe. Tudi tudiumvua bu mufundi wa Misambu wakamba bua Nzambi ne: ‘Dituku dimue mu biendedi bia mu tshitendelelu tshiebe didi dipita matuku tshinunu a kukuabu buimpe.’ (Mis. 84:10) Yehowa uvua mutuenze ne mutufuke, nanku mmumanye bimpe menemene tshiatupetesha disanka. Udi utupesha kupita ne bitudi nabi dijinga. Bualu buonso budi Yehowa utulomba bua kuenza budi bua diakalenga dietu. Nansha biobi bitulomba bua kudipangisha amue malu, netuikale anu ne disanka tuetu tutumikila Yehowa.—Bala Yeshaya 48:17.
Ikala ne ditabuja dikole bua Bukalenge
14 Tukonkonone tshivua Yehowa mulaye Davidi, mukalenge wa mu Isalele wa kale ku diambuluisha dia tshipungidi tshia Davidi. (Bala 2 Samuele 7:12, 16.) Yehowa wakadia tshipungidi etshi ne Davidi pavuaye ukokesha mu Yelushalema, kumulayaye ne: Masiya uvua ne bua kupatukila mu ndelanganyi yende. (Luka 1:30-33) Nunku, Yehowa wakaleja malu makuabu masunguluke bua mulongolongo wa mêku muvua Masiya ne bua kupatukila. Yehowa wakamba ne: muntu wa mu ndelanganyi ya Davidi eu uvua ne bua kuikala “muakanangane” bua kulua Mukalenge wa Bukalenge bua Masiya. (Yeh. 21:25-27) Ku diambuluisha dia Yezu, bukalenge bua Davidi ‘nebujadikibue tshiendelele.’ Bushuwa, kankanunuina ka Davidi ‘nekashale kashidi, nkuasa waku wa bukalenge neikalaku bu mudi dîba.’ (Mus. 89:34-37) Eyowa, bukokeshi bua Masiya kabuakunyanguka nansha kakese, malu enzabu neashalaku kashidi.
Bubanji bua mu Dîyi dia Nzambi
“Wewe nkayebe ke udi muena lulamatu”
4 Mu mikanda ivuabu bafunde mu tshiena Ebelu, “lulamatu” mbulenga budi bulamata ku tshintu kampanda ne dinanga dionso too ne padi tshipatshila tshidi tshitangila tshintu atshi tshikumbana. Kuikala ne lulamatu nkupite kuikala muntu wa kueyemenyibua. Muntu udi mua kuikala wa kueyemenyibua anu bualu mmuenzejibue bua kuenza bualu kampanda. Kadi lulamatu ludi lufumina ku dinanga. Pashishe kabidi, badi mua kuamba mudi bintu bidi kabiyi ne muoyo bikale bia kueyemenyibua. Tshilejilu, mufundi wa misambu wakamba bua ngondo ne: “Mumanyi wa mu diulu udi mujalame [anyi “udi wa kueyemenyibua,” NW].” (Musambu 89:37) Kadi kabena mua kuamba bua ngondo ne: udi ne lulamatu to. Bua tshinyi? Bualu lulamatu ludi lufumina ku dinanga, ne bintu bidi kabiyi ne muoyo kabiena mua kuleja dinanga to.
5 Mushindu udibu bakula bua lulamatu mu Bible udi uleja ne: nngikadilu wa musangelu. Ngikadilu eu udi uleja ne: kudi malanda pankatshi pa muntu udi ne lulamatu ne muntu udibu baluleja. Lulamatu lua mushindu eu lutuku kashidi. Kaluena bu mavuala a mbuu adi lupepele lutuma eku ne eku to. Kadi lulamatu (anyi dinanga dia lulamatu) ndushindame ne ludi ne bukole bua kutantamena ntatu mikole.
LUMINGU LUA DIA 30/9–6/10
BIUMA BIA MU DÎYI DIA NZAMBI MISAMBU 90-91
Eyemena Yehowa bua ulepeshe matuku a muoyo webe
Diditatshisha bua kulepesha matuku a muoyo
Bena sianse bonso kabena bitaba ne: ngondapilu ya diluisha bukulakaja idi mua kulepesha matuku a muoyo wa muntu kupita pa adiye mua kuenza lelu to. Bulelela, matuku a muoyo wa muntu mmavule bikole katshia ku bidimu bia 1800. Bidi nanku nangananga padi muntu udilama ne mankenda, udikuba ku tuishi tudi tukebesha masama, ne wangata manga adi epula ku masama ne makuabu adi wondopa masama a bungi. Bamue bena sianse, badi balonga mudi ngikadilu ya baledi yambulukila bana, badi bamona ne: matuku a muoyo wa muntu akadi mafikile ku ndekelu kua bungi bua atu mamanyike pa tshibidilu.
