Dikankamija bantu bimpe

BAKULU badi ne bua kuikala bantu badi bamanye mua “kubela [anyi kukankamija] bantu ne dilongesha dilelela.” (Tito 1:9, MMM) Imue misangu batu bakankamija bantu mu bikondo bikole menemene. Bitu bikengela kufila mibelu idi yumvuangana ne tshidi Mifundu Minsantu yamba. Ke bualu kayi bakulu badi ne tshia kutumikila mubelu eu: “Wikale . . . ukolesha bantu ku muoyo.” (1 Tim. 4:13, MMM) Nansha mudi dilonga edi ditangila bangabanga bakulu anyi aba badi basue kulua bakulu, tshidibi kutu bikondo bitu baledi ne bua kukankamija bana babu peshi tshidi bambi ba lumu luimpe ne bua kukankamija balongi babu ba Bible. Badi pabu ne bua kulonda mibelu eyi.

Bikondo bia kukankamija bantu. Bua kumanya dîba dia kukankamija bantu, mbimpe kuanji kutangila nsombelu ivuabu bafike ku dikankamijila bantu, idibu baleje mu Bible. Tshilejilu, mupostolo Petelo wakabela bakulu bua kuenza mudimu wabu wa balami ba mikoko ya Nzambi bilenga. (1 Pet. 5:1, 2) Mupostolo Paulo wakambila Tito bua kubela bansonga bua “bikale ne meji.” (Tito 2:6, MMV) Wakasengelela kabidi bena Kristo nende bua ‘kuikala bonso diyi dimue’ ne kuepuka bantu badi bakeba matapuluka mu bisumbu. (1 Kol. 1:10; Lomo 16:17, MMM; Filip. 4:2) Nansha muakela Paulo tshisumbu tshia Tesalonike kalumbandi bua malu abu mimpe, wakabalomba bua kulonda bimpe mudibi bikengela malu avuabu babambile. (1 Tes. 4:1, 10) Petelo wakasengelela pende bena Kristo nende bua ‘kuepuka bijingajinga bia mubidi.’ (1 Pet. 2:11, MMM) Yuda wakakankamija bana babu bua ‘kuditshinta bikole bua ditabuja’ bua kuepuka ngikadilu mibi ya bantu badi kabayi batshina Nzambi. (Yuda 3, 4) Paulo wakalomba bena Kristo bonso bua kukankamijangana bua nansha umue wa kudibu kalekedi mpekatu imupita makanda to. (Eb. 3:13) Petelo wakasengelela bena Yuda bavua kabayi banji kuitabuja Yezu Kristo ne: ‘Disungilayi kudi ba mu tshikondo etshi tshia tshitshu.’​—Bien. 2:40.

Mu nsombelu eyi, nngikadilu kayi idi ikengedibua bua kumona mua kukankamija bantu bikole bia menemene? Mmunyi mutudi mua kukankamijangana katuyi tuenzeja bantu malu ku bukole anyi tubatshintshimika nawu ku bukole?

“Bua dinanga.” Patudi tukankamija bantu kabiyi “bua dinanga,” bidi mua kubuosha ku muoyo bibi. (Filem. 9) Eyowa, padibi bikengela bua bantu kuenza malu ne lukasa kakuyi dijingakana, ngakuilu wa ngamba-malu udi ne bua kuleja mudibi bilomba kuenza malu ne mitalu. Diakula bitekete didi mua kuleja ne: udi welakana, bienze bu muntu ulomba luse. Kadi tudi ne bua kuakula ne muoyo umue, tuditeka pa muaba wa bakuabu. Diakula ne dinanga ke didi mua kusaka bantu ku dienza biudi ubalomba. Pavua Paulo wakula buende ne bua bena diende, wakambila bena Tesalonike ne: ‘Bu munudi bamanye mutuakanuenzela muntu ne muntu wa munkatshi muenu, bu mudi tatu wenza ne bana bende balela, patuakanusengelela.’ (1 Tes. 2:11) Ne dinanga dionso, batangidi bena Kristo abu bakasengelela bana babu. Malu audi wamba adi ne bua kuleja muudi uditatshisha bua bantu badi bakuteleja.

