Nshapita Muisambombo
Tshilumbu tshidi tshitutangila bonso
1, 2. (a) Ntshilumbu kayi tshiakajula Satana mu Edene? (b) Mmushindu kayi uditshi tshimuenekela ku mêyi akambaye?
WEWE pebe udi mu tshilumbu etshi tshidi tshitangila bantu bonso. Kuudi munemenene nekuleje ni udi mua kupeta anyi kubenga kupeta muoyo wa tshiendelele. Tshilumbu etshi tshiakatuadija pakajuka buntomboji mu Edene. Satana wakakonka Eva ne: ‘Nzambi wakamba ne: Kanudi mamuma a mitshi yonso idi mu budimi anyi?’ Eva wakandamuna ne: Nzambi mmuambe anu bua mutshi umue ne: ‘kanuadi, kanualengi, bua kanufu.’ Pashishe Satana wakamuenesha ne: Yehowa mmuena dishima. Kulejaye ne: bua Adama ne Eva kuikalabu ne muoyo, kabavua ne bua kutumikila Nzambi to. Satana wakaleja ne: Nzambi uvua ubapangisha bumue bualu buimpe: bua kuikala kudielela mikenji buobu nkayabu. Satana wakamba ne: ‘Nzambi udi mumanye ne: panuadia mamuma au, mêsu enu neabuluke, nenuikale bu Nzambi, nenumanye malu mimpe ne malu mabi.’—Genese 3:1-5.
2 Satana uvua musue kuamba ne: bantu badi mua kuikala ne nsombelu muimpe mutambe buobu bikale badiangatshila nkayabu mapangadika pamutu pa kutumikila mikenji ya Nzambi. Nanku wakela nkokeshilu wa Nzambi mpata. Bualu ebu buakajula tshilumbu tshitambe bunene tshidi tshitangila bumfumu butambe bunene bua Nzambi, mmuomumue ne: bukenji buende bua kukokesha. Nanku lukonko e kujuka ne: Ntshinyi tshidi tshitambe buimpe bua bantu: mbukokeshi bua Yehowa anyi peshi mbukuabu? Yehowa uvua mua kuikala mushipe diakamue Adama ne Eva, kadi kuenza nanku kakuvua mua kukosa tshilumbu tshia bumfumu atshi bimpe to. Nzambi wakalekela bantu bavulangana munkatshi mua tshikondo tshile bua kuleja menemene tshivua dimuela nyima ne dipetula mikenji yende mua kulela.
3. Ntshilumbu kayi tshibidi tshiakajula Satana?
3 Satana kakela bukenji budi nabu Yehowa bua kukokesha amu mu Edene nkayamu mpata to. Wakela too ne lulamatu ludibu mua kuleja Yehowa mpata. Etshi tshiakalua tshilumbu tshibidi tshiakajuka. Tshilumbu tshiende etshi tshiakafika ne ku ditangila ndelanganyi ya Adama ne Eva ne bana bonso ba mu nyuma ba Nzambi, kutangila too ne Muan’a bute munanga wa Yehowa. Tshilejilu, mu tshikondo tshia Yobo, Satana wakamba ne: badi bakuatshila Yehowa mudimu kabena bamukuatshilawu bualu mbamunange ne banange nkokeshilu wende to, kadi mbua disanka diabu nkayabu. Wakamba ne: buobu badidinge anu babatete, buonso buabu nebalonde majinga mabi.—Yobo 2:1-6; Buakabuluibua 12:10.
Tshidi miyuki ya kale mijadike
4, 5. Miyuki ya kale mmileje tshinyi bua didilombola dia muntu yeye nkayende?
