BIENA-BUALU BIDIBU BASAKIDILE

Mua kujikija bilumbu bia malu a makuta

Mu 1 Kolinto 6:1-8, mupostolo Paulo wakakula bua bilumbu bidi mua kufikisha bena Kristo ku difundangana. Wakamba muvuaye unyingalala bualu bena Kristo bakuabu ba mu Kolinto bavua ne bilumbu bavua ‘ne dikamakama dia kubilumbulula kumpala kua bantu babi.’ (Mvese wa 1) Paulo wakaleja tshivua ne bua kusaka bena Kristo bua kujikija bilumbu biabu mu tshisumbu pamutu pa kufundangana ku tubadi tua mbulamatadi. Tukonkononayi amue malu avua mamusake bua kufila mubelu eu, ne pashishe netuakule bua imue nsombelu idi mubelu eu kauyi ukumbanyina to.

Tuetu bikale ne tshilumbu tshia malu a makuta ne muena Kristo netu, tudi ne bua kuanji kukeba mua kutshijikija mushindu udi Yehowa musue, ki mmutudi tuetu basue to. (Nsumuinu 14:12) Yezu wakamba ne: mbimpe kujikija tshilumbu ne lukasa paditshi katshiyi tshianji kukola. (Matayo 5:23-26) Bidi bienza muadi bua kumona bena Kristo bakuabu bakokangana bikole, bafika too ne kudifundangana kua mbulamatadi. Paulo wakamba ne: ‘Bualu ebu buakumana kulua dipanga dinene munkatshi muenu ne: Nudi nuikalangana ne bilumbu.’ Bua tshinyi? Bualu bunene budi ne: kujikija bilumbu mu mushindu eu kudi kunyanga lumu lua tshisumbu ne lua Nzambi utudi tutendelela. Nunku, tutumikile mubelu wa Paulo udi mu lukonko elu: Kanuena ‘nuitabuja bua banunyenge bintu’ bua tshinyi?​—Mvese wa 7.

Paulo wakaleja kabidi ne: Nzambi uvua mulongolole malu bimpe mu tshisumbu bua kujikija bilumbu bia bungi. Bakulu mbena Kristo badi bapetele meji ku dimanya diabu dia malu a mu Bible. Paulo udi wamba ne: mbakumbane ‘bua kulumbuluila bana babu ba mu Kristo,’ padiku bilumbu bia ‘malu a muoyo utudi nawu’ eu. (Mvese 3-5) Yezu wakaleja ne: padi bena Kristo ne bilumbu binene bu mudi dishiminyinangana dia malu ne dibila, badi ne bua kuenza malu asatu adi alonda aa bua kubijikija. Bua kumpala, badi ne bua kudienzeja bua kujikija tshilumbu tshiabu bobu nkayabu. Buibidi, padibu kabayi batshijikije nkayabu, badi ne bua kukeba muntu umue anyi babidi badi bamanye tshilumbu atshi. Buisatu, padibu kabayi anu batshijikije, badi ne bua kuya natshi mu tshisumbu kudi bakulu.​—Matayo 18:15-17.

Bakulu bena Kristo ki mbanzuji anyi bafidi ba mibelu ya malu a makuta ne ki mmudimu wabu to. Kabena bela mikenji ya mua kujikija bilumbu bia makuta bidi pankatshi pa bena Kristo to. Kadi tshidibu bakeba, nkuambuluisha badi nabi bua kutumikila tshidi Bible wamba ne kukeba tshia kuenza bua basombe mu ditalala. Tshilumbu tshiotshi tshikole, badi mua kukonka mutangidi wa tshijengu anyi Betele wa Bantemu ba Yehowa bua abambile tshia kuenza. Kadi kudi bilumbu bikuabu bidi mubelu wa Paulo eu kauyi ukumbanyina to. Bimue bia ku bilumbu ebi mbilumbu kayi?

Mu imue nsombelu, bantu badi mua kuya ku tubadi bua kulonda tshidi mikenji yamba anyi anu bua kulama ditalala. Tshilejilu, badi ne bua kuya kua mbulamatadi bua kupeta mikanda ya dishipa dia dibaka, bukenji bua kulama bana, bua kumanya bungi bua makuta adi mulume ne bua kuikala ufila bua kudisha bana padi dibaka difua, bua kulomba makuta kudi kumpanyi (bu mudi sonas) padi njiwu yenzeka, bua babafute makuta kudi kumpanyi kampanda udi ne makuta abu padiye ukuluka, ne bua kutuisha biala pa mukanda udi muntu ufunda bua tshienzabu ne bintu biende padiye ufua. Muena Kristo udi kabidi mua kuya ku tubadi bua kudikuba padibu bamufunde bua bilumbu kampanda.a

Padi muntu uya ne bilumbu bia nunku kua mbulamatadi kayi ne dijinga dia kuenzelangana bibi, kena wenza bualu budi bubengangana ne tshivua Paulo mufunde ku bukole bua nyuma muimpe to.b Nansha nanku, tshipatshila tshia muena Kristo tshidi ne bua kuikala tshia kutumbishisha dîna dia Yehowa, ne kukeba ditalala ne buobumue mu tshisumbu. Bena Kristo mbamanyike bikole bua dinanga diabu, ne ‘dinanga kadiena didikebela bintu.’​—1 Kolinto 13:4, 5; Yone 13:34, 35.

[Mêyi adi kuinshi]