Wakamuambila “lumu luimpe lua bualu bua Yezu”

1, 2. Mmunyi muvua didienzeja dia kupangisha bayidi bua kuyisha lumu luimpe dipatule bipeta bimpe mu bidimu lukama bia kumpala?

BULUISHI bukole buakajuka, Shaula wakatuadija “kukengesha” tshisumbu bibi menemene; tshiambilu tshidi tshiumvuija mu muakulu wa ntuadijilu ne: kuenzela bantu bibi ne tshikisu tshionso. (Bien. 8:3) Bayidi bakanyema, bua bamue bidi mua kumueneka bu ne: Shaula neakumbaje tshipatshila tshiende tshia kujimija buena Kristo. Kadi bualu buvua kabuyi butekemena buakenzeka pavua bena Kristo batangalake. Mbualu kayi abu?

² Bayidi bavua batangalake bakatuadija kuamba “lumu luimpe lua dîyi” mu maloba avuabu banyemene. (Bien. 8:4) Anji elabi meji, buluishi kabuakabapangisha bua kuamba lumu luimpe to, kadi buakabambuluisha bua kulutangalajabu. Pavua baluishi batangalaje bayidi abu, bakambuluisha bua mudimu wa diyisha Bukalenge ufike ku miaba ya kule menemene kabayi bamanye. Anu mutuabimona, bualu bua muomumue mbuenzeke bikondo bietu ebi.

“Bayidi bavuabu batangalaje” (Bienzedi 8:4-8)

3. a) Filipo uvua nganyi? b) Bua tshinyi kabavua bayishe bikole mu Samalea? Yezu wakamba tshinyi bua tshivua ne bua kuenzeka mu teritware au?

³ Filipo ngumue wa ku “bayidi bavuabu batangalaje” abu.a (Bien. 8:4; tangila kazubu ka “‘Muambi’ Filipo.”) Wakaya mu Samalea (tshimenga tshivuabu kabayi bayishe bikole to,) bualu Yezu wakambila bapostolo bende musangu mukuabu ne: “Kanubuedi mu tshimenga tshia bena Samalea nansha tshimue, kadi tungunukayi ne kuya kudi mikoko mijimine ya nzubu wa Isalele.” (Mat. 10:5, 6) Kadi Yezu uvua mumanye ne: mu kupita kua matuku, bumanyishi buonso menemene buvua ne bua kufidibua mu Samalea, bualu kumpala kua kubandaye mu diulu wakamba ne: “Nenuikale bantemu banyi mu Yelushalema, mu Yudaya mujima ne mu Samalea, too ne ku miaba ya kule menemene ya pa buloba.”​—Bien. 1:8.

4. Bena Samalea bakenza tshinyi pavuabu bumvue diyisha dia Filipo? Ntshinyi tshivua mua kuikala tshibambuluishe bua kuitaba?

⁴ Filipo wakasangana ne: Samalea uvua ‘mutoke bua kunowa.’ (Yone 4:35) Mukenji wende uvua bu kapepe kimpe katalale bua bantu bavuamu, ne mbipepele bua kumona bua tshinyi bidi nanku. Bena Yuda kabavua bapetangana ne bena Samalea to, ba bungi bavua mene babapepeja. Kadi bena Samalea bakamona ne: mukenji wa lumu luimpe bavua bawuyisha bantu bonso, nunku bivua bishilangane bikole ne Bafalese bavua basungulujangana. Pavua Filipo muyishe bena Samalea ne tshisumi kayi ubasunguluja, wakaleja ne: kavua ne kansungansunga ka buena kavua naku bavua babapetula to. Kabiena bitukemesha bua kumona ne: misumba ya bena Samalea yakateleja Filipo “mu buobumue” to.​—Bien. 8:6.

5-7. Fila bilejilu bidi bileja ne: ditangalaja bena Kristo ndiambuluishe bua kumuangalaja lumu luimpe.

⁵ Anu bu mu bidimu lukama bia kumpala, lelu buluishi ki mbupangishe bantu ba Nzambi bua kuyisha to. Misangu ne misangu, patubu benzeja bena Kristo bua kumbuka muaba udibu ne kuya muaba mukuabu (nansha dibela mu maloko anyi diya mu ditunga dikuabu) nkubambuluishe anu bua kuyisha bantu ba miaba mipiamipia ayi mukenji wa Bukalenge. Tshilejilu, mu mvita mibidi ya buloba bujima, Bantemu ba Yehowa bakafila bumanyishi bua dikema mu tumponyi tua bena Nazi tua dienzejangana midimu mikole. Muena Yuda mukuabu uvua mupetangane ne Bantemu udi wamba ne: “Bukole bua dinanukila bua bena buloko Bantemu ba Yehowa buakantuisha ne: ditabuja diabu divua diashila pa Mifundu ne ngakalua panyi Ntemu.”