Kukadi bidimu bitue ku 3 500, Mose mufundi wa Bible wakamba ne: “Bule bua muoyo wetu mbua bidimu 70, anyi 80 pikala muntu ne bukole bua bungi. Kadi mbiuwule tente ne ntatu ne tunyinganyinga; bidi bipita lubilu, ne tudi tubuuka tuya.” (Misambu 90:10) Nansha mudi muntu udienzeja bikole bua kulepesha bule bua muoyo wende, malu adi anu muvua Mose mumvuije amu.
Ku lukuabu luseke, imue nyama idi mua kulala bidimu nkama ya bungi, ne mitshi mikuabu bu mudi baobab idi yenza bidimu binunu bia bungi. Patudi tufuanyikija bule bua muoyo wa muntu ne wa bintu ebi ne wa bikuabu bidi ne muoyo, katuenaku tudiebeja ne: ‘Muoyo wa bidimu 70 anyi 80 utudi nawu eu ke wonso udiku anyi?’
wp19.1 5, kazubu
Dîna dia Nzambi nnganyi?
Elu ndukonko lutu bantu ba bungi badiela. Pamuapa wewe pebe ukadi mudielalu. Tudi mua kuluela kabidi nunku: Biobi ne: Nzambi ke udi mufuke diulu ne buloba ne bionso bidiku, kadi yeye mmufumine penyi?
Pa tshibidilu, bena malu a sianse batu bitaba ne: diulu ne buloba bidi ne ntuadijilu. Dilongesha dia nshindamenu edi didi diumvuangana ne mvese wa kumpala wa mu Bible udi wamba ne: “Ku tshibangidilu Nzambi wakafuka diulu ne buloba.”—Genese 1:1.
Diulu ne buloba kabivua mua kuikala bidifuke nkayabi to; kabivua mua kuikala bidiluile to. Padiku kakuyi tshintu, kabena mua kuenza tshintu tshikuabu to. Biobi ne: kakuvua tshintu kumpala kua ntuadijilu wa diulu ne buloba, kakuvua mua kuikala diulu ne buloba lelu to. Kadi bidi mua kuikala bikole bua tuetu kumvua bimpe menemene ne: kutu muntu wa kale utu anu koku utu kayi umueneka uvua muenze bua diulu ne buloba bikalaku. Yehowa Nzambi, muntu udi ne mubidi wa nyuma udi ne bukole budi kabuyi ne mikalu ne udi ne meji, ke Muntu wa kale au.—Yone 4:24.
Bible udi wamba bua Nzambi ne: “Kumpala kua mikuna kuledibua anyi kua wewe kupatula buloba pamue ne maloba adi amenesha bintu, katshia ku bikondo bia tshiendelele too ne ku bikondo bia tshiendelele, wewe udi Nzambi.” (Misambu 90:2) Nunku Nzambi ke utu anuku. Kuenzabi ne: afuke diulu ne buloba “ku tshibangidilu.”—Buakabuluibua 4:11.
Mudi dinanga dituambuluisha bua kutshimuna buôwa
16 Satana mmumanye ne: tudi basue kuikala ne muoyo. Kadi udi wamba mutudi mua kufila tshionso tshitudi natshi anyi mutudi mua kushipa tòo ne bulunda buetu ne Yehowa bua tuikale anu ne muoyo eu. (Yobo 2:4, 5) Satana udi ushima! Kadi bu mudibi ne: “udi ne mushindu wa kukebesha lufu,” udi ubuelela pa ditshina dia lufu ditutu nadi bua kutufikisha ku dilekela Yehowa. (Eb. 2:14, 15) Mu imue nsombelu, bantu ba Satana batu bafuna bua kushipa batendeledi ba Yehowa bua mudibu kabayi balekela ditabuja diabu. Mu nsombelu mikuabu, Satana udi mua kubuelela pa disama didi diamba kuya netu bua tunyange ditabuja dietu. Baminganga ne bena mu mêku etu badi mua kutuenzeja bua tuitabe batuele mashi, pabi tuetu bitabe, tudi tushipa mukenji wa Nzambi. Muntu mukuabu pende udi mua kukeba bua kutuitabijija buanga budi bubengangana ne mêyi manene a mu Bible.