4 Bualu bunene bua kumanya mu tshilumbu etshi tshia bumfumu mbua se: Nzambi kavua mufuke bantu bua dimue dituku kuelabu bukokeshi buende nyima ne kupeta disanka to. Wakabapesha mikenji yende miakane bua diakalenga diabu. Muprofete Yelemiya wakamba ne: “[Yehowa], ndi mumanye ne: muntu kena mfumu wa njila udiye ulonda, muntu wendenda ewu kena ne bukole bua kuludika makasa ende. [Yehowa], unnyoke.” (Yelemiya 10:23, 24, MMM) Nunku Dîyi dia Nzambi didi ditulomba ne: “Eyemena Yehowa ne mutshima webe wonso, kueyemenyi dijingulula diebe dia mianda.” (Nsumuinu 3:5) Anu mudi Nzambi katshia ku tshifukilu muele mikenji idi bantu ne bua kunemeka bua kushalabu ne muoyo, mmuele kabidi mikenji ya mu nsombelu idi mua kupetesha bantu nsombelu mulenga padibu bayitumikila.
5 Kakuyi mpata, Nzambi uvua mumanye bimpe ne: bantu kabavua mua kupeta diakalenga mu didilombola buobu nkayabu, babenga bukokeshi buende. Bantu mbele bukokeshi bua Nzambi nyima, mbapatule bididi, malu a mpetu ne a Nzambi bia mishindu ne mishindu, kadi bionso ebi anu mu tshijengu. Malu aa mmakebeshe bilumbu mu bantu, kufikisha ku malu a tshikisu, mvita ne lufu. Bible udi wamba ne: “Muntu [udi ukokesha] mukuabo bua kumukengesha.” (Muambi 8:9, MMM) Malu aa ke malu adi mafikile bantu katshia ku kale. Anu muvua Bible mudianjile kuamba, bantu babi ne badingi ba bakuabu mbatungunuke ne ‘kudiundadiunda mu malu mabi.’ (2 Timote 3:13) Mu bidimu bia 1900 (mudi malu a bena siyanse ne bena biamu maye kumpala bitoke) muvua muenzeke mianda mibi mitambe. Mêyi a mu Yelemiya 10:23 mmalue kumueneka malelela bualu bantu kabavua bafukibue bua kudilombola to.
6. Mmushindu kayi wajikija Nzambi mu katupa kîpi emu tshilumbu tshia dimuela nyima dia bantu?
6 Malu adi akuatshisha buôwa adi bipeta biawu bibi bishala kabiyi bijika mmenzeke bualu bantu badi bela Nzambi nyima mmaleje malejilemu ne: bukokeshi bua bantu kabuena mua kubafikisha ku diakalenga nansha. Anu bukokeshi bua Nzambi ke tshintu tshimuepele tshidi mua kufikisha bantu ku disanka, ku dishala mu buobumue, ne ku dikala ne muoyo ne makanda a mubidi. Dîyi dia Nzambi didi dileja ne: dilekela bua bantu kuanjibu kudikokesha nkayabu didi Yehowa mulekele dikadi pa kufika ku ndekelu. (Matayo 24:3-14; 2 Timote 3:1-5) Mu katupa kîpi emu, yeye neatangile malu a bantu bua kujadika bukokeshi buende pa buloba. Bible udi ulaya ne: ‘Mu matuku a bakalenge aba [makalenge a bantu adiku mpindieu] Nzambi wa mu diulu neajadike bukalenge bukuabu [mu diulu] budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu [bantu kabakukokesha kabidi pa buloba nansha], kadi nebutshibule makalenge [a lelu] aa onso bitupa bitupa, nebuabutule, ne buobu nebujalame tshiendelele.’—Danyele 2:44.
Tupandukayi bua kubuela mu bukua-panu bupiabupia bua Nzambi
7. Patuishabu bukokeshi bua bantu ku tshibungubungu kudi bua Nzambi, nnganyi wapanduka?
7 Patuishabu bukokeshi bua bantu ku tshibungubungu kudi bukokeshi bua Nzambi, nnganyi wapanduka? Bible udi wandamuna ne: ‘Badi ne mitshima miakane [bantu badi batua nyama ku mikolo bukenji budi nabu Nzambi bua kukokesha] nebashikame mu buloba, badi ne mutshima umue mutoke nebajalame. Kadi nebajimije bantu babi [badi kabayi batua nyama ku mikolo bukenji budi nabu Nzambi bua kukokesha] pa buloba.’ (Nsumuinu 2:21, 22) Mufundi wa Misambu wakamba bia muomumue ne: ‘Tshitupa tshîpi katshiyi tshianji kulepa, muntu mubi kêna wikalaku kabidi. Bantu bakane nebapiane buloba, nebashikamemu tshiendelele.’—Musambu 37:10, 29.
