Dilongesha dia 18

Ikala mulunda wa Nzambi bua kashidi

Bua kupeta mulunda ne kumulama, bitu bikengela kuenza madikolela. Neupete masanka a bungi bua madikolela audi wenza bua kulua ne kushala mulunda wa Nzambi. Yezu wakambila bantu bavua bamuitabuje ne: “Nenumanye bulelela ne bulelela nebunupe budikadidi.” (Yone 8:32, MML) Bidi bisua kumvuija tshinganyi?

Udi mua kupeta budikadidi mpindieu. Udi mua kuikala ne budikadidi pa kubenga kubuelakana kabidi mu malongesha a dishima peshi mu mashimi adi Satana mumuangalaje. Udi mua kuikala ne budikadidi pa kupeta ditekemena didi bantu miliyo ya bungi badi kabayi bamanye Yehowa bapangile. (Lomo 8:22) Budikadidi budi nabu balunda ba Nzambi budi bubambuluisha bua kubenga kutshina lufu.—Ebelu 2:14, 15.

Neupete budikadidi mu bukua-panu bupiabupia bua Nzambi. Mbudikadidipu kayi bulenga buudi mua kupeta matuku atshilualua! Mu Mparadizu kamuakuikala mvita, masama ne bimvundu to. Kakuakuikala bupele ne biyole bia nzala nansha. Kakuakuikala bukulakaje peshi lufu to. Buôwa, dikengeshangana ne kansungasunga kabiakuikalaku to. Bible udi wakula bua Nzambi ne wamba ne: “Udi ubulula tshianza tshiebe, tshintu tshionso tshidi ne muoyo udi utshiukutshisha ne diakalengele.” —Musambu 145:16.

Balunda ba Nzambi nebikale ne muoyo wa tshiendelele. Muoyo wa tshiendelele ndipa dia mushinga mukole dialua Nzambi kupesha bantu bonso badi basue kudia nende bulunda. (Lomo 6:23) Anji kuelabi meji bua mushindu wikala muoyo kauyi ndekelu!

Newikale ne dîba dia kuenza malu a bungi. Pamu’apa neujinge bua kulonga mua kuimba tshiombelu kampanda tshia kuimba natshi misambu. Peshi neujinge bua kulonga mua kuzola anyi kuikala muenji wa mudimu wa mabaya. Bumue neujinge bua kumanya malu a nyama anyi a mitshi. Peshi neujinge bua kuya mu matunga makuabu bua kumona bantu ba mishindu ne mishindu. Muoyo wa tshiendelele neukupeteshe mushindu wa kuenza malu onso aa.

Newikale ne dîba dia kudia bulunda ne bantu ba bungi. Kuikala ne muoyo wa tshiendelele nekukupeteshe mushindu wa kumanya bantu bakuabu ba bungi badi balue pabu balunda ba Nzambi. Neufike ku dimanya bipedi ne ngikadilu yabu milenga, ne buobu kabidi nebalue balunda bebe. Neubanange, ne buobu pabu nebakunange. (1 Kolinto 13:8) Bu muwikala ne muoyo wa kashidi, newikale ne dîba dia kudia bulunda ne muntu yonso pa buloba! Bualu buimpe menemene mbua se: bulunda buebe ne Yehowa nebuende bukola padi bidimu bienda bipita. Tudi tukujingila bulunda bua kashidi ne tshiendelele ne Nzambi!