Tshitupa 2
Buloba Budi Kabuyi Ne Makenga
1, 2. Mmuenenu kayi mushilangane udi nende bantu ba bungi?
PABI, bantu miliyo mivule pa buloba bujima badi ne mmuenenu mushilangane menemene. Badi badianjila kumona matuku a mpatshi atshilualua bua bukua-bantu. Badi bamba ne: mu katupa kîpi emu, pa buloba apa, nepikale bulongolodi bupikula ku bubi ne makenga onso nkong. Badi ne dieyemena dia se: malu mabi neumbushibue mu katupa kîpi emu ne nebajadike bulongolodi bupiabupia bua buloba bujima. Badi mene bamba ne: tshishimikidi tshia bulongolodi bupiabupia abu tshidi tshienda tshiashibua bituadijile ku mpindieu!
2 Bantu aba badi bitabuja ne: mu bulongolodi bupiabupia abu kamuakuikala mvita, tshikisu, dibunda bibawu, dipanga buakane, ne bupele. Nebuikale bulongolodi budi kabuyi ne masama, tunyinganyinga, binsonji, ne lufu mene. Mu tshikondo atshi bantu nebafike ku bupuangane ne nebikale ne muoyo wa kashidi mu disanka mu mparadizu wa pa buloba. Bia dikema, nansha aba bakadi bafue nebikale mua kubiishibua ne nebikale ne muoyo bua kashidi!
3, 4. Bua tshinyi bantu aba badi ne dishindika pa mmuenenu wabu?
3 Mmuenenu eu wa matuku atshilualua ntshilota patupu peshi dijinga dia mu lungenyi anyi? Tòo, nansha kakese. Mmuenenu eu mmuashila pa ditabuja dishindika bikole dia se: Mparadizu utshilualua kakupangila kufika. (Ebelu 11:1) Bua tshinyi mbajadike nanku? Bualu Mufuki wa bukole-buonso wa bukua-mabulunge mmulaye bualu ebu.
4 Bua bidi bitangila malaya a Nzambi, Bible udi wamba ne: “Dîyi nansha dimue dia ku mêyi onso mimpe akanuambila Yehowa Nzambi wenu ki ndipangile kukumbana. Mmalue onso malelela bua bualu buenu. Nansha dimue dia kudiwu ki ndipange kukumbana.” “[Nzambi] kena muntu bua kushimaye . . . Yeye udi mua kuamba bualu kayi ubuenza anyi? Udi mua kuamba diyi kayi udikumbaja anyi?” ‘Yehowa wa misumba mmuditshipe, wamba ne: Bulelela, bu mungakapangadija bua kuenza, bualu nebuenjibue; bu mungakasungula mu mutshima wanyi, nebujalame muomumue.’—Yoshua 23:14, NW; Dibadika 23:19, Mukanda wa Mvidi Mukulu; Yeshaya 14:24.
5. Nnkonko kayi idi ikengela kuandamuna?
5 Kadi, bikala dilongolola dia Nzambi divua dia kujadika mparadizu wa pa buloba udi kayi makenga, bua tshinyi wakalekela diambedi malu mabi enzeka? Bua tshinyi wakindila bidimu binunu bisambombo too ne mpindieu bua kuakaja malu mabi? Siekele eyi yonso ya makenga idi mua kuleja ne: Nzambi kêna uditatshisha bua bualu buetu, peshi ne: katuku anyi?