BIENA-BUALU BIDIBU BASAKIDILE

Ndîba kayi didi muanetu wa bakaji ne bua kubuikila mutu? Bua tshinyi?

Ndîba kayi didi muanetu wa bakaji mua kubuikila mutu padiye wenza malu a Nzambi? Bua tshinyi udi ne bua kuubuikila? Tukonkononayi tshivua nyuma muimpe musake mupostolo Paulo bua kufunda bua bualu ebu. Paulo udi utuleja tshia kuenza bua kuangata mapangadika mimpe adi atumbisha Nzambi. (1 Kolinto 11:3-16) Udi uleja malu asatu a kutangila: (1) malu adi muanetu wa bakaji mua kuenza mubuikile mutu wende, (2) dîba didiye ne bua kuubuikila, ne (3) tshidi tshimusaka bua kutumikila mukenji eu.

Malu. Paulo udi utela malu abidi aa: kusambila ne kuambila bantu Dîyi dia Nzambi. (Mvese 4, 5) Kusambila nkuyukila ne Yehowa. Lelu, kuambila bantu Dîyi dia Nzambi kudi kukongoloja midimu yonso idi muena Kristo wenza bua kulongesha bantu Bible. Nunku, Paulo udi usua kuamba ne: muanetu wa bakaji udi ne bua kubuikila mutu dîba dionso didiye usambila peshi ulongesha bantu Bible anyi? Tòo. Kudi dîba didi muanetu wa bakaji ne bua kubuikila mutu padiye usambila anyi ulongesha bantu Bible ne didiye kayi mua kuubuikila to.

Dîba. Paulo udi uleja ne: mukaji udi ne bua kubuikila mutu mu dîku ne mu tshisumbu. Udi wamba ne: ‘Mutu wa mukaji yonso udi mulume. Mukaji yonso udi utendelela anyi udi wambila bakuabu dîyi dia Nzambi ne mutu wende kauyi mubuikila, udi upuekesha butumbi bua mutu wende.’ (Mvese 3, 5) Mu dîku, mulume ke udi Yehowa muteke ku mutu kua mukaji. Mukaji yeye kayi muenze bualu budi buleja mudiye unemeka bumfumu bua bayende, kadi wenza midimu idi Yehowa mupeshe bayende bua kuenza, udi ufuisha bayende bundu. Tshilejilu, mukaji udi ne bua kubuikila mutu wende bua kuleja mudiye unemeka bumfumu bua bayende padiye ulongesha muntu Bible bayende muikale muaba au, nansha bayende wenza malu makuabu. Bu mudi mulume muikale mfumu wa dîku, mukaji udi ne bua kubuikila mutu nansha bayende mutambule anyi kayi muanji kutambula.a Muanetu wa bakaji udi kabidi ne bua kubuikila mutu padiye usambila anyi ulongesha muntu Bible muaba udi muanende wa balume ukadi mutambule, nansha muanende eu wenza malu makuabu. Kena uubuikila bua kuleja ne: muana au mfumu wa dîku to, kadi mbualu Nzambi mmupeshe bana betu ba balume bonso bakadi batambule bukokeshi mu tshisumbu.

Paulo udi wakula bua mu tshisumbu wamba ne: ‘Biasua muntu kutandangana bua bualu ebu, katuena ne tshilele tshia nunku, ne ekeleziya ya Nzambi kayena natshi kabidi.’ (Mvese wa 16) Bana betu ba balume bakadi batambule ke badi Nzambi mupeshe bumfumu mu tshisumbu. (1 Timote 2:11-14; Ebelu 13:17) Anu bobu ke badibu bateka bakulu ne basadidi ba mudimu bua kuenza mudimu udi Nzambi mubapeshe wa kulama mikoko yende. (Bienzedi 20:28) Kadi, imue misangu bidi mua kuenzeka ne: bua amue malu, muanetu wa bakaji enze midimu idibu ne bua kuenza anu kudi muanetu wa balume udi mukumbane bua kuyenza. Tshilejilu, udi mua kulombola tshisangilu tshia mudimu wa buambi padiku kakuyi muanetu wa balume ukadi mutambule udi mukumbane. Peshi udi mua kulongesha muntu utuye ulongesha Bible, muanetu wa balume ukadi mutambule muikale muaba au. Bu mudi midimu eyi mikale munkatshi mua midimu ya dilongesha itu yenzeka mu tshisumbu, muanetu wa bakaji udi ne bua kubuikila mutu bua kuleja ne: udi wenza midimu idibu ne bua kuenza anu kudi muanetu wa balume.

Ku lukuabu luseke, kudi malu makuabu a bena Kristo adi muanetu wa bakaji mua kuenza kayi mubuikile mutu to. Tshilejilu, muanetu wa bakaji kena ne bua kubuikila mutu padiye wandamuna mu bisangilu, padiye uyisha ku nzubu ne ku nzubu ne bayende anyi ne muanetu wa balume mukuabu anyi padiye ulongesha bana bende badi kabayi banji kutambula Bible peshi usambila nabu. Nansha nanku, nkonko mikuabu idi mua kujuka. Padi muanetu wa bakaji kayi mumanye tshia kuenza mu bualu kampanda, mbimpe abale Bible ne mikanda yetu mikuabu.b Yeye kayi anu mupete tshia kuenza, ne kondo kende ka muoyo kikale anu kamuambila bua kubuikila mutu, udi mua kuubuikila kakuyi bualu.

Tshidi tshimusaka. Mu mvese wa 10, tudi tusanganamu malu menene abidi adi asaka muanetu wa bakaji bua kubuikila mutu. Udi wamba ne: ‘Budi mukaji nabu mbua kuikala ne tshimanyinu tshia bukokeshi ku mutu kuende, bualu bua banjelu.’ Bualu bua kumpala, mvese eu udi wakula bua “tshimanyinu tshia bukokeshi.” Padi muanetu wa bakaji ubuikila mutu, udi uleja ne: mmuitabuje bukokeshi budi Yehowa mupeshe bana betu ba balume bakadi batambule mu tshisumbu. Nunku, udi uleja mudiye munange Yehowa Nzambi ne mumulamate. Bualu buibidi budi mu mêyi aa: “bualu bua banjelu.” Padi muanetu wa bakaji ubuikila muntu, bualu ebu budi buenzela banjelu tshinyi?

Banjelu badi basanka padibu banemeka bumfumu bua Yehowa mu bulongolodi buende bujima, mu diulu ne pa buloba. Bidi kabidi bibambuluisha bikole padibu bamona bantu bena mibi banemeka bumfumu ebu, bualu bobu pabu badi ne bua kukokela bumfumu bua Yehowa buvua banjelu ndambu bapangile kukokela kale. (Yuda 6) Nunku, banjelu badi bamona padi muanetu wa bakaji ukokela bukokeshi bua muanetu wa balume ukadi mutambule, nansha mudi muanetu wa bakaji eu mumonemone malu a bungi, muikale ne dimanya dia bungi ne muikale ne meji kupita muanetu wa balume. Imue misangu, muanetu wa bakaji eu mmuena Kristo muela manyi wakokesha pamue ne Kristo. Muanetu wa bakaji wa nunku neapete muanzu munene mupite too ne wa banjelu bualu neakokeshe ne Kristo mu diulu. Etshi ntshilejilu tshimpe tshidi banjelu batangila mpindieu! Bushuwa, bana betu ba bakaji badi ne diakalenga dinene dia kuleja kumpala kua banjelu ba lulamatu binunu ne binunu mudibu batumikila Nzambi padibu bakokela bukokeshi buende.

[Mêyi adi kuinshi]