17 Nansha mutudi katuyi basue kufua, tudi bamanye ne: nansha tuetu ne bua kufua, Yehowa kakulekela kutunanga to. (Bala Lomo 8:37-39.) Padi balunda ba Yehowa bafua, udi ushala mubalame mu meji ende, bienze anu bu ne: badi ne muoyo. (Luka 20:37, 38) Udi ne dijinga dikole dia kubabisha ku lufu. (Yobo 14:15) Yehowa mmufute tshintu tshia mushinga mukole bua ‘tupete . . . muoyo wa tshiendelele.’ (Yone 3:16) Tudi bamanye ne: Yehowa mmutunange ne udi ututabalela bikole. Nunku pamutu pa kulekela Yehowa patudi tusama anyi patudi tukeba kufua, tudi tumulomba busambi, meji, ne bukole. Ke tshivua Valérie ne bayende benze menemene.—Mis. 41:3.
Bubanji bua mu Dîyi dia Nzambi
Udi ne muanjelu udi ukulama anyi?
Bible kena ulongesha ne: muntu yonso udi ne muanjelu udi umulama to. Bulelela, Yezu wakamba musangu mukuabu ne: “Nudimuke bua kanupetudi umue wa ku bana bakese aba [bayidi ba Kristo], bualu ndi nnuambila ne: banjelu babu badi mu diulu badi bamona mpala wa Tatu wanyi udi mu diulu misangu yonso.” (Matayi 18:10) Yezu kavua usua kuamba ne: muntu yonso udi ne muanjelu udi umulama to. Kadi uvua usua kuamba ne: banjelu badi batabalela muyidi wende yonso bikole. Ke bualu kayi batendeledi balelela kabatu baditeka mu njiwu patupu, bela meji ne: banjelu ba Nzambi nebabakube to.
Bidiku biumvuija ne: banjelu kabatu bambuluisha bantu anyi? Tòo. (Misambu 91:11) Kudi bantu badi bitaba ne muoyo mujima ne: Nzambi udi utuma banjelu bua kubalama ne kubalombola. Kenneth, utudi batele mu tshiena-bualu tshia kumpala, udi pende ne meji a mushindu eu. Nansha mutudi katuyi mua kushidisha malu, udi mua kuikala wambilamu. Misangu ya bungi, Bantemu ba Yehowa batu bamona bijadiki bidi bileja mudi banjelu babambuluisha mu mudimu wabu wa diyisha. Kadi bu mudi banjelu kabayi bamueneka, katuena mua kuamba ne bujalame bonso mudi Nzambi wenza nabu mudimu bua kuambuluisha bantu mu nsombelu mishilashilangane to. Nansha nanku, katuena tuenza bibi patudi tuela Wa Bukole Buonso tuasakidila bua diambuluisha dionso didiye mua kuikala mutupeteshe.—Kolosayi 3:15; Yakobo 1:17, 18.
LUMINGU LUA DIA 7-13/10
BIUMA BIA MU DÎYI DIA NZAMBI MISAMBU 92-95
Kuenzela Yehowa mudimu ke bualu butambe buimpe mu nsombelu wetu!
Nuenu bansonga, nudi nudifila bua kukumbaja bipatshila bia mu nyuma anyi?
5 Kuleja Yehowa dianyisha bua mudiye mutunange ne bua malu adiye mutuenzele ke bualu bua kumpala budi butusaka bua kudifundila bipatshila bia mu nyuma. Mufundi wa misambu wakamba ne: “Mbimpe bua kusakidila Yehowa . . . Bualu wewe, Yehowa, udi munsankishe bua bienzedi biebe; bua midimu ya bianza biebe, ndi ngela mbila ne disanka.” (Mis. 92:1, 4) Bu muudi nsonga, ela meji bua malu adi Yehowa mukuenzele aa: mmukupeshe muoyo, ditabuja, Bible, tshisumbu, ne ditekemena dimpe bua matuku atshilualua. Kuteka malu a mu nyuma pa muaba wa kumpala kudi kuleja muudi ne dianyisha bua bintu bidi Yehowa mukupeshe ebi, ne kuenza nunku nekukusemeje pabuipi nende.
