Nkonko itu bantu badi bajinga kumanya bulelela batamba kuela

Bikala Nzambi udi dinanga, bua tshinyi mmulekele malu mabi enzeka?

NZAMBI mmulekele malu mabi enzeka, ne bantu miliyo ne miliyo pa buloba apa badi benza malu mabi aa ku bukole. Tshilejilu, badi babundangana mvita, bela bana batekete bombe, banyangakaja buloba ne bakebesha biyole bia nzala. Bantu miliyo ya bungi badi banua makanya ne badikebela masama a tshiadi, benda tshiendenda ne bapia masama a mu bilamba, bakuatshika maluvu ne bapeta masama a mutshima, anu nanku. Bantu ba nunku ki mbasue nansha bia munyi bua malu mabi onso aa kujikawu to. Kadi tshidibu basue bua tshijika tshidi anu makenga adi afumina ku malu mabi adibu benza aa. Padibu bapola bivuabu bakune, badi babanga kudilakana bamba ne: “Bua tshinyi meme eu ndi mua kukenga nunku?” Ke kubangabu kudiwula Nzambi, anu bu mudi Nsumuinu 19:3 wamba ne: ‘Bupote bua muntu budi bunyanga njila wende, mutshima wende udi ukuatshila Yehowa tshiji.’ Ne bu Nzambi mua kudidinga kubakandika bua kabenji malu mabi, bavua mua kutuadija kudiabakena bamba ne: Nzambi nyawu utupangisha bua kuikala badikadile!

Bualu bunene budi Yehowa mulekele malu mabi mbua kujikija tshilumbu tshivua Satana mujule. Satana Diabolo wakamba ne: Nzambi kêna mua kuikala ne bantu pa buloba apa badi mua kushala bamulamate padibu mu dikenga to. (Yobo 1:6-12; 2:1-10) Yehowa mmulekele Satana ne muoyo bua Satana apete mushindu wa kujadika malu akambaye. (Ekesode 9:16) Bu mudi Satana muikale ne dipangadika dia kutshimuna mu malu ende au, udi anu utungunuka ne kukengesha bantu bua pamonabu nanku batombokele Nzambi. (Buakabuluibua 12:12) Kadi Yobo wakashala mulamate Nzambi. Ne Yezu pende wakashala mulamate Nzambi. Lelu’eu bena Kristo balelela badi pabu balamate Nzambi.—Yobo 27:5; 31:6; Matayo 4:1-11; 1 Petelo 1:6, 7.

Ndi musue kuitaba bualu bua mparadizu wa pa buloba muikala bantu ne muoyo wa kashidi, kadi nealue bulelela menemene anyi?

Kadi Bible yeye udi uleja malu munga mushindu. Bidi bimueneka bu bualu bukole budi bantu mua kuitabuja anu bualu badi mu makenga kukadi bidimu nkama ne nkama. Yehowa wakafuka buloba e kuambilaye bantu bua kubuuja ne balume ne bakaji bena malu makane bavua mua kukuba bikunyibua ne nyama ne kubulengeja menemene pamutu pa kubunyangakaja. (Tangila dibeji dia 12 ne dia 17.) Pamutu pa kumona dilaya dia Mparadizu edi bu bualu budi bantu kabayi mua kuitaba, makenga adiku lelu ke adi matambe kubipa ne kakuyi muntu wanyisha bua kutungunukawu. Mparadizu neapingane pa muaba wa makenga aa.

Mmunyi mundi mua kuandamuna bantu badi baseka bamba ne: Bible mmukanda udi ne mianu ya patupu, ne malu adimu ki mmalelela?

Kuitabuja malu aa ki nkuikala muena bitabataba to. ‘Ditabuja didi difuma ku diumvua.’ Patudi tulonga Dîyi dia Nzambi, tudi tumona meji ne ditabuja dietu didi dikola.—Lomo 10:17; Ebelu 11:1.