8. Mmushindu kayi wikala Nzambi mua kujadika anyi kubingisha menemene bumfumu buende?
8 Pabutula Nzambi bulongolodi bua Satana, neateke bukua-panu buende bupiabupia, kakuakuikala tshikisu, mvita, bupele, makenga, masama ne lufu bidi bikuate bantu ku bupika kukadi bidimu binunu ne binunu. Bible udi umvuija bimpe masanka adi mindile bena butumike wamba ne: ‘[Nzambi] neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’ (Buakabuluibua 21:3, 4) Ku butuangaji bua Bukalenge buende bua mu diulu budi Kristo ulombola, Nzambi neajadike bulelela ne: yeye ke udi ne bukenji bua kuikala Mukalenge wetu, mmumue ne: Mukokeshi wetu.—Lomo 16:20; 2 Petelo 3:10-13; Buakabuluibua 20:1-6.
Malu akenza bantu bua tshilumbu etshi
9. (a) Mmunyi muvua bantu bavua bashale balamate Yehowa bangata dîyi diende? (b) Mmushindu kayi uvua Noa muleje lulamatu luende, ne mmunyi mudi tshilejilu tshiende mua kutuambuluisha?
9 Katshia ku bikondo bia kale, kuvua balume ne bakaji ba ditabuja bavua balamate Yehowa, bamuangata menemene bu Mukalenge wabu. Bavua bamanye bimpe ne: bua kuikalabu ne muoyo, bavua ne bua kumuteleja ne kumutumikila. Noa uvua umue wa ku bantu abu. Nzambi wakamuambila ne: ‘Nshikidilu wa bantu bonso wakufika kumpala kuanyi. Enza biebe buatu.’ Noa wakatumikila Yehowa. Nansha muakadimuijabu bantu tshikondo atshi, bakuabu bakatungunuka amu ne nsombelu uvuabu nende bienze anu bu se: kakuvua bualu bua pa buabu buvua mua kuenzeka to. Kadi Noa wakenza buatu bunene ne kuyisha bantu malu makane a Yehowa. Bible udi wamba ne: “Noa wakenza nunku; wakenza mianda yonso yakamuambila Nzambi.”—Genese 6:13-22; Ebelu 11:7; 2 Petelo 2:5.
10. (a) Mmunyi muvua Abalahama ne Sala batue bumfumu bua Yehowa nyama ku mikolo? (b) Mmushindu kayi udi tshilejilu tshia Abalahama ne tshia Sala mua kutuambuluisha?
10 Abalahama ne Sala bavua pabu bashiye tshilejilu tshimpe tshia ditua bumfumu bua Yehowa nyama ku mikolo bualu bakenza malu onso akabalomba Nzambi bua kuenza. Bavua basombele mu tshimenga tshia Ula (Mu bena Kasada), tshivua tshimenga tshia bubanji bua bungi. Kadi pakambila Yehowa Abalahama bua kuyaye mu ditunga dikuabu, divuaye kayi nansha mumanye, Abalahama “wakaya bu muakamba Yehowa.” Kakuyi mpata, Sala uvua ne nsombelu mulenga: uvua ne nzubu ne balunda ne balela kabidi. Kadi, wakakokela dîyi dia Yehowa ne dia bayende e kuyaye mu buloba bua Kanâna nansha muvuaye kayi mumanye nsombelu uvuamu.—Genese 11:31–12:4; Bienzedi 7:2-4.
11. (a) Mmu nsombelu kayi muvua Mose mutue bumfumu bua Yehowa nyama ku mikolo? (b) Mmunyi mudi tshilejilu tshia Mose mua kutuambuluisha?