Nnganyi utu ufumba ngelelu webe wa meji?
8 Yehowa udi bu muledi muimpe, mmusue bua bana bende bikale ne nsombelu muimpe menemene. (Yesh. 48:17, 18) Nunku mmutupeshe mêyi manene a nshindamenu adi atuambuluisha bua kuikala ne bikadilu bimpe ne mushindu wa kuenzela bakuabu malu. Mu malu a nunku, udi utulomba bua kuikala ne ngelelu muimpe wa meji ne kutumikila malu a bikadilu bilenga adiye utulongesha. Bualu ebu kabuena butupangisha budikadidi to, kadi budi buakaja bukokeshi buetu bua kunana lungenyi, bubukolesha, ne bubuvudija. (Mis. 92:5; Nsu. 2:1-5; Yesh. 55:9) Budi butufikisha ku diangata mapangadika adi atupesha masanka eku butushila mpunga wa kusungula malu atudi basue. (Mis. 1:2, 3) Bushuwa, kuela meji bu Yehowa nkuimpe ne kudi kutuambuluisha!
Yehowa Nzambi webe udi ukuangata ne mushinga!
18 Patudi tuenda tukulakaja, tuikale anu batuishibue ne: Yehowa utshidi ne mudimu wa kutupesha. (Mis. 92:12-15) Yezu mmutulongeshe ne: nansha tuetu tumona bu ne: makande etu mmakepe anyi ne: tudi tuenza anu malu makese menemene mu mudimu wa Yehowa, yeye udi wangata tshionso tshitudi tumuenzela ne mushinga. (Luka 21:2-4) Nanku wewe enza anu tshiudi mua kuenza. Tshilejilu, udi mua kuakula bua Yehowa, kusambidila bena Kristo nebe, ne kukankamija bakuabu bua kushalabu ne lulamatu. Yehowa udi ukuangata bu muenzejanganyi nende wa mudimu, kabiyi bua tshiudi wenza, kadi bualu udi musue kumutumikila.—1 Kol. 3:5-9.
Bubanji bua mu Dîyi dia Nzambi
‘Aka! Monayi ndondo wa meji a Nzambi!’
18 Mona muvua mupostolo Paulo mumvuije mudi meji a Yehowa mapite a bifukibua bionso: “Aka! Monayi ndondo wa bubanji bua Nzambi, meji ende ne dimanya diende! Kakuena udi mua kujingulula dilumbuluisha diende ne kulondolola njila yende nansha!” (Lomo 11:33) Padi Paulo ubanga mêyi ende ne: “Aka!” uvua uleja muvuaye ukatshila ne kanemu kakole. Muaku wa tshiena Greke uvuaye mutele udibu bakudimune ne: “ndondo” udi umvuangana bikole ne muaku udi umvuija “dijimba.” Nunku, mêyi ende adi atushiya ne tshimfuanyi kampanda mu mutu. Patudi tufuanyikija meji a Yehowa, tudi anu bu badi baponguela mu lupongo lule ludi kaluyi ne ndekelu; meji au mmale ne mmalabale bikole a katuyi mua kumvua bungi buawu, anyi mene kuteta mua kumvuija malu awu onso mu kabujima anyi ku bumue ku bumue nansha. (Musambu 92:5) Bualu ebu kabuenaku butusaka ku didipuekesha anyi?
LUMINGU LUA DIA 14-20/10
BIUMA BIA MU DÎYI DIA NZAMBI MISAMBU 96-99
“Manyishayi lumu luimpe”!
w11-F 1/3 6 §1-2
Lumu luimpe ntshinyi?
Bena Kristo badi ne bua kumanyisha “lumu luimpe lua Bukalenge” padibu baluambila bantu bakuabu, babumvuija ne: Bukalenge ebu ke mbulamatadi walombola bantu pa buloba bujima mu buakane. Kadi miaku ya ne: “lumu luimpe” idi yumvuija malu makuabu mu Bible. Tshilejilu, tudi tupetamu bafunda miaku eyi: “lumu luimpe lua lupandu” (Misambu 96:2); “lumu luimpe lua Nzambi” (Lomo 15:16) ; ne “lumu luimpe lua Yezu Kristo.”—Mâko 1:1.