Dilonga dia bimue bintu bia kale bidi bitangila Bible didi dijadika ne: malu adibu batulondele mu Bible mmalelela. Mamanya a bena meji a bushuwa adi umvuangana ne Bible. Malu adi alonda aa avua mu Bible kale kumpala kua bena meji kabayi banji kuamanya: dilondangana dia malu mashilashilangane akamueneka pa buloba mu difukibua diabu, dimanya dia se: buloba butu dibulunge, kabuyi bukudika ku tshintu, ne muanda wa se: nyunyu itu imuangala.—Genese, nshapita 1; Yeshaya 40:22; Yobo 26:7; Yelemiya 8:7.

Mushindu udi milayi ya mu Bible ikumbana udi uleja ne: mukanda eu mmufundisha ku nyuma wa Nzambi. Danyele wakadianjila kumanyisha dijuka ne dikuluka dia matunga avua mua kukokesha makuabu pa buloba ne tshikondo tshivua Masiya ne bua kulua ne tshivuabu ne bua kumushipa. (Danyele, nshapita 2, 8; Danyele 9:24-27) Lelu’eu, milayi mikuabu idi yenda ikumbana, ileja ne: tudi mu ‘matuku a ku nshikidilu.’ (2 Timote 3:1-5; Matayo, nshapita wa 24) Muntu nansha umue kêna mua kudianjila kumanya malu aa to. (Yeshaya 41:23) Bua kumanya malu makuabu, udi mua kubala mikanda ibidi eyi mipatula kudi Bantemu ba Yehowa: La Bible: Parole de Dieu ou des hommes? ne wa Y a-t-il un Créateur qui se soucie de vous?

Mmunyi mundi mua kumanya mua kuandamuna nkonko ya malu adi atangila Bible?

Udi ne bua kulonga Bible ne kuelangana meji bua malu audi ulongamu, eku ulomba Nzambi bua kukulombolaye ne nyuma wende. (Nsumuinu 15:28; Luka 11:9-13) Bible udi wamba ne: ‘Biapanga mukuabu wenu meji, aalombe kudi Nzambi udi upa bonso ne mutshima mutoke kayi ubatobolola; neamupebue.’ (Yakobo 1:5) Kudi kabidi mikanda idi yambuluisha bua kulonga nayi Bible iudi mua kupeta. Pa tshibidilu, bitu bikengela diambuluisha dia bakuabu, bienza anu bu muakalonga Filipo ne muena Etiopa. (Bienzedi 8:26-35) Bantemu ba Yehowa badi balonga Bible ne bantu badi bajinga kumanya bulelela ku nzubu yabu kabayi babalomba dieya. Kuelakanyi bua kubalomba bua kulonga nebe to!

Bua tshinyi bantu ba bungi badi baluisha Bantemu ba Yehowa ne bangambila bua tshilongi nabu Bible?

Bantu bakaluisha Yezu bua mudimu wa buambi uvuaye wenza. Ne Yezu wakamba ne: bantu bavua ne bua kuluisha kabidi bayidi bende. Pavua eku bamue basanka bua mushindu uvua Yezu ulongesha, baluishi bamfumu ba bitendelelu buobu bakabamba ne: “Bakunudinga ne nuenu kabidi, anyi? Nuenu nukadi bamoneku umue wa munkatshi mua bamfumu benu anyi wa munkatshi mua Bafalese betu mumuitabuje, anyi?” (Yone 7:46-48, MML; 15:20) Ba bungi ba ku bantu badi bakuambila bua kubenga kulonga ne Bantemu pamu’apa ki mbabamanye bimpe to; peshi badi babelela patupu meji mabi. Longa ne Bantemu, ne dimuena wewe nkayebe bikala lumvu luebe lua malu a mu Bible luenda lukola peshi kaluyi luenda lukola.—Matayo 7:17-20.

Bua tshinyi Bantemu batu baya ku nzubu ya bantu bakadi bikale ne biabu bitendelelu?

