Dilongesha dia 9

Balunda ba Nzambi mbanganyi?

Yezu Kristo m’Muana wa Yehowa, ne mmulunda wende wa pa muoyo kabidi. Kumpala kua Yezu kulua pa buloba, uvua mu diulu, uvua muntu wa mubidi wa nyuma, ne uvua kabidi ne bukole bua bungi. (Yone 17:5) Pashishe wakalua pa buloba bua kulongesha bantu bulelela budi butangila Nzambi. (Yone 18:37) Wakafila kabidi muoyo wende wa bumuntu bua kupikula bantu bena butumike ku mpekatu ne ku lufu. (Lomo 6:23) Patudi tuamba apa, Yezu udi Mukalenge wa Bukalenge bua Nzambi anyi mbulamatadi wa mu diulu wavuija buloba Mparadizu.—Buakabuluibua 19:16.

Banjelu badi pabu balunda ba Nzambi. Banjelu kabakafukibua pa buloba bu bantu to. Nzambi wakabafuka mu diulu kumpala kua kuenzaye buloba. (Yobo 38:4-7) Banjelu badi miliyo ne miliyo. (Danyele 7:10) Balunda ba Nzambi aba (badi mu diulu) mbasue bua bantu bamanye bulelela budi butangila Yehowa.—Buakabuluibua 14:6, 7.

Nzambi udi kabidi ne balunda pa buloba; udi ubabikila ne: mbantemu bende. Ntemu udibu babikile ku tshilumbuluidi utu wamba malu adiye mumanye bua muntu kampanda anyi tshintu kansanga. Bantemu ba Yehowa badi bambila bantu bakuabu malu adibu bamanye pa bidi bitangila Yehowa ne malu adiye mulongolole bua kuenza. (Yeshaya 43:10) Anu bu banjelu, Bantemu mbasue kukuambuluisha bua umanye malu malelela a Yehowa. Mbasue bua wikale pebe mulunda wa Nzambi.