Mu mêyi makuabu, lumu luimpe ludi lukongoloja malu onso avua Yezu muambe ne avua bayidi bende bafunde. Kumpala kua Yezu kubanda mu diulu, wakambila bayidi bende ne: “Nunku, ndayi nuvuije bantu ba mu bisamba bionso bayidi, nubabatiza mu dîna dia Tatu, dia Muana, ne dia nyuma muimpe, nubalongesha mua kutumikila malu onso andi munuambile.” (Matayi 28:19, 20) Nunku, mudimu wa bena Kristo balelela ngua kuleja bantu nabu malu adi atangila Bukalenge ne kudienzeja bua kubavuija bayidi.
Ntshinyi tshienzeka mu Dituku dia dilumbuluisha?
Anu mudi foto udi ku dia balume uleja, bantu ba bungi badi bela meji ne: mu Dituku dia dilumbuluisha miliyo ya bantu neyimane kumpala kua nkuasa wa butumbi wa Nzambi bua kubalumbuluisha bilondeshile malu avuabu benze kale. Bamue nebapete difutu dia muoyo mu diulu, bakuabu nebaboshe mu iferno. Kadi Bible udi uleja ne: kipatshila ka Dituku dia dilumbuluisha edi nka kusungila bantu ku malu mabi a kansungasunga. (Musambu 96:13) Nzambi mmusungule Yezu bua kuikalaye Mulumbuluishi watuadila bantu buakane.—Bala Yeshaya 11:1-5; Bienzedi 17:31.
Ditalala mu bidimu tshinunu ne bua kashidi
18 Malanda mimpe aa akanyanguka pavua bantu bavua benzeja kudi Satana batombokele bumfumu bua Yehowa. Kadi katshia ku 1914, Bukalenge bua Masiya mbutuadije kuenza malu ku kakese ku kakese bua kupingaja ditalala ne buobumue abu. (Ef. 1:9, 10) Mu bukokeshi bua bidimu tshinunu, malu mimpe adi ‘kaayi amueneka’ mpindieu bualu ki mmanji kuenzeka neakumbane. Pashishe netufike “ku ndekelu,” mmumue ne: ku ndekelu kua bukokeshi bua Kristo bua bidimu tshinunu. Ntshinyi tshienzeka pashishe? Kristo ‘neapingaje Bukalenge kudi Nzambi ne Tatu wende.’ Neakuate mudimu ne muanzu ne bukokeshi budiye nabu bua ‘butumbi bua Nzambi.’—Mat. 28:18; Filip. 2:9-11.
19 Dîba adi, bantu bikala ku bukokeshi bua Bukalenge bua Nzambi nebikale bakadi bapuangane. Nebalonde tshilejilu tshia Yezu ne nebanyishe bumfumu bua Yehowa ne budipuekeshi ne muoyo mujima. Nebapete mpunga wa kuleja dijinga diabu dia kuenza nanku patshimunabu diteta dia ndekelu. (Buak. 20:7-10) Nunku, bademon ne bantu bonso badi batombokela Nzambi nebabutudibue bua kashidi. Netshikale tshikondo tshia disanka dia bungi. Bukua bantu bonso nebutumbishe Yehowa wikala ‘ku mutu kua bintu bionso’ ne disanka.—Bala Musambu 99:1-3.
Bubanji bua mu Dîyi dia Nzambi
it-1-F 425
Musambu
Badi bakula bua “musambu mupiamupia” mu mukanda wa Misambu, mu mifundu ya Yeshaya, ne ya mupostolo Yone. (Mis. 33:3; 40:3; 96:1; 98:1; 144:9; 149:1; Yesh. 42:10; Buak. 5:9; 14:3) Kukonkonona tshidibu bakuila miaba ya bungi itudi tupeta miaku ya ne: “musambu mupiamupia,” kudi kuleja muvuabu bimba musambu au bua bualu kampanda buvua Yehowa muenze bua kuleja bumfumu buende butumbuke. Tshilejilu, mu Misambu 96:10 badi bimbamu ne: “Yehowa mmulue Mukalenge!” Padi Yehowa walabaja bukokeshi buende, malu mapiamapia adi enzeka adi asaka bifukibua biende bia mu diulu ne bia pa buloba bua kumuimbila “musambu mupiamupia.”—Mis. 96:11-13; 98:9; Yesh. 42:10, 13.