Badi benza nunku bua kulonda tshilejilu tshia Yezu. Yeye wakaya kudi bena Yuda. Bena Yuda bavua ne tshiabu tshitendelelu, kadi mu malu a bungi katshivua tshilonda mudi Dîyi dia Nzambi diamba to. (Matayo 15:1-9) Bantu ba bisamba bionso badi ne biabu bitendelelu bia mishindu ne mishindu, nansha bidibu babikila ne: mbia bena Kristo anyi bidi kabiyi bia bena Kristo. Kulonda malu adi umvuangana ne Dîyi dia Nzambi kudi ne mushinga be. Ke bualu kayi padi Bantemu badienzeja bua kuyisha Dîyi dia Nzambi bidi bileja ne: mbanange bantu nabu.

Bantemu ba Yehowa batu bamba ne: anu tshiabu tshitendelelu ke tshidi tshilelela anyi?

Muntu yonso wa mashi ne mâyi eu utu wangata tshitendelelu tshiende ne mushinga; ne utu wela meji ne: ntshilelela. Biobi kabiyi nanku, bua tshinyi udi utendelelamu? Badi badimuija bena Kristo ne: “Nujingulule malu onso; nulamate malu adi mimpe.” (1 Tesalonike 5:21) Muntu yonso udi ne bua kujadika bikala ende malu adibu bamulongesha umvuangana menemene ne Bible, bualu ditabuja dilelela didi anu dimuepele. Efeso 4:5 udi ujadika bualu ebu pa kuamba ne: ‘Mukalenge umue udiku, ditabuja dimue, dibatiza dimue.’ Yezu kakanyisha meji adi kaayi majalame adi nawu bantu ba bungi lelu a ne: kudi njila ya bungi, bitendelelu bia bungi, kabidi ne: bionso bidi bifikisha anu ku lupandu. Kadi wakamba ne: ‘Mushiku wa mbelu udi mubumbakane, ne njila wa ku muoyo udi mubumbakane, ne bantu banyabanya badi bamumona.’ Bantemu ba Yehowa mbajadike ne: bakadi bapete njila eu. Tshianana bavua mua kukeba tshitendelelu tshikuabu.—Matayo 7:14.

Batu bela meji ne: anu buobu nkayabu ke bapanda anyi?

Kadi, bantu miliyo ya bungi bavua ne muoyo mu nkama ya bidimu bikadi bipite ne bavua kabayi Bantemu ba Yehowa nebajuke ku lufu. Ba bungi badi ne muoyo lelu’eu badi mua kufika ku dianyisha bulelela ne buakane bangabanga ne “dikenga dinene” kuluadi, ne nenku kulua kupeta lupandu. Kabidi, Yezu wakamba ne: katuena ne bua kutuilangana mushinga to. Tuetu tudi tumuena muntu pa mpala, kadi Nzambi udi umona munda mua muntu. Yeye udi umona malu anu mudiwu ne udi ulumbuluisha ne luse. Mmufile bukenji bua kulumbuluisha bantu mu bianza bia Yezu, ki mmu bianza bietu to.—Matayo 7:1-5; 24:21; 25:31.

Bantu badi babuela mu bisangilu bia Bantemu ba Yehowa badi pabu mua kufila mapa anyi?

Bua bidi bitangila makuta adi bantu mua kufila bu abu mapa, mupostolo Paulo wakamba ne: ‘Muntu ne muntu afile bintu bu muakadisunguilaye mu mutshima wende; kafidi ne kanyinganyinga, anyi bu muenzeja ku bukole; bualu bua Nzambi udi musue muena kupa udi ufila ne disanka.’ (2 Kolinto 9:7) Mu Nzubu ya Bukalenge ne miaba idi Bantemu ba Yehowa benzela mpungilu, kabatu benda ne tubondu peshi bitunga anyi malongo bua kusangisha makuta to. Mbateke tushete bua ne: muntu yonso udi ujinga kufila ende mapa elemu tshiende tshidiye natshi. Kakuena muntu udi umanya tshidi bakuabu bafila peshi bikalabu bafile anyi kabayi bafile dipa to. Bamue badi ne mushindu wa kufila bia bungi kupita bakuabu. Banga pabu badi mua kuikala bapange bapangilemu mushindu wa kuelamu nansha kantu. Yezu wakaleja lungenyi luakane pakakulaye bua tshibutshilu tshia mu ntempelo wa mu Yelushalema ne bantu bavua belamu mapa. Wakaleja ne: tshidi ne mushinga ntshidi muntu mukokeshe bua kufila ne dijinga didiye nadi, kadi ki mbungi bua makuta adiye mua kufila to.—Luka 21:1-4.

