Malanda mimpe ne Nzambi
Anu mutuvua bamone mu tshiena-bualu tshia kumpala, bantu ba bungi batu bangata Bible bu mukanda wa tshijila. Badi bamona ne: padibu bamubala ne batumikila mibelu idimu, badi badiumvua pabuipi menemene ne Nzambi, ne bamanya bua tshinyi badi ne muoyo.
Bible udi wamba ne: bantu ba mu ‘nyuma’ anyi bantu badi mu malanda mimpe ne Nzambi badi bitaba mmuenenu wende wa malu ne batumikila mikenji yende. Kadi bantu ba mu mubidi badi beyemena mmuenenu wabu wa malu ne balonda majinga abu.—Yuda 18, 19; Efeso 5:1.
DITEKEMENA
DÎYI DINENE DIA MU BIBLE: “Wewe mutekete mu maboko mu dituku dia dikenga, bukole buebe nebukepe.”—Nsumuinu 24:10, dimanyisha.
TSHIDIDI DIUMVUIJA: Diteketa mu maboko didi mua kukepesha bukole budi mua kutuambuluisha bua kutantamena ntatu. Kadi ditekemena diodi didi mua kutupesha bukole butudi nabu dijinga. Bidi mua kutukolesha ku muoyo bua kumanya ne: ntatu itudi tupeta idi mua kuikala ya tshitupa tshîpi; bualu tudi mua kutekemena ne: padiyi ijika, kudi malu mimpe atuapeta.
TSHIUDI MUA KUENZA: Ela meji a malu mimpe enzeka kumpala. Pamutu pa kusamisha mutu bua tshidi mua kuenzeka anyi kuindila bua malu enzeke kakuyi kalema, enza malu mu diumvuangana ne bipatshila biebe. Nansha nanku “malu adi kaayi matekemena” adi mua kufika. (Muambi 9:11) Kadi mu bulelela, misangu ya bungi malu atu alua anu kuenzeka bimpe kupita mutuvua tuelela meji. Bua kumvuija bualu ebu, Bible udi ufila tshilejilu tshia malu a madimi, wamba ne: “Kuna mamiinu ebe mu dinda ne kulekedi tshianza tshiebe tshikisha too ne dilolo; bualu kuena mumanye bikala mua kukola, ni ngebi ni mbiabia, peshi ni biakola bionso bibidi bimpe.”—Muambi 11:6.
MANDAMUNA A NKONKO MINENE ITU BANTU BADIELA
DÎYI DINENE DIA MU BIBLE: “Mpesha dijingulula dia malu . . . dîyi diebe mbulelela.”—Misambu 119:144, 160.
TSHIDIDI DIUMVUIJA: Bible udi wandamuna nkonko itu bantu pa kuamba bonso badiela. Tshilejilu, udi wandamuna nkonko bu mudi:
Tudi bafume kuepi?
Bua tshinyi tudi pa buloba?
Ntshinyi tshidi tshifikila muntu padiye ufua?
Muoyo utudi nawu eu ke tshionso tshidiku anyi?
Padi bantu miliyo ya bungi pa buloba bujima bakonkonone mandamuna a nkonko eyi ne mikuabu, mbafike ku dilengeja nsombelu wabu.
TSHIUDI MUA KUENZA: Konkonona tshidi Bible ulongesha. Lomba Ntemu wa Yehowa kayi yonso bua akuambuluishe bua kumvua malu a mu Bible. Buela mu site wetu wa jw.org, anyi buela mu tshimue tshia ku bisangilu bietu. Muntu yonso udi mua kubuelamu kayi ufuta makuta.
MÊYI MANENE MAKUABU A MU BIBLE
Tangila filme wa Bua tshinyi mbimpe kulonga Bible? mu site wa jw.org. Udimu mu miakulu mipite pa 880
BIDI BIKENGELA UMANYE NZAMBI NE ULONDE BULUDIKI BUENDE
“Badi bamanye ne: badi dijinga ne malu a mu nyuma mba diakalenga.”—MATAYI 5:3.
LONGA MALU A BUNGI A NZAMBI UDI BIBLE WAKUILA
‘Keba Nzambi, ne umupete bushuwa, kena kule ne yonso wa kutudi.’—BIENZEDI 17:27.
BALA BIBLE NE ELANGANA MEJI BUA MALU ADIMU
“Disanka diende didi mu mikenji ya Yehowa,a ne udi welangana meji mu mikenji Yende munya ne butuku. . . . Malu onso adiye wenza neende bimpe.”—MISAMBU 1:2, 3, dimanyisha.
a Yehowa ke dîna dia Nzambi didi Bible uleja.