Kutumikila baledi bebe kudi anu bu kufuta dibanza ku banke. Padibu benda bakumona muntu wa kueyemena, nebakueyemene kabidi bikole
BUA BANSONGA
10 Ikala muntu wa kueyemenyibua
TSHIDIBI BIUMVUIJA
Bantu ba kueyemenyibua badi benza bua baledi babu, balunda babu, ne bamfumu babu ba midimu babeyemene. Batu batumikila mikenji, bakumbaja malu adibu balaya, ne bamba anu bulelela.
BUA TSHINYI BIDI NE MUSHINGA
Mu malu matue ku onso, budikadidi buudi upeta budi bumvuangana bikole ne tshiudi muenze mu bungi bua matuku bua bantu bakueyemene.
Sarahi udi wamba ne: “Mushindu mutambe buimpe wa kuenza bua baledi bebe bakueyemene nkuleja ne: udi mushindame ne mumanye tshia kuenza paudi nabu nansha paudi kuyi nabu to.”
DÎYI DINENE DIA MU BIBLE: “Tungunukayi ne kupima tshinudi nuenu bine.”—2 Kolinto 13:5.
TSHIUDI MUA KUENZA
Wewe musue bua bantu bakueyemene bikole anyi batuadijilule kukueyemena, malu adi alonda aa adi mua kukuambuluisha.
Ikala wamba bulelela. Kakuena tshidi mua kusaka bantu ne lukasa bua kubenga kukueyemena bu dishima to. Kadi wewe wamba malu patoke, kuyi uasokoka, nangananga bua bilema biebe, bantu nebakueyemene.
Caiman udi wamba ne: “Mbipepele bua kuamba bulelela padi malu enda bimpe. Kadi kuamba bulelela mu malu adi mua kukuangatshisha bibi nekuenze bua bakueyemene bikole.”
DÎYI DINENE DIA MU BIBLE: ‘Tudi basue kuenda mu bululame mu malu onso.’—Ebelu 13:18.
Ikala muntu wa kutekela muoyo. Mu nkonko ivuabu bele bantu batu batangila malu a bena mudimu mu États-Unis, bantu 78 mu bantu 100 bakaleja ne: dikala muntu wa kutekela muoyo “mbumue bua ku malu asatu manene adibu bakeba kudi muntu udibu bakeba kuangata ku mudimu.” Kulonga mua kuikala muntu wa nunku mpindieu nekukuambuluishe pawakola.
Sarah udi wamba ne: “Baledi banyi batu bamona mpandi mumanye tshia kuenza ne ngenza midimu ya kumbelu kabiyi bikengela anu kumvuluija to. Pandi ntamba kupeta lungenyi lua kuenza nunku, badi benda bangeyemena bikole.”
DÎYI DINENE DIA MU BIBLE: “Ndi mushindike ne: newenze tshindi mukulombe, . . . mumanye ne: newenze kupitshisha ne tshindi muambe.”—Filemona 21.
Ikala ne lutulu. Misangu ya bungi bitu bikengela dîba bua bantu bamone mutudi bakole mu lungenyi, bualu dikola edi ndishilangane ne dia ku mubidi ditu diodi dimueneka pa lukasa.
Brandon udi wamba ne: “Ki ntshienzedi tshimue tshidi mua kuenza bua baledi bebe ne bantu bakuabu bakueyemene to. Kadi mu bungi bua matuku wewe wenza anu malu bimpe, nebafike ku dikueyemena.”
DÎYI DINENE DIA MU BIBLE: “Vualayi . . . Lutulu.”—Kolosayi 3:12.