Dilongesha dia 12

Ntshinganyi tshitu tshienzekela muntu padiye ufua?

Lufu ndibenga kuikala ne muoyo. Lufu ludi bu tulu tukole. (Yone 11:11-14) Bafue kabatu bumvua anyi bamona to; ne kabatu bakula ta bela meji to. (Muambi 9:5, 10) Bitendelelu bia dishima bidi bilongesha ne: bafue badi baya ku bajangi bua kusomba ne bankambua babu. Bible katu ulongesha nanku to.

Bantu bakadi bafue kabena mua kutuambuluisha anyi kutuenzela bibi nansha. Bantu batu ne tshibidilu tshia kuenza malu a ntendelelu wa kabukulu ne tshia kulambula bakishi bintu batu bela meji ne: nebasankishe bantu bakaadi bafue. Malu aa kaena asankisha Nzambi to, bualu mmushindu udi Satana ushimangana nawu. Kaena mene mua kusankisha bafue to, bualu kabena ne muoyo nansha. Katuena ne bua kutshina anyi kutendelela bafue to. Nzambi nkayende ke utudi ne bua kutendelela.—Matayo 4:10.

Bafue nebikale kabidi ne muoyo. Yehowa neabishe bafue bua kuikalabu ne muoyo mu mparadizu pa buloba. Tshikondo atshi netshilue. (Yone 5:28, 29; Bienzedi 24:15) Nzambi udi mua kubisha bantu badi bafue anu bu muutu mua kubisha muntu ku tulu.—Mâko 5:22, 23, 41, 42.

Lungenyi lua se: katutu tufua, mmashimi adi Satana Diabolo mutangalaje. Satana ne ba-demon bende badi bapesha bantu meji a ne: mikishi ituku, itu yela bantu masama ne ibatatshisha mu mishindu mikuabu. Satana udi udinga bantu, pamu’apa mu bilota ne mu bikena-kumona. Yehowa kêna usanka to padiye umona bantu bakeba kuakula ne bafue.—Dutelonome 18:10-12.