Matuku atshilualua a disanka dia dikema
Mu tshikondo tshîpi, Satana ne bademon bende kabakuenza kabidi tshintu nansha
Satana ne bademon bende kabakushima kabidi bukua-bantu tshikondo tshile to. Yehowa mmumane kubipata mu diulu. (Buakabuluibua 12:9) Mu matuku adi kumpala eku, Nzambi nealuishe Satana ne bademon bende. Mu tshikena-kumona tshia kudi Nzambi, mupostolo Yone wakamba ne: “Meme kumona muanjelo utuluka mu diulu mukuate nsapi ya dijimba mu tshianza kabidi ne lukanu lunene. Kukuataye dragon, nyoka wa kale, ke Diabolo ne Satana, e kumusuika bua bidimu tshinunu. Kumuelaye mu dijimba, kumukangila bikuvu, kutua tshitampi, bua alekele kupambula bukua-matunga too ne muakumbana bidimu tshinunu.” (Buakabuluibua 20:1-3) Kunyima, Diabolo ne bademon bende nebabutudibue kashidi.—Buakabuluibua 20:10.
Bantu babi pa buloba badi pabo ne bua kubutudibua.—Musambu wa 37:9, 10; Luka 13:5.
Bafue nebikale ne muoyo tshia kabidi!
Bafue nebapingajibue ku muoyo pa buloba
Pikala Satana ne bademon bumbushibue, Yehowa neatuadile bukua-bantu mabenesha mavule. Nenuvuluke ne: bafue kabena ne muoyo, kabenaku. Yezu wakafuanyikija lufu ne tulu—tulu tukole katuyi tua bilota. (Yone 11:11-14) Wakenza nenku bualu uvua mumanye ne: tshikondo tshikala bantu bavua balale mu lufu ne bua kubiishibua bua muoyo tshivua ne bua kulua. Wakamba ne: “Dîba didi divua dikala aba buonso badi mu nkita ya tshivulukilu ne bua . . . kupatukamu.”—Yone 5:28, 29; fuanyikija ne Bienzedi 24:15.
Nebapingajibue ku muoyo, apa, pa buloba. Pamutu pa mamanyisha a lufu lua bantu ku tudiomba, nekuikale mamanyisha a mêna a bantu bikala bapingajibue ku muoyo! Ndisanka kayipu dia kuakidila bananga betu bafumine mu nkita!