Ikala ne bukalanga. Kutapi bantu baudi usaka bua kuenza malu kampanda ku muoyo to. Kadi wamanya, kubengi bua kubambila “malu onso adi Nzambi musue.” (Bien. 20:27) Bantu badi ne dianyisha bua mibelu iudi ubapesha kabakufika munda anyi kukukina bua muudi mubambile bua kuenza malu makane to.​—Mus. 141:5.

Kumpala kua kubela muntu, bitu bimpe misangu ya bungi kuanji kumuela kalumbandi ka muoyo umue bua ngikadilu yende kampanda milenga. Ela meji bua malu malenga atu bana betu benza, ela meji bua malu atu asankisha Yehowa bu mudi: ditabuja ditu dimuenekela ku bienzedi biabu, dinanga didi dibasaka bua kudienzeja muabu muonso, ne bua mutubu bashala balamate Yehowa nansha mu nsombelu mikole. (1 Tes. 1:2-8; 2 Tes. 1:3-5) Ebi nebiambuluishe bana betu bua kudimona pabu bantu, ne kumona ne: bulelela, badi babumvuila pabu; mushindu eu nebadiakaje bua kuteleja tshiudi ulua kubambila panyima.

“Ne muoyo-mule.” Mibelu idi ikengela kuyifila “ne muoyo-mule.” (2 Tim. 4:2, NW) Muoyo-mule utu ulomba tshinyi? Utu ulomba kutantamena malu mabi anyi bilumbu ne lutulu. Muntu muena muoyo-mule udi utekemena se: bateleji nebalonde tshidiye wamba. Kufila mibelu kua nunku kudi kufikisha bateleji ku dibenga kuela meji a ne: udi ubangata bu bantu babi ba menemene. Paudi wakula bileja muudi mushindike ne: bana betu badi benza muabu muonso bua kukuatshila Yehowa mudimu, nebaluangane muabu muonso bua kuenza malu makane.​—Eb. 6:9.

Ne ‘dilongesha dilelela.’ Mmunyi mudi mukulu mua ‘kubela bantu ne dilongesha dilelela’? Pa ‘[kulamata anyi] kunanga dilongesha dijalame.’ (Tito 1:9, MMM) Pamutu pa kulonda mmuenenu webe wa malu, mbimpe ushindamene pa Dîyi dia Nzambi. Ulekele Bible ikala ukuleja tshia kuamba. Leja bimpe bidi muntu mua kupeta padiye utumikila malu audi wamba. Wikale mumanye bimpe bipeta bibi (bidi muntu mua kupola mpindieu ne mu matuku adi kumpala) bua dibenga kutumikila Dîyi dia Nzambi; uleje bipeta ebi bua kubatuisha ne kuleja bua tshinyi badi ne bua kuenza malu adi malenga.

Ikala mujadike ne: udi umvuija bantu tshidibu ne bua kuenza ne mushindu wa kutshienza bimpe. Enza bua ngelelu webe wa meji ikale umvuangana bilenga ne Mifundu Minsantu. Pikala Mifundu Minsantu ishila muntu mpunga kampanda wa kudipangadijila tshidiye mua kuenza, umuleje mpunga eu. Mpindieu mu nkomenu, ukoleshe bantu ku muoyo bua kuangatabu dipangadika dia kutumikila biudi mubambile.

Ne ‘dikima dikole mu ditabuja.’ Bua muntu kubela bakuabu bimpe, udi ne bua kuikala ‘ne dikima dikole mu ditabuja.’ (1 Tim. 3:13) Tshidi mua kumupesha dikima edi ntshinyi? Mpadi ‘tshilejilu tshiende tshia nsombelu mulenga’ tshiumvuangana ne bualu budiye ukankamija bana betu bua kuenza. (Tito 2:6, 7, MMM; 1 Pet. 5:3) Padibi nanku, bantu badi bamona se: kêna ubalomba tshidiye yeye kayi mua kuenza to. Badi bajingulula ne: badi mua kuidikija ditabuja diende bu mudiye pende uditatshisha bua kuidikija Kristo.​—1 Kol. 11:1; Filip. 3:17.

Mibelu miashila pa Dîyi dia Nzambi ne mifila ne dinanga idi mua kuenza malu manene. Badi ne bujitu bua kufila mibelu eyi badi ne bua kuyifila bimpe.​—Lomo 12:8.