Dilongesha dia 10

Mushindu wa kumanya tshitendelelu tshilelela

Wewe musue kuikala mulunda wa Nzambi, udi ne tshia bua kuikala mu tshitendelelu tshidi Nzambi wanyisha. Yezu wakamba ne: “batendeledi balelela” bavua ne bua kutendelela Nzambi biumvuangane ne “bulelela.” (Yone 4:23, 24) Kudi anu mushindu umuepele muakane wa kutendelela Nzambi. (Efeso 4:4-6) Tshitendelelu tshilelela tshidi tshifikisha bantu ku muoyo wa kashidi, kadi tshia dishima tshidi tshibafikisha ku kabutu.—Matayo 7:13, 14.

Bua kumanya tshitendelelu tshilelela, mbimpe umone mushindu udi bantu badimu. Bu mudi Yehowa muikale muimpe, bantu badi bamutendelela mu bulelela badi ne bua kuikala bantu bimpe. Anu mutu mutshi wa bimuma bia oranje ukuama bimuma bilenga, tshitendelelu tshilelela tshidi tshipatula bantu ba malu malenga.—Matayo 7:15-20.

Balunda ba Yehowa badi banemeka Bible bikole. Mbamanye ne: Bible mmufume kudi Nzambi. Badi bitaba bua Bible alombole malu abu onso, abambuluishe bua kujikija bilumbu ne bua kumanya Nzambi. (2 Timote 3:16) Badi badienzeja bua kuenza pabu malu adibu bayisha.

Balunda ba Yehowa batu banangangane. Yezu wakaleja bantu dinanga pa kubalongesha malu a Nzambi ne pa kuondopa bavua ne mabedi. Bantu badi mu tshitendelelu tshilelela batu pabu banange bantu nabu. Anu bu Yezu, kabena bapepeja bapele anyi bantu ba tshisa tshikuabu to. Yezu wakamba ne: bantu bavua ne bua kumanyina bayidi bende ku mushindu uvuabu ne bua kunangangana.—Yone 13:35.

Balunda ba Nzambi badi batumbisha dîna dia Nzambi: Yehowa. Muntu yeye mubenge kukubikila mu dîna diebe, muntu au udiku mua kuikala mulunda webe wa pa muoyo anyi? Tòo! Patudi ne mulunda, tudi tumubikila mu dîna diende ne tuambila bakuabu malu ende malenga. Nenku bantu badi basue kuikala balunda ba Nzambi badi ne bua kumubikila mu dîna diende ne kuambila bantu bakuabu malu ende. Atshi ke tshidi Yehowa musue bua tuenze.—Matayo 6:9; Lomo 10:13, 14.

Anu bu Yezu, balunda ba Nzambi badi balongesha bantu malu a Bukalenge bua Nzambi. Bukalenge bua Nzambi mmbulamatadi wa mu diulu wakudimuna buloba ebu mparadizu. Balunda ba Nzambi badi bamanyisha bakuabu lumu luimpe elu lua Bukalenge bua Nzambi.—Matayo 24:14.

Bantemu ba Yehowa badi badienzeja bua kuikala balunda ba Nzambi. Badi banemeka Bible ne mbanangangane. Batu batela dîna dia Nzambi ne baditumbisha, ne badi balongesha bantu bakuabu malu a Bukalenge bua Nzambi. Bantemu ba Yehowa badi mu tshitendelelu tshilelela pa buloba lelu’eu.