Dilongesha dia 13

Mupongo ne manga mbintu bibi

Satana mmusue bua wikale upaka manga. Bantu ba bungi batu balambula bankambua anyi mikishi bintu bua kabapetshi diakabi to. Batu benza nanku bualu badi batshina bajangi. Batu bavuala tukanu (bake peshi mpeta) anyi shene ya maji. Batu banua anyi badilaba “bijimba” bidibu bela meji ne: bidi ne bukole kampanda. Bamue bantu batu basokoka anyi bajiika bintu mu nzubu yabu bela meji ne: bidi ne bukole bua kubakuba. Bamue batu bavuala “buanga anyi bijimba” bualu badi bela meji ne: nebibatutshishe diakalenga mu bungenda, mu mateta a mu kalasa peshi mu dibangilangana diabu bua dibaka.

Bua Satana kupangaye kukuenzela bibi, udie bulunda ne Yehowa. Yehowa Nzambi ne banjelu bende badi ne bukole bua bungi bupite bua Satana ne ba-demon bende. (Yakobo 2:19; Buakabuluibua 12:9) Yehowa utu pabuipi bua kuleja bukole bua kusungila balunda bende badi bamulamate ne muoyo mujima.—2 Kulondolola 16:9.

Dîyi dia Nzambi didi diamba ne: “Kanuenji malu a bena dialu” to. Yehowa kêna wanyisha majimbu, mupongo ne dipaka anyi dipakisha dia manga to; bualu bintu ebi bidi bibueja muntu mu malanda ne Satana Diabolo.—Lewitiki 19:26, MMM.