11 Muntu mukuabu wakatua bumfumu bua Yehowa nyama ku mikolo m’Mose. Wakenza nanku mu lutatu lukole lua dikema, wakatuilangana ne Palô (anyi Faraone) wa mu Ejipitu mpala ne mpala. Kabiena bisua kumvuija ne: Mose uvua udieyemena to. Kadi tshidibi, uvua welakana bualu kavua wakula bimpe to. Nansha nanku, Mose wakatumikila Yehowa. Ku dikuatshisha dia Yehowa ne dia muanabu Alona, Mose wakamanyisha Palô (uvua ne tshitshiu au) dîyi dia Yehowa misangu ne misangu. Too ne bamue ba ku bena Isalele bavua bajana Mose bikole. Kadi Mose yeye wakenza malu onso avua Yehowa mumuambile ne lulamatu luonso, ku ndekelu bena Isalele kupikudibuabu mu Ejipitu ku butuangaji buende.—Ekesode 7:6; 12:50, 51; Ebelu 11:24-27.
12. (a) Ntshinyi tshidi tshileja ne: kuikala ne lulamatu kudi Yehowa ki nkuenza patupu malu adi Nzambi mufundishe to? (b) Mmunyi mudi dijingulula dia lulamatu lua nunku mua kutuambuluisha bua kutumikila mêyi adi mu 1 Yone 2:15?
12 Bantu bavua balamate Yehowa kabavua bamba ne: tshivuabu babalombe tshivua anu kutumikila malu avua Nzambi mufundishe to. Pavua mukaji wa Potifâ mutete bua kulobesha Yosefe bua kuendaye nende, kakuvua mukenji wa Nzambi mufunda uvua ukandika tshiendenda to. Kadi, Yosefe uvua mumanye mushindu uvua Yehowa mubanjije dibaka mu Edene. Uvua mumanye bimpe ne: kuenda ne mukaji wa bende kakuvua mua kusankisha Yehowa nansha. Yosefe kavua ne meji a kuteta bua kumona mushindu uvua Nzambi mua kumulekela bua yeye kuanjiku kuidikija bena Ejipitu to. Wakalonda ngikadilu udi Yehowa wanyisha, kuelanganaye meji bua malu adi Nzambi wenzela bantu ne pashishe kutumikila tshivuaye mujingulule ne: tshivua bushuwa disua dia Nzambi.—Genese 39:7-12; Musambu 77:11, 12.
13. Mmushindu kayi uvua Diabolo mutanduke bimpe ne: mmuena dishima bua bidi bitangila (a) Yobo? (b) bena Ebelu basatu?
13 Badi bamanye Yehowa bulelela menemene kabena bamuela nyima nansha padibu bapeta mateta makole to. Satana wakajula tshilumbu ne: Yobo uvua mua kubenga Nzambi bu yeye mua kujimija bintu bivuaye nabi bionso peshi kupeta disama, nansha muvua Yehowa yeye umukosela katshi. Kadi Yobo wakaleja ne: Diabolo uvua muena dishima, nansha muvuaye kayi mumanye tshivua makenga amufikila malondangane nanku. (Yobo 2:9, 10) Panyima pa bidimu nkama ne nkama, Satana wakakeba anu bua kujadika tshivuaye muambe, kusakaye mukalenge wa tshikisu wa bena Babulona bua kufunyinaye bansonga basatu bena Ebelu, ubakanyina bua kubashipa mu tshikutu tshia kapia bu buobu mua kudidinga kubenga bua kukukuila lupingu luvuaye muenze. Bu muvuabu ne bua kusungula bua kutumikila dîyi dia mukalenge au anyi kutumikila mukenji wa Yehowa uvua ukandika ditendelela mpingu, bansonga abu bakamba kabayi bapingana tshianyima ne: bavua ne bua kusadila Yehowa ne amu yeye ke uvua wabu Mfumu Munene. Kulamata Nzambi kuvua ne mushinga wa bungi ku mêsu kuabu kupita muoyo uvuabu nawu!—Danyele 3:14-18.