LUMINGU LUA DIA 21-27/10
BIUMA BIA MU DÎYI DIA NZAMBI MISAMBU 100-102
Leja Yehowa dinanga dia lulamatu
Muudi mua kudilongolola bua kubatijibua
18 Dinanga diudi munange Yehowa nngikadilu mulenga wa katshia uudi nende. (Bala Nsumuinu 3:3-6.) Kunanga Nzambi bikole kudi mua kutuambuluisha bua kutshimuna ntatu itu itukuata. Ke tshitu Bible utamba kuamba bua dinanga dia Yehowa dia lulamatu kudi bena mudimu bende. Kubananga bikole mushindu eu kudi kumvuija ne: kakubalekela nansha kakese. (Mis. 100:5) Udi mufukibue mu tshimfuanyi tshia Nzambi. (Gen. 1:26) Mmunyi muudi mua kuikala pebe ne dinanga dia mushindu au?
19 Tutuadijayi ne dianyisha. (1 Tes. 5:18) Ikala udiebeja dituku dionso ne: ‘Mmunyi mudi Yehowa muleje ne: mmunange?’ Pashishe paudi usambila, dienzeja bua kumuela tuasakidila, utele malu masunguluke adiye mukuenzele. Ikala umona ne: Yehowa mukuenzele malu mimpe bualu mmukunange anu bu muvua mupostolo Paulo mufike ku dijingulula pende. (Bala Galatiya 2:20.) Diebeja ne: ‘Ndiku musue kumuleja panyi ne: ndi mumunange anyi?’ Dinanga diudi munange Yehowa nedikuambuluishe bua kupita bimpe ne ntatu. Nebikusake bua kuikala kutendelela Yehowa pa tshibidilu ne kuleja muudi munange Tatu webe dituku dionso.
“Nulame bieledi bienu bia meji, nuikale badimuke!”
10 Imue njiwu itudi ne bua kuepuka nyoyi eyi: kuambishangana, dikuatshika dia maluvu, budiavi, kuambangana mêyi mabi, kutangila manaya a tshikisu, bindidimbi bia bantu butaka, ne bintu bikuabu bia muomumue. (Mis. 101:3) Muena lukuna wetu Diabolo udi ukeba misangu yonso mpunga ya kunyanga malanda etu ne Yehowa. (1 Pet. 5:8) Tuetu katuyi badimuke, Satana udi mua kukuna ngikadilu mibi eyi mu meji etu ne mu muoyo wetu: dialakana, dipanga bululame, lukuka, lukinu, lutambishi ne dilaminangana munda. (Gal. 5:19-21) Ku ntuadijilu udi mua kumona bu ne: ngikadilu eyi ki mmibi to. Kadi tuetu katuyi bakebe tshia kuenza diakamue bua kuyumbusha mu muoyo wetu, neyitungunuke ne kukola anu bu tshisonsa tshibi tshia lulengu ne neyitukebele ntatu.—Yak. 1:14, 15.
Utuku utumikila mibelu mimpe idi Yehowa ufila anyi?
7 Kuepuka balongeshi ba mashimi kudi kumvuija tshinyi? Katuena ne bua kubakidila mu nzubu yetu peshi kubela muoyo to. Katuena ne bua kubala mikanda yabu, kulonda malongesha abu ku televizion ne ku tshisanji, ku Enternete peshi kubafundila to. Bua tshinyi tudi ne bua kuenza nunku? Bualu tudi banange ‘Nzambi wa bushuwa.’ Nunku katuena basue kuteleja malongesha a dishima adi akonyangaja bulelela budi mu Dîyi dia Nzambi to. (Mus. 31:5; Yone 17:17) Tudi kabidi banange bulongolodi bua Yehowa, budi butulongesha bulelela pa bidi bitangila dîna diende ne diumvuija diadi, malu adi Nzambi mulongolole bua buloba, tshidi bafue ne ditekemena dia dibishibua. Udiku mua kuvuluka tshiuvua mumvue pawakalonga malongesha a bushuwa aa bua musangu wa kumpala anyi? Nunku kulekedi muntu ukupambuisha mu bulongolodi budi bukuambuluishe bua kulonga malongesha malelela onso aa to.—Yone 6:66-69.
8 Nansha balongeshi ba dishima aba batuambile tshinyi, katubalondi nansha. Katuena mua kuteleja bantu aba badi bu mishimi idi kayiyi ne mâyi to. Kadi tudisuikayi bua kushala anu balamate Yehowa ne bulongolodi buende budi butuambuluisha bua kujikija nyota ne mâyi adi mikale bulelela budi mu Dîyi dia Nzambi.—Yesh. 55:1-3; Mat. 24:45-47.