⁶ Imue misangu, nansha baluishi batu bapeta bumanyishi ne babuitaba. Tshilejilu, Ntemu mukuabu diende Franz Desch wakitaba bua kulonga Bible ne munene mukuabu wa basalayi pavuabu bamutume mu buloko bua Gusen mu Australie. Anji difuanyikijila disanka divuabu nadi pavuabu balue kutuilangana mu mpungilu wa Bantemu ba Yehowa bidimu bia bungi pashishe, bonso babidi bikale bamanyishi ba lumu luimpe!

⁷ Bualu bua muomumue buakenzeka pavua buluishi buenze bua bena Kristo banyemene mu matunga makuabu. Tshilejilu, mu bidimu bia 1970, pavua Bantemu ba mu Malawi benzejibue bua kunyemena mu ditunga dia Mozambique, bakafilamu bumanyishi bukole. Nansha pakalua buluishi kujuka mu Mozambique, mudimu wa diyisha wakatungunuka. Francisco Coana udi wamba ne: “Bakakuata bamue ba kutudi misangu ya bungi bualu bavua bayisha. Kadi pakitaba ba bungi mukenji wa Bukalenge, tuakatuishibua ne: Nzambi uvua utuambuluisha, anu muvuaye muambuluishe bena Kristo ba mu bidimu lukama bia kumpala.”

8. Mmunyi mudi mashintuluka a malu a makuta ne a tshididi mambuluishe bua kumuangalaja lumu luimpe?

⁸ Bushuwa, ki nganu buluishi nkayabu buvua butangalaje buena Kristo miaba mikuabu to. Bidimu bia bungi bishale ebi, mashintuluka a malu a makuta ne a tshididi mmambuluishe pawu bua kupeta mpunga ya kumuangalaja mukenji wa Bukalenge kudi bantu ba miakulu ne bisamba bia bungi. Bamue bavua miaba ivua mvita ne ntatu ya makuta bakanyemena miaba ya bungi ivua ditalala, kutuadijabu kulonga Bible ne bantu ba miaba ayi. Dilua dia bena tshimuangi ba bungi ndifikishe ku dikangula teritware ya miakulu mikuabu. Udiku udienzeja bua kuyisha bantu ba “mu bisamba bionso ne mu bisa bionso ne mu bukua bantu buonso ne mu miakulu yonso” mu teritware wenu anyi?​—Buak. 7:9.

“Mpeshayi panyi bukokeshi ebu” (Bienzedi 8:9-25)

9. Simona uvua nganyi? Ntshinyi tshivua tshimukoke pamuapa kudi Filipo?

⁹ Filipo wakenza bimanyinu bia bungi mu Samalea. Tshilejilu, wakondopa bantu bavua balema, kuipataye too ne nyuma mibi. (Bien. 8:6-8) Muntu mukuabu wakakema bikole bua bishima bivua Filipo muenze. Muntu au n’Simona muena majimbu uvua bantu banemeka bikole, bamba ne: “Muntu eu udi Bukole bua Nzambi.” Anu mudi bishima bivua Filipo muenze bijadika, Simona wakadimuenena bukole bua Nzambi bushuwa, kuluaye muena kuitabuja. (Bien. 8:9-13) Kadi tshivua tshisake Simona bua kulua muena kuitabuja tshiakatetshibua. Mushindu kayi?

10. a) Ntshinyi tshivua Petelo ne Yone benze mu Samalea? b) Ntshinyi tshivua Simona muenze pakamonaye ne: bayidi bapiabapia bavua bapete nyuma muimpe pavua Petelo ne Yone babatentekele bianza?

¹⁰ Pavua bapostolo bumvue ne: bena Samalea ba bungi bavua balue bena kuitabuja, bakatuma Petelo ne Yone muntu amu. (Tangila kazubu ka “Petelo wakenza mudimu ne ‘nsapi ya Bukalenge.’”) Pakafika bapostolo abu, bakatentekela bayidi bapiabapia bianza, bobu kupeta nyuma muimpe.b Pakamona Simona bualu abu, wakakema bikole. Kuambilaye bapostolo ne: “Mpeshayi panyi bukokeshi ebu bua muntu yonso undi ntentekela bianza apete nyuma muimpe.” Wakabapesha too ne makuta, wela meji ne: neasumbe dipa dia tshijila adi.​—Bien. 8:14-19.

