Lumu luimpe ludi ne dikuatshisha dilelela muaba uudi musombele
MU TSHIKONDO tshietu etshi, tutu tutamba kumvua bantu bamba ne: “Mêyi a Buena-Kristo kaena ne dikuatshisha to. Kaena ne tshidiwu mua kuenza munkatshi mua bantu ba mu tshikondo etshi badi ne malu mapite bungi.” Kadi, badi bamba ne: mu diyuki kampanda diakenzeka pankatshi pa Mohandas Gandhi (mulombodi wa bena Hindu) ne Lord Irwin (uvua kumpala muleji-mpala wa mukalenge wa bena Grande-Bretagne mu Inde), kuakapatuka bualu bukuabu bua menemene. Badi bamba ne: Lord Irwin wakakonka Gandhi bua kumanya tshivuaye mumone tshivua mua kujikija bilumbu bivua pankatshi pa ditunga dia Grande-Bretagne ne dia Inde. Gandhi wakangata Bible e kumubulula pa nshapita 5 wa mukanda wa Matayo yeye kuamba ne: “Tshikondo tshikala ditunga diebe ne dianyi mafikile onso ku ditumikila malongesha majadika kudi Kristo mu Muyuki wende wa pa Mukuna, dîba adi netujikije ki ng’anu bilumbu bia matunga etu nkayawu kadi ne bia buloba bujima.”
Muyuki au udi ulongesha bantu mua kukeba makanda a mu nyuma ne kuikala bapole-malu, bena ditalala, bena luse ne banangi ba buakane. Kawena upisha anu dishipangana ne dienda tshiendenda to, kadi udi upisha mene ne difiikilangana munda ne nkuka mibi ya mubidi. Udi upisha dishipa dibaka tshianana tshianana didi diabulula mêku ne dikengeshisha bana patupu. Udi utuambila ne: ‘Nunange nansha badi kabayi banunange, nupe bapele bintu, kanulumbuluishi bakuenu kakuyi luse, nuenzele bantu nenu binudi basue ne: banuenzele penu.’ Bantu buobu batumikile mibelu yonso eyi, bidi mua kubambuluisha bikole bia dikema. Bu bantu ba bungi ba muaba uudi musombele mua kutumikila mibelu eyi, nsombelu wa muaba au udi mua kulengela ne kulua muimpe mutambe!
Bantemu ba Yehowa batu balengeja nsombelu muaba udibu. Bible udi ubalongesha mua kunemeka dibaka. Badi bakolesha bana babu biumvuangane ne mêyi a buakane. Badi bashindika mushinga udi nawu dîku. Mêku adi mu buobumue adi mikale diambuluisha dimpe bua bantu ba muaba uudi, nansha mene bua ditunga dienu dijima. Kudi bilejilu bia bungi mu mianda ya kale bidi bileja muakabutuka makuabu matunga avua akokesha makuabu pa buloba bualu bantu bakatekesha malanda ne bena mêku abu ne kabidi bualu tshiendenda tshiakavula kuya ne kua tshianana. Padi bantu ba bungi ne mêku batamba kulonda bikadilu bia Bantemu ba Yehowa bia kutumikila mêyi a Buena-Kristo, buenzavi, tshiendenda ne dibunda bilumbu bidi bikepela muaba unudi basombele.
Bualu bukuabu bunene budi butatshisha bantu mu matunga mavule lelu’eu nkansungasunga bua makoba mashilangane adibu nawu. Pabi mupostolo Petelo yeye wakamba ne: ‘Ndi njingulula ne: Nzambi kêna ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’ Paulo wakafunda pende ne: ‘Kakuena muena Yuda anyi muena Gelika; kakuena mupika anyi mudishikamine; kakuena mulume anyi mukaji; bualu bua buonso buenu nudi muntu umue mu Kristo Yezu.’ (Bienzedi 10:34, 35; Galatia 3:28) Bantemu ba Yehowa badi bitaba mêyi aa. Bantu ba makoba a mishindu ne mishindu ne bisa bionso badi basomba ne benza mudimu kaba kamue ku tshilombuelu tshia midimu yabu, mu biro biabu bidi miaba mishilashilangane ne mu bisumbu biabu.
Mu Afrike mudi bimue bisamba bidi kabiyi mua kutuilangana kaba kamue kakuyi kujuka matandu to. Pabi, mu mpuilu ya Bantemu ba Yehowa itu yenzekamu, bantu ba bisamba bivule bishilangane batu badia, balala ne batendelela kaba kamue mu diumvuangana dia dikema, banangangane bu bana ba muntu. Banene ba mbulamatadi batu bakema bikole be patubu bamona malu a nunku. Tshimue tshilejilu tshia mudi Buena-Kristo bulelela busanga bantu pamue tshivua tshiumvuija mu tshikandakanda tshikuabu tshia ku New York (tshia mu dia 2 Tshimungu 1958 tshidi ne dîna ne: Amsterdam News). Bakafika ku diamba mushindu’eu bilondeshile malu akamonabu mu mpungilu wa bantu bafumine mu matunga a bungi utukadi batele ne wakasangisha Bantemu bapite pa 250 000 mu tshimenga tshia New York.
“Miaba yonso kuvua bafiike, batoke ne bena ku Asia ba nsombelu mishilashilangane, bantu bafumine miaba yonso; bonso bavua basombe kaba kamue basambakanangane, bikale ne disanka ne kabayi ne bualu ne muntu . . . Bantemu aba bafumine mu matunga 120 bavua basombe kaba kamue ne batendelela pamue mu ditalala, baleja bena Amerike mushindu udi bualu ebu mua kuenzeka bipepele . . . . Mpungilu eu ntshilejilu tshinene tshia mushindu udi bantu mua kuenza mudimu pamue ne kusomba kaba kamue kakuyi bualu.”
Bantu ba bungi badi mua kuamba ne: mêyi a Buena-Kristo kaena ne dikuathisha bua bantu ba mu tshikondo etshi to. Kadi, ntshinyi tshikuabu tshikadi tshilengeje malu anyi tshialua kualengeja mushindu’eu? Mêyi a Buena-Kristo adi mua kuambuluisha bantu ba muaba uudi musombele bikole buobu baatumikile mpindiewu; ne neikale mua kusangisha mu buobumue ‘matunga onso, bisamba bionso, ne bantu bonso’ ba pa buloba bujima patuadija Bukalenge bua Nzambi kukokesha bantu bonso.—Buakabuluibua 7:9, 10.
[Tshimfuanyi mu dibeji dia 23]
Bantu ba makoba a mishindu yonso ne bisa bionso badi benza mudimu pamue
[Tshimfuanyi mu dibeji dia 24]
Buena-Kristo budi ne dikuatshisha. Ntshinyi tshikuabu tshikadi tshilengeje malu mushindu’eu?