14. Tuetu bantu bapange bupuangane tudi mua kujadika ne: tudi balamate Yehowa munyi?
14 Bilejilu ebi bidiku bituleja ne: bua muntu kulamataye Yehowa udi ne bua kuikala mupuangane peshi ne: muntu udi wenza tshilema kuende nkujike anyi? Kabiena nanku to. Bible udi utumanyisha ne: Mose wakenza pende bilema. Nansha muvuabi kabiyi bimusankishe, Yehowa kakabenga Mose to. Bapostolo ba Yezu Kristo bavua pabu ne biabu bilema. Bu mudi Yehowa mumanye bimpe ne: tudi bapiane dipanga bupuangane, bidi bimuenza disanka padiye umona katuyi tulengulula bua kuenza disua diende ku bukole mu malu onso. Tuetu bafike ku dienza malu mabi bua butekete bua mubidi, bidi ne mushinga bua tuetu kunyingalala ne muoyo mujima ne kuepuka bua kulua ne tshibidilu tshia kuenza malu mabi. Patudi tuenza nunku, tudi tuleja ne: tudi banange bulelela malu adi Yehowa wamba ne: mmimpe, ne tudi bakine adiye uleja ne: mmabi. Tudi mua kulua bantu ba ngikadilu muimpe wa dikema ku mêsu kua Nzambi bualu tudi bitabuje mulambu wa Yezu udi utubuikidijila mpekatu.—Amosa 5:15; Bienzedi 3:19; Ebelu 9:14.
15. (a) Ku bantu bonso, nnganyi utu mushale mulamate Nzambi mu bupuangane buonso, ne bualu ebu budi buleja tshinyi? (b) Malu akenza Yezu adi atuambuluisha ku tshinyi?
15 Nansha nanku, tudiku mua kuela meji ne: ditumikila bumfumu bua Yehowa mu bupuangane buonso mbualu budi bantu kabayi mua kukokesha mua kuenza anyi? Diandamuna dia lukonko elu divua bu “bualu busokoka” bidimu bitue ku 4000. (1 Timote 3:16) Nansha muvua Adama mufukibue muntu mupuangane, kakatushila tshilejilu tshimpe tshia lulamatu kudi Nzambi to. Kadi nnganyi uvua mua kushiya tshilejilu tshimpe tshia lulamatu? Ki mmuntu nansha umue wa ku ndelanganyi ya Adama to. Muntu umuepele uvua mua kushiya tshilejilu etshi uvua Yezu Kristo. (Ebelu 4:15) Tshiakenza Yezu tshiakaleja ne: Adama (uvua, bua kuamba bulelela, mu nsombelu muimpe mutambe) uvua mua kushala ne lulamatu mu bupuangane buonso bu yeye musue. Tshilema katshivua mu mudimu wa difuka wa Nzambi to. Nunku Yezu Kristo ke tshilejilu tshitudi ne bua kuidikija mu ditumikila mikenji ya Nzambi ne dishala balamate Yehowa, Mukalenge Mutambe Bunene.—Dutelonome 32:4, 5.
Tudi ku luseke lua nganyi?
16. Bua tshinyi tudi ne bua kuikala badimuke dîba dionso bua kumanya mushindu utudi tuangata bumfumu bua Yehowa?
16 Lelu’eu, tshilumbu tshia bumfumu butambe bunene tshidi tshitangila muntu yonso wa kutudi. Bituikala bambe patoke ne: tudi ku luseke lua Yehowa, Satana neatuluishe. Neatukebele ntatu ya mishindu yonso ne neatungunuke ne kuenza nunku too ne ku nshikidilu wa bulongolodi buende bubi bua malu ebu. Katuena ne bua kulala tulu to. (1 Petelo 5:8) Ngikadilu wetu udi uleja luseke lutudi mu tshilumbu tshinene etshi tshia bumfumu bua Yehowa ne mu tshilumbu tshikuabu tshia kushala balamate kudi Nzambi patudi mu mateta. Nebikale bibi menemene bia njiwu kutudi bituikala mua kuangata ngikadilu wa dipanga lulamatu eu bu mubi anu bualu mmutangalake pa buloba bujima. Bua tuetu kushala ne lulamatu, tudi ne bua kuenza muetu muonso bua kutumikila mikenji miakane ya Yehowa mu kalu ne kalu konso ka mu nsombelu wetu.