11. Mbualu kayi buvua Petelo muambile Simona? Ntshinyi tshiakenzaye?

¹¹ Petelo wakandamuna Simona ne dîsu dikole. Wakamuambila ne: “Fuaku ne makuta ebe, bualu uvua muele meji ne: udi mua kupeta dipa dia Nzambi didiye ufila tshianana ku makuta. Kuena ne tshitupa anyi tshiudi mua kuenza netu mu bualu ebu to, bualu muoyo webe kawena mululame ku mêsu kua Nzambi nansha.” Pashishe wakamusengelela ne: nyingalala, usambile bua ufuidibue luse. Petelo wakamuambila kabidi ne: “Sengelela Yehowa bua, bikalaku mushindu, akufuile luse bua lungenyi lubi ludi mu muoyo webe [‘mayele ebe,’ Bible des peuples].” Bidi bimueneka ne: Simona kavua muntu mubi to; uvua musue kuenza tshivua tshiakane, kadi wakapambuka bua tshipolo tshîpi. Ke yeye kuambila bapostolo ne: “Ndombelayi kudi Yehowa bua bualu nansha bumue bua ku malu anudi bambe au kabumfikidi to.”​—Bien. 8:20-24.

12. Muaku “simonie” udi uleja tshinyi? Mmunyi mudiwu munyange bitendelelu bia bukua buena Kristo?

¹² Mushindu uvua Petelo mutandishe Simona au ndidimuija kudi bena Kristo lelu. Bushuwa, muaku wa mu Mfualansa wa “simonie” mmufumine ku tshivua tshienzeke atshi. Muaku au udi uleja disumba mianzu anyi diyipana, nangananga mu malu a ntendelelu. Mu malu a kale a bitendelelu bia bukua buena Kristo mudi bilejilu bia bungi bia tshilele atshi. Nansha mukanda mukuabu uvua mupatuke bua musangu wa 9 wakaleja ne: “Balongi bavua balonga mianda ya bisangilu bitubu basungula bapapa bakamona ne: mu masungula onso avua enzeka, muntu uvuabu basungula uvua usumba muanzu wa bupapa. Misangu ya bungi, mu bisangilu abi, bavua basumba muanza wa bupapa patoke kabayi bumvua bundu to.”​—The Encyclopædia Britannica (1878).

13. Mmushindu kayi udi bena Kristo ne bua kudilama ku mpekatu wa disumba mianzu anyi diyipana?

¹³ Bena Kristo badi ne bua kudilama ku mpekatu wa disumba mianzu anyi diyipana. Tshilejilu, kabena ne bua kukeba bua babanyishe kudi bana betu badi bamueneka ne mushindu wa kupeshangana midimu mikuabu ya pa buayi mu tshisumbu pa kubapesha bintu anyi kubatumbisha bikole to. Ku lukuabu luseke, bana betu badi ne mushindu wa kupeshangana midimu badi ne bua kudilama bua kubenga kusunguluja babanji. Mu nsombelu yonso ibidi eyi, mudi tshilele tshibi atshi. Bushuwa batendeledi ba Nzambi bonso badi ne bua kudituala bu ‘bakese,’ bindila bua nyuma wa Yehowa abateke bua kuenza midimu ya pa buayi. (Luka 9:48) Mu bulongolodi bua Nzambi kamuena muaba bua bantu badi badikebela “butumbi” to.​—Nsu. 25:27.

“Udi mumanye bushuwa bualu buudi ubala abu anyi?” (Bienzedi 8:26-40)

14, 15. a) “Muntu mutungu muena Etshiopi” uvua nganyi? Mmunyi muvua Filipo mutuilangane nende? b) Ntshinyi tshivuaye muenze ne mukenji uvua Filipo mumuambile? Bua tshinyi katuena mua kuamba ne: uvua mubatijibue kayi muele meji? (Tangila dimanyisha dia kuinshi kua dibeji.)

¹⁴ Muanjelu wa Yehowa wakambila Filipo bua kuya ku njila uvua ufuma ku Yelushalema upueka ku Gaza. Bikala Filipo udiebeja bua tshinyi uvua ne bua kuya ku njila au, wakumvua diakamue pakatuilanganaye ne muntu mutungu wa mu Etshiopi uvua “wenda ubala mukanda wa muprofete Yeshaya ne dîyi dikole.” (Tangila kazubu ka “‘Muntu mutungu’ mu ngumvuilu kayi?”) Nyuma muimpe wakasaka Filipo bua kusemena ku ditempu dia muntu au. Yeye kuebeja muena Etshiopi au pavuaye wenda unyema ku luseke lua ditempu ne: “Udi mumanye bushuwa bualu buudi ubala abu anyi?” Wakamuandamuna ne: “Mmunyi mundi mua kubumanya bikala muntu kayi mundudike?”​—Bien. 8:26-31.