Meme mulue Ntemu wa Yehowa, nengikale panyi ne bua kuyisha anu mutubu benza emu anyi?

Padi muntu umanya menemene lumu lua Mparadizu wa pa buloba mu Bukalenge bua Kristo, udi ujinga pende bua kumanyisha bakuende bualu ebu. Wewe pebe ke muwenza anyi? Ndumu luimpe be!—Bienzedi 5:41, 42.

Eu ke mushindu munene wa kuleja ne: udi muyidi wa Yezu Kristo. Mbabikile Yezu mu Bible ne: “Mujadiki [anyi ntemu] wa lulamatu ne mulelela.” Pavuaye pa buloba apa wakayisha bantu wamba ne: ‘Bukalenge bua mu diulu budi pepi,’ ne wakatuma bayidi bende bua kuyishabu nunku. (Buakabuluibua 3:14, MML; Matayo 4:17; 10:7) Yezu wakatumina bayidi bende dîyi pashishe ne: ‘Yayi bienu, nuvuije ba bisamba bionso bayidi, nubayishe.’ Wakamanyisha kabidi ne: bangabanga ne nshikidilu kuluaye, ‘nebambile bantu bonso ba pa buloba lumu luimpe elu lua bukalenge, neluikale tshimanyishilu ku bisamba bionso’—Matayo 24:14; 28:19, 20.

Kudi mishindu mivule ya kumanyisha bantu lumu luimpe elu. Misangu mivule tutu ne mushindu wa kuyisha patudi tuyikila ne balunda betu anyi ne bamanyangana netu. Bua kuyisha bantu mushindu’eu, bamue batu babafundila mikanda anyi babela nshinga. Bakuabu batu batumina bamanyangana nabu mikanda idi ne malu adibu bamone ne: adi mua kubasankisha. Bantemu batu kabidi baya ne lumu luimpe ku nzubu ne ku nzubu bualu badi ne dijinga dia kupetangana ne muntu yonso.

Bible udi ubikila bantu ne musangelu ne: ‘Nyuma ne mukaji musela badi bamba ne: Lua. Udi umvua ambe biende ne: Lua. Ne udi ne nyota alue biende; udi musue, angate mâyi a muoyo tshianana.’ (Buakabuluibua 22:17) Mudimu wa kumanyisha bakuabu lumu lua Mparadizu wa pa buloba ne masanka ikalamu ng’wa kuenza kakuyi muntu wenzeja mukuabu ku bukole to; mmudimu wa kuenza bikale ne dijinga dikole, muoyo wa munda usunsuma bua kumanyisha bakuabu lumu luimpe elu.

Tudi bajadike se: udi ne nkonko mikuabu idi itangila Bantemu ba Yehowa ne malu adibu balongesha anyi bitabuja. Pamu’apa kudi nkonko mikuabu idi ikunyungulula mutu. Netusanke bua kuandamuna nkonko yebe. Katuena ne muaba wa bungi wa kuyifunda mu kakanda aka to, nunku tudi tukulomba bua uyele Bantemu ba muaba uudi musombele. Udi nansha mua kuya kubelayi ku Nzubu wabu wa Bukalenge kumpala anyi panyima pa bisangilu biabu anyi dîba didibu balua ku mbelu kuebe. Peshi udi mua kutuma nkonko yebe kudi Société Watch Tower mu adrese mukumbanyine ku idi kuinshi eku.