Tshimenga tshia Babela tshivua pabuipi ne tshimenga kampanda tshivuabu babikila ne: Ula, muvua bantu bavua batendelela nzambi ya bungi pamutu pa kutendelela Yehowa. Kadi mu Ula muvua muntu kampanda uvua utendelela anu Yehowa. Dîna diende divua Abalahama.

Yehowa wakambila Abalahama ne: ‘Shiya nzubu webe ne balela bebe, uye ku buloba bungakuleja.’ Pashishe Nzambi wakamulaya ne: ‘Neulue tshisamba tshinene, ne nengenzele bantu ba bungi ba pa buloba bujima malu mimpe ku diambuluisha diebe.’

Abalahama kavua mumanye kuvua Yehowa umutuma to, kadi wakeyemena Yehowa. Nunku Abalahama ne mukajende Sala ne tatuende Tela, pamue ne Lota muana wa muanabu bakasuika mabuki abu, kutumikilabu ne kutuadijabu luendu lule.

Abalahama uvua ne bidimu 75 pavuaye yeye ne bena mu dîku diende bafike mu buloba buvua Yehowa musue bua bamone. Bavua babubikila ne: buloba bua Kanâna. Muomu emu Nzambi wakayukila ne Abalahama, kumulayaye ne: ‘Buloba buonso budi bukunyunguluke ebu nembupeshe bana bebe.’ Kadi Abalahama ne Sala bakavua bakulakaje ne kabavua balele muana nansha umue to. Kadi mmunyi muvua Yehowa mua kukumbaja mulayi wende eu?

Abalahama ne Sala bavua baselangane kukavua bidimu bia bungi. Bavua bashiye nzubu wabu muimpe mu Ula ne baye kusombela mu ntenta. Kadi Sala kavua mudiabakene to, bualu uvua mueyemene Yehowa.

Bu muvua Sala ne dijinga dikole dia kulela muana, wakambila Abalahama ne: ‘Muena mudimu wanyi Hagâ yeye mulele muana, neikale anu bu wanyi meme.’ Pakapita matuku, Hagâ wakalela muana wa balume. Dîna diende divua Yishemaele.

Bidimu bia bungi pashishe, pavua Abalahama ne bidimu 99 ne Sala ne bidimu 89, bakapeta benyi basatu. Abalahama wakabalomba bua bikishile muinshi mua mutshi ne badie tshiakudia. Udiku mumanye benyi abu anyi? Bavua banjelu! Bakambila Abalahama ne: ‘Tshidimu tshialua, tshikondo tshia buena etshi, wewe ne mukajebe nenupete muana wa balume.’ Sala uvua munda mua ntenta mubateleje. Wakadisekela wamba ne: ‘Ndiku mu bulelela mua kulela muana nansha munkadi mukalakaje emu anyi?’

Tshidimu tshiakalonda, Sala wakalela muana wa balume anu muvua muanjelu wa Yehowa mulaye. Abalahama wakamuinyika ne: Izaka, dîna didi diumvuija ne: “Tuseku.”

Pavua Izaka ne bidimu bu bitanu, Sala wakamona Yishemaele umuseka. Sala uvua musue kukuba muanende, nunku wakaya kudi Abalahama ne kumuambilaye bua kuipata Hagâ ne muanende Yishemaele. Kumpala, Abalahama kavua musue kubipata to. Kadi Yehowa wakambila Abalahama ne: ‘Teleja Sala. Nentabalele Yishemaele. Kadi milayi yanyi neyikumbanyine mu Izaka.’