Bubanji bua mu Dîyi dia Nzambi
it-2-F 522
Nyunyi wa mukuekue
Patu nyunyi wa mukuekue mukute, utu ubuka uya muaba wa kule udiye ushala mubungame bikole, ubueja mutu wende mu mapuapua. Udi ushala nanku kayi unyunga, bienza bua paudi umutangidile ku bule, umumone bu dibue ditoke. Udi ushala nanku munkatshi mua mêba a bungi, ke tshivua mufundi wa misambu muambe pavuaye wakula bua dibungama dikole divuaye nadi ne: “Ndi mufuanangane ne nyunyi wa mukuekue wa mu tshipela.” (Mis. 102:6) Muaba eu muaku “tshipela” kawena umvuija anu tshipela tshietu tshiena dîna etshi to, kadi udi umvuija muaba udi kule menemene ne bantu, pamuapa ku mâyi. Mu bitupa bidi ne mâyi lua ku nord kua tshibandabanda tshia Yadene, nyunyi ya mukuekue itshitu iluamu mu imue mivu. Mu Isalele mudi mishindu isatu ya nyunyi wa mukuekue. Udi mutambe kumanyika bikole ngua ya mitoke (Pelecanus onocrotalus); ya masala a mvuangala (Pelecanus crispus) ne ya muongo wa dikala dikunzubile (Pelecanus rufescens) kayitu itamba kumueneka to.
Nyunyi ya mukuekue itu minange miaba itu bantu kabayi bapitshila bua kabayenzedi bibi nansha. Miaba ayi ke ituyi yenza masua ayi, itoyelapu bana, ne ikishilapu padiyi ifuma ku diloba. Bu mudi nyunyi eyi minange kuikala kule ne bantu isomba mibungame, Bible udi uyitela bua kuakula bua muaba udi mutupu bua kabutu. Yeshaya wakamanyisha ne: nyunyi wa mukuekue neasombele mu Edome, bua kuakula mu ngakuilu wa mu tshimfuanyi bua kabutu kavua ne bua kukuata Edome. (Yesh. 34:11) Sefanya wakamba dîyi dia buprofete dia muvua nyunyi ya mukuekue ne bua kusombela mu bimenga bia Niniwe, bua kuleja kabutu ka kashidi ne dijimija dia mioyo ya bantu.—Sef. 2:13, 14.
LUMINGU LUA DIA 28/10–3/11
BIUMA BIA MU DÎYI DIA NZAMBI MISAMBU 103-104
Nzambi udi uvuluka “ne: tudi lupuishi”
Anu bu Yehowa, kuikadi muena malu makole to
5 Yehowa katu ne malu makole to, bualu utu udipuekesha ne ufuilangana luse. Tshilejilu, wakaleja muvuaye ne budipuekeshi pakavuaye pa kubutula bantu babi ba mu Sodoma. Kutumaye banjelu bua kuambila Lota bua anyemene ku buloba bua ku mikuna. Kadi Lota uvua utshina bua kuyaku. Ke kusengelelaye Yehowa bua anyemene ne dîku diende mu kamusoko kakese ka Soâ, kavua Yehowa ne bua kubutula kabidi. Yehowa uvua mua kuumisha malu bua Lota enze anu tshivuaye muambe atshi. Kadi wakamuitabila, kubengaye kubutula Soâ. (Gen. 19:18-22) Panyima pa bidimu nkama ya bungi, Yehowa wakumvuila bena mu Niniwe luse. Kutumaye muprofete wende Yona bua kubamanyisha ne: ukavua pa kubabutula bobu ne tshimenga tshiabu. Kadi pakanyingalalabu ne kulekela malu abu mabi, Yehowa wakabafuila luse.—Yona 3:1, 10; 4:10, 11.
Eyemena Yehowa anu muakamueyemena Shimishona
16 Nansha muvua Shimishona mukenge bua tshilema tshiende, uvua anu udienzeja bua kuenza disua dia Yehowa. Dilongesha didi ne: bobu batubele patoke, anyi batumbushe mu midimu ituvua tuenza mu tshisumbu bua tshilema tshitudi benze, katulekedi kuenza disua dia Yehowa to. Tuvuluke ne: Yehowa utu anu musue kutufuila luse. (Mis. 103:8-10) Nansha tuetu benze bilema, Yehowa udi mua kutupesha bukole bua kuenza disua diende anu bu muvuaye mubupeshe Shimishona.
