Bukalenge bua Nzambi nebuenze tshinyi?
Diandamuna dia mu Bible
Bukalenge bua Nzambi nebupingane pa muaba wa makalenge onso a bana ba bantu, ne buobu nebukokeshe buloba bujima. (Danyele 2:44; Buakabuluibua 16:14) Patuadijabu kukokesha, nebuenze malu aa:
Kubutula bantu babi, bualu bienzedi biabu bia budinangi bidi bituenzela tuetu bonso bibi. “Kadi bantu babi, nebumbushibue pa buloba.”—Nsumuinu 2:22.
Kujikija mvita. “[Nzambi] udi ujikija mvita pa buloba buonso bujima.”—Misambu 46:9.
Kutuadila bantu masanka ne bukubi pa buloba. “Muntu yonso neasombe mu ditalala muinshi mua muonji wende wa tumuma tua mvinyo ne muinshi mua mutshi wende wa mfigi, ne muntu kakubatshinyisha.”—Mika 4:4, Bible wa Good News.
Kuvuija buloba Mparadizu. “Mpata wa tshipela neikale ne disanka ne neele bilongo.”—Yeshaya 35:1, Bible wa Contemporary English.
Kupetesha muntu yonso mudimu wa nsongo udi usankisha. “Basungula [ba Nzambi] nebasanke bikole menemene bua mudimu wa bianza biabu. Kabakukuata mudimu mukole bua tshianana.”—Yeshaya 65:21-23.
Kujikija masama. “Muntu nansha umue udi musombele mu ditunga kakuamba ne: ‘Ndi nsama.’”—Yeshaya 33:24.
Kumbusha bukulakaja. “Musunyi wa pambidi pende ulue mupiamupia kupita wa ku buana; apingane ku matuku a makanda a ku bunsonga buende.”—Yobo 33:25.
Kubisha bantu ku lufu. “Bantu bonso badi mu nkita ya tshivulukilu [nebumvue dîyi dia Yezu] ne nebapatuke.”—Yone 5:28, 29.