17. Tudi ne bua kuepuka dishima ne buivi bualu mbifume kudi nganyi?
17 Tshilejilu, katuena mua kuidikija Satana ‘tatu wa dishima’ to. (Yone 8:44) Tudi ne bua kuikala bantu badi bamba bulelela mu malu onso atudi tuenza. Mu bulongolodi bua Satana emu, bansonga kabatu batamba kuambila baledi babu bulelela to. Kadi bansonga bena Kristo buobu badi bepuka ngikadilu eu, nunku badi baleja ne: Satana uvua mushime pavuaye mujule tshilumbu tshia ne: bantu ba Nzambi kabavua mua kushala ne lulamatu mu mateta. (Yobo 1:9-11; Nsumuinu 6:16-19) Nunku kudi bibidilu bia mu malu a dienda dia mishinga bidi mua kuleja ne: muntu udi ku tshia ‘tatu wa dishima’ pamutu pa kuikalaye ku luseke lua Nzambi wa bulelela. Tubengayi ngikadilu eyi yonso. (Mika 6:11, 12) Kabidi, katuena mua kuamba nansha kakese ne: buivi kabuena ne bualu, nangananga bikala muntu udi wiba ukenga anyi muntu udibu biba muikale mubanji to. (Nsumuinu 6:30, 31; 1 Petelo 4:15) Nansha buivi buikale tshibidilu tshia bantu ba muaba utudi basombele peshi bintu bidibu bibe bikale bikese, tshia kumanya ntshia se: tshidi mikenji ya Nzambi yoyi idi amu ikandika buivi.—Luka 16:10; Lomo 12:2; Efeso 4:28.
18. (a) Ku ndekelu kua Bukokeshi bua Bidimu Tshinunu bua Kristo, nditeta kayi diakuata bantu bonso? (b) Ntshibidilu kayi tshitudi ne bua kuikala natshi kubangila ku mpindieu?
18 Mu Bukokeshi bua Bidimu Tshinunu bua Kristo, Satana ne ba-demon bende nebikale mu dijimba, mbuena kuamba ne: kabakuikala ne bukole bua kusaka bantu ku dienza malu mabi to. Nebikale disulakana dia dikema, ki mmuomu anyi? Kadi kunyima kua bidimu tshinunu abi, nebabalekele bua tshikondo tshîpi. Satana ne bena diende nebatete bantu bapiabapia bashala balamate Nzambi. (Buakabuluibua 20:7-10) Tuetu bapete mushindu wa kuikalaku tshikondo tshialekelabu Satana atshi, ntshinyi tshituenza bua tshilumbu tshia bumfumu butambe bunene ebu? Bu muikala bantu bonso bapuangane tshikondo atshi, muntu kakuenza bualu bubi mu mpukapuka to, ne wabuenza neashipibue bua kashidi. Kuenaku umona ne: bidi ne mushinga bua tuetu kuikala ne tshibidilu tshia kutumikila malu onso adi Yehowa utulomba mu Bible ta mu bulongolodi buende anyi? Patudi tuenza nanku, tudi tumuleja lulamatu lulelela bu mudiye Mukalenge Mutambe Bunene.
Diambulula
• Ntshilumbu tshinene kayi tshitudi tuetu bonso ne bua kutuilangana natshi? Mmunyi muditshi tshitutangila?
• Tshidi tshikoka ntema pa mushindu uvua balume ne bakaji ba pa kale baleje lulamatu luabu kudi Yehowa ntshinyi?
• Bidi ne mushinga bua kutumbisha Yehowa ku ngikadilu wetu dituku dionso bua tshinyi?