17 Tuakule bua Michael utshidi nsonga. Uvua musadidi wa mudimu ne mpanda-njila wa pa tshibidilu. Bia dibungama, wakenza tshilema, kumumbushabu mu midimu ayi. Udi wamba ne: “Mvua ngenzela Yehowa mudimu wa bungi too ne dîba diakangumbushabu mu midimu ayi. Kadi diakamue ngakumvua bu ne: kakutshivua tshimvua mua kuenza mu mudimu wa Yehowa to. Tshivuaku muele meji ne: Yehowa uvua mua kundekela to, kadi nkavua ndiebeja ni mvua mua kudia kabidi nende bulunda bu kumpala anyi kupetulula midimu imvua nayi.”
18 Bia diakalenga, Michael kakateketa mu mikolo to. Udi wamba kabidi ne: “Mvua nsambila bikole, ndilongela, ne ngelengana meji a bimvua ndonga bua kuakaja malanda anyi ne Yehowa.” Pakapita matuku, bakamuteka kabidi mu midimu yende ayi. Lelu udi mukulu ne mpanda-njila wa pa tshibidilu. Udi wamba ne: “Dikankamija ndidi mupete nangananga kudi bakulu diakenza bua mmone ne: Yehowa utshidi munnange. Nkadi mmuenzela kabidi mudimu ne kondo ka muoyo katoke. Bualu buvua bumfikile ebu mbundongeshe ne: Yehowa neafuile muntu yonso udi unyingalala ne muoyo mujima bua mpekatu yende luse.” Tuikale batuishibue ne: tuetu balekele kuenza bilema ne batungunuke ne kueyemena Yehowa, neenze netu mudimu ne neatubeneshe.—Mis. 86:5; Nsu. 28:13.
Udi ne mushindu wa kukumbaja bipatshila biebe bia mu nyuma
2 Wewe ne tshipatshila kampanda tshiudi kuyi muanji kukumbaja, kuteketshi mu mikolo to, muanetu. Nansha tshipatshila tshidi tshimueneka tshipepele tshitu tshilomba anu dîba ne kudienzeja bikole. Bu muudi anu musue kukumbaja tshipatshila tshiebe, bidi bileja ne: udi wangata malanda ebe ne Yehowa ne mushinga wa bungi, ne udi musue kumuenzela mudimu ne muebe muonso. Yehowa udi wanyisha bikole mushindu uudi udienzeja. Bushuwa, kena ukulomba bua kuenza tshiudi kuyi mua kukokesha to. (Mis. 103:14; Mika 6:8) Nanku mbimpe udifundile tshipatshila tshiudi mua kukumbaja bilondeshile nsombelu webe. Wewe mudifundilatshi, ntshinyi tshiudi mua kuenza bua kutshikumbaja? Tumonayi imue ngenyi idi mua kutuambuluisha.
Bubanji bua mu Dîyi dia Nzambi
Bukole bua kufuka nabu bintu: “Wakafuka diulu ne buloba”
18 Mushindu udi Yehowa ukuata mudimu ne bukole buende bua kufuka nabu bintu udi utulongesha tshinyi? Mishindu mishilashilangane ya bidiye mufuke idi itusaka bua kumutshina ne kumunemeka bikole. Mufundi mukuabu wa Misambu ya mu Bible wakakema ne: ‘Yehowa, mona mudi bungi bua mishindu ya midimu yebe! Buloba budi buwule tente ne bintu biwakufuka.’ (Musambu 104:24) Abu si mbulelela! Bamanyi ba malu a bintu bidi ne muoyo pa buloba bakadi bapetapu mishindu yabi mipite pa muliyo mujima; kadi kudi badi ne ngenyi mishilashilangane ya bungi bua mishindu yabi yonso, aba ne: mbutue ku miliyo 10, bakuabu ne: nku miliyo 30, banga pabu ne: mbupite apu. Muzodi anyi musongi wa bintu udi dikuabu mua kudimona mushikile, mupangile bikuabu bia kupatula. Kadi bukole budi nabu Yehowa bua kupatula ne kufuka bintu kabukabu bipiabipia budi bumueneka ne: kabutu buobu bushikila to.