¹⁵ Muena Etshiopi kulombaye Filipo bua abuele mu ditempu. Anji difuanyikijilabi muvua muyuki au mutungunuke! Mêyi a buprofete a Yeshaya avua akula bua “mukoko,” anyi “muena mudimu,” akashala bualu busokoka munkatshi mua bidimu bia bungi. (Yesh. 53:1-12) Kadi pavua Filipo ne muena Etshiopi benda baya mu njila, wakamumvuija ne: dîyi dia buprofete adi divua dikumbanyine Yezu Kristo. Anu bu bantu bavua babatijibue mu Pentekoste wa mu 33 P.Y., muena Etshiopi (ukavua muitabuje buena Yuda) au, wakamanya diakamue tshivuaye ne bua kuenza. Wakambila Filipo ne: “Tangila! Ke mâyi aa; ntshinyi tshidi tshimpangisha bua meme kubatijibua?” Filipo kumubatizaye diakamue!c (Tangila kazubu ka “Batismo mu ‘dijiba dia mâyi.’”) Pashishe Filipo wakaya bua kuenza mudimu mukuabu uvuabu bamupeshe ku Ashedodo, kuvuaye mutungunuke ne kuamba lumu luimpe.​—Bien. 8:32-40.

16, 17. Mmunyi mudi banjelu bambuluisha mu mudimu wa diyisha lelu?

¹⁶ Lelu bena Kristo badi ne diakalenga dia kuenza mudimu wa buena uvua Filipo muenze. Misangu ya bungi, batu bayisha bantu batubu bapetangana nabu mukenji wa Bukalenge padi mpunga umueneka, bu mudi mu luendu. Mu nsombelu ya bungi, bidi bimueneka ne: dipetangana ne bantu badi bakaje muoyo wabu bimpe kaditu dienzeka ku mpukampuka to. Kabiena bitukemesha to, bualu Bible udi uleja patoke ne: banjelu badi balombola mudimu wa diyisha bua mukenji ufike “kudi tshisamba tshionso, tshisa tshionso, muakulu wonso ne bantu bonso.” (Buak. 14:6) Dilombola mudimu wa diyisha kudi banjelu ke divua Yezu mumanyishe menemene. Mu tshilejilu tshiende tshia blé ne lupela, wakamba ne: mu tshikondo tshia dinowa, nshikidilu wa ndongoluelu wa malu, “banowi mbanjelu.” Wakamba kabidi ne: bifukibua bia mu nyuma abi bidi ne bua kumbusha “mu Bukalenge buende bintu bionso bidi bilenduishangana ne bantu bonso badi bashipa mikenji.” (Mat. 13:37-41) Mu tshikondo tshia muomumue atshi, banjelu badi ne bua kusangisha bantu balua bapianyi ba Bukalenge bua mu diulu, pashishe “musumba munene” wa “mikoko mikuabu” idi Yehowa musue kukoka mu bulongolodi buende.​—Buak. 7:9; Yone 6:44, 65; 10:16.

¹⁷ Tshijadiki tshia mudi bualu abu buenzeka tshidi ne: bamue ba ku bantu batutu tupetangana nabu mu mudimu wa diyisha batu bamba ne: bavua basambila bakeba diambuluisha dia mu nyuma. Tuangate tshilejilu tshia bualu buvua bufikile bamanyishi ba Bukalenge babidi bavua bayisha ne muana mutekete. Pakavua midi pa kukumbana, Bantemu babidi abu bakavua pa kuimanyika kuyisha, kadi muana au wakajinga anu bua kukokola ku tshiibi tshivua tshilonda. Ke tshivuaye muenze, wakaya, kukokolaye ku tshiibi. Pakakangula mamu utshivua nsonga tshiibi, Bantemu babidi abu bakayukila nende. Bakakema bikole pavua mamu au mubumvuije ne: uvua ufuma ku disambila bua muntu alue kukokola kuende bua kumuambuluisha bua kumvua malu a mu Bible. Bakumvuangana bua kulonga Bible.

18. Bua tshinyi katuena ne bua kupepeja mudimu wetu wa diyisha?

¹⁸ Bu muudi mu tshisumbu tshia bena Kristo, udi ne diakalenga dia kuenza mudimu wa diyisha udi wenzeka matuku etu aa pamue ne banjelu. Mudimu eu udi wenzeka lelu mu mushindu utuwu kawuyi muanji kuenzeka to. Kupepeji diakalenga adi to. Wewe musuminyine, udienzeja anu kudienzeja neumvue disanka dia bungi paudi utungunuka ne kuamba “lumu luimpe lua bualu bua Yezu.”​—Bien. 8:35.