Dilongesha dia 11

Patuka mu tshitendelelu tshia dishima

Satana ne ba-demon bende ki mbasue bua wenzele Nzambi mudimu to. Mbasue kumbusha bantu bonso mu njila wa Nzambi, padiku mushindu. Mmunyi mutubu benza? Mushindu umue udibu bapambuisha nawu bantu ntshitendelelu tshia dishima. (2 Kolinto 11:13-15) Tshitendelelu ntshia dishima paditshi katshiyi tshilongesha bulelela bua mu Bible to. Tshitendelelu tshia dishima tshidi bu makuta a mafi, adi mua kumueneka ku mêsu bu mimpe, kadi pawu kaayi ne mushinga to. Adi mua kukukebela ntatu ya bungi.

Mashimi a tshitendelelu kaena mua kusankisha Yehowa, Nzambi wa bulelela to. Pavua Yezu pa buloba, bena bitendelelu bikuabu bavua bajinga kumushipa. Bavua bela meji ne: ntendelelu wabu uvua muakane. Bakamba ne: “Tudi ne tatu umue, Nzambi mene.” Yezu wakitaba bualu abu anyi? Tòo! Wakabambila ne: “Nuenu nudi bana ba Diabolo, tatu wenu.” (Yone 8:41, 44) Bantu ba bungi lelu badi bela meji ne: badi batendelela Nzambi; kadi ki mmuomu to, badi bakuatshila Satana ne ba-demon bende mudimu.—1 Kolinto 10:20.

Anu mutu mutshi mubole ukuama bimuma bibi, bitendelelu bia dishima bidi bipatula bantu badi benza malu mabi. Bimvundu mbivule pa buloba bua malu mabi adi bantu benza. Kudi tshiendenda, mvita, buîvi, dikengeshangana, dishipangana ne dikuata bantu ku bukole bua kuenda nabu anyi kumanyangana nabu. Bantu ba bungi badi benza malu mabi aa batu mu tshitendelelu kampanda, kadi tshitendelelu tshiabu etshi katshiena tshibasaka bua kuenza malu adi mimpe to. Buobu kabayi balekele malu mabi, kabakulua balunda ba Nzambi nansha.—Matayo 7:17, 18.

Tshitendelelu tshia dishima tshidi tshilongesha bantu bua kutendelela bintu. Nzambi ki mmusue bantu batendelele bintu nansha. Bualu ebu mbualu bua meji. Neumvue bishi bikala muntu kayi ukuakuisha, kadi wakuisha anu tshimfuanyi tshiebe? Muntu eu udiku mua kuikala mulunda webe wa bushuwa anyi? Tòo. Yehowa mmusue bua bantu bakule nende, kadi ki mmusue bakule ne lupingu anyi tshimfuanyi tshidi katshiyi ne muoyo to.—Ekesode 20:4, 5.

Tshitendelelu tshia dishima tshidi tshilongesha ne: ki mbibi bua kushipa bakuabu mu mvita to. Yezu wakamba ne: balunda ba Nzambi bavua ne bua kunangangana. Katuena mua kushipa bantu batudi banange to. (Yone 13:35) Mbibi nansha bua kushipa bantu babi. Pakalua baluishi ba Yezu bua kumukuata, kakitaba bua bayidi bende baluangane mvita bua kumusungila to.—Matayo 26:51, 52.

Tshitendelelu tshia dishima tshidi tshilongesha ne: nebakengeshe bantu babi mu inferno wa kadilu. Kadi Bible udi yeye ulongesha ne: mpekatu udi ufikisha ku lufu. (Lomo 6:23) Yehowa n’Nzambi wa dinanga. Nzambi wa dinanga udiku mua kukengesha bantu kashidi anyi? Tòo! Mu Mparadizu nemuikale anu tshitendelelu tshimuepele tshidi Nzambi wanyisha. (Buakabuluibua 15:4) Bitendelelu bionso bidi bilonda mashimi a Satana nebibutuke.