Filipo​—Muambi wa lumu luimpe wa lukunukunu

MU Mifundu mudi miyuki ya bungi idi yakula bua bantu bakaji ne balume bavua ne ditabuja ditudi ne bua kuidikija. Tangila tshilejilu tshia Filipo, misionere muena Kristo wa mu siekele wa kumpala. Nansha muvuaye kayi mupostolo, bavua batamba kuenza nende mudimu bua kutangalaja mukenji wa Bukalenge. Bushuwa, Filipo wakalua kumanyika bu “muambi wa lumu luimpe.” (Bienzedi 21:8) Bua tshinyi bavua babikila Filipo nunku’eu? Ne ntshinyi tshitudi mua kulongela kudiye?

Bible udi utela Filipo katupa kîpi kunyima kua Pentekoste wa mu 33 B.B. Tshikondo atshi, bena Yuda bavua bakula tshiena-Greke bakatuadija kunungana bua bena Yuda bavua bakula tshiena-Ebelu, babamba muvuabu balengulula bakamba babu pavuabu babanya biakudia bia ku dituku dionso. Bua kujikija tshilumbu etshi, bapostolo bakateka “balume muanda mutekete badi ne lumu luimpe.” Filipo uvua munkatshi mua bantu abu bakasungulabu.​—Bienzedi 6:1-6.

Balume muanda-mutekete aba bavua “ne lumu luimpe.” Bushuwa, tshikondo tshivuabu babateke bakavua bamanyike bu bantu ba ngikadilu milenga ya mu nyuma bikale ne ngelelu wa meji muimpe. Ke mudibi bua aba badi basadila lelu bu batangidi bena Kristo. Bantu aba kabatu babateka bia lubilu-lubilu to. (1 Timote 5:22) Badi ne bua kuikala ne ‘lumu luimpe kudi badi kabayi munkatshi mua bena kuitabuja,’ ne bena Kristo nabu badi ne bua kuikala babamanye bu bantu badi ne nkatshinkatshi ne bikale ne lungenyi luimpe.​—1 Timote 3:2, 3, 7; Filipoi 4:5.

Bushuwa, Filipo uvua ukumbaja bimpe mudimu wende mu Yelushalema. Kadi, kunyima kua katupa kîpi, dikengeshangana dikole diakatuadija ne balondi ba Kristo bakatangalaka. Anu bu bayidi bakuabu, Filipo pende wakumbuka mu tshimenga etshi, kadi mudimu wende kauvua muanji kujika to. Panyima pa mutantshi mukese, ukavua munkatshi mua diyisha mu teritware mupiamupia: mu Samalea.​—Bienzedi 8:1-5.

Udi unzulula teritware mipiamipia

Yezu uvua mudianjile kumanyisha ne: bayidi bende bavua ne bua kuyisha mu ‘Yelushalema ne mu Yudeya yonso ne Samalea ne kumfudilu kua buloba.’ (Bienzedi 1:8) Pa kuyisha mu Samalea, Filipo uvua wenza tshiende tshitupa tshia mudimu mu dikumbana dia mêyi aa. Pa tshibidilu, bena Yuda kabavua batamba kunemeka bena Samalea nansha. Kadi Filipo kavua welela bantu aba meji mabi to, ne dibenga kuikala ne kansungasunga diende diakatuala masanka. Bena Samalea ba bungi bakatambula, munkatshi muabu muvua muntu uvua wenza majimbu kumpala, diende Simona.​—Bienzedi 8:6-13.

Panyima pa matuku, muanjelu wa Yehowa wakambila Filipo bua kulonda njila wa mu tshipela uvua umbuka mu Yelushalema mutangile mu Gaza. Mu njila amu, Filipo wakamona ditempu diambule munene wa bena Atiopa wenda ubala ne dîyi dikole mulayi wa muprofete Yeshaya. Filipo wakasemena pabuipi ne ditempu edi ne kutuadijaye kuyukila nende. Bu muvua muena Atiopa eu muikale ulonda Buena-Yuda uvua ne dimanya kampanda dia Nzambi ne dia Mifundu. Kadi ne bupuekele buonso wakitaba ne: uvua dijinga ne diambuluisha bua kumvua bivuaye ubala. Nanku, wakalomba Filipo bua kubanda mu ditempu ne kusomba ku luseke luende. Kunyima kua yeye mumane kumuyisha, bakafika muaba uvua mâyi. Muena Atiopa eu wakamuebeja ne: “Tshidi tshimpumbisha bua kubatijibua ntshinyi?” Diakamue Filipo wakamutambuisha, ne muena Atiopa wakaya wenda usanka. Imue misangu muyidi eu mupiamupia wakamuangalaja lumu luimpe pakapinganaye mu ditunga diabu.​—Bienzedi 8:26-39.

Ntshinyi tshitudi mua kulongela ku mudimu wa Filipo pakayishaye bena Samalea ne munene wa bena Atiopa? Katuena ne bua kuamba ne: bantu ba ditunga kampanda, tshisa anyi muanzu kansanga kabakuanyisha lumu luimpe. Pa mutu pa nanku, tudi ne bua kumanyisha mukenji wa Bukalenge kudi “bantu ba mishindu yonso.” (1 Kolinto 9:19-23, NW) Bituitaba bua kuyisha bantu bonso, Yehowa udi mua kukuata netu mudimu mu ‘divuija ba bisamba bionso bayidi’ kumpala kua nshikidilu wa ndongoluelu eu mubi kuluaye.​—Matayo 28:19, 20.

Midimu mikuabu ya Filipo

Kunyima kua yeye mumane kuyisha munene wa bena Atiopa, Filipo wakayisha mu Azoto, “kutungunukaye wenda umanyisha mukenji mulenga mu bimenga bionso bivuaye upitshila, kufikaye too ne ku Kezareya.” (Bienzedi 8:40, MMM) Mu siekele wa kumpala, bampangano ba bungi bavua mu bimenga bibidi ebi. Mu diya diende mutangile ku Nord kua Kaisalia, bumue Filipo wakayisha mu bimenga binene bia bena Yuda, bu mudi mu Luda ne mu Yopa. Pamu’apa ke bua tshinyi bakalua kusangana bayidi mu bimenga ebi.​—Bienzedi 9:32-43.

Badi balua kuakula bua Filipo bua musangu wa ndekelu kunyima kua bidimu 20. Ku ndekelu kua luendu luende luisatu lua bu-misionere, Paulo wakangata mazuwa a mâyi mutangile ku Tolemai. Luka, eu uvua wenza ngendu ne Paulo, udi wamba ne: ‘Pakatshiabu, tuakumbuka tuakalua ku Kaisalia. Tuakabuela mu nzubu wa Filipo, muambi wa lumu luimpe.’ Tshikondo atshi, Filipo uvua ne ‘bana ba bakaji banayi bakatshidi tumama, bakadi bamba malu akadi kaayi manji kulua.’​—Bienzedi 21:8, 9.

Mbimueneke se: Filipo uvua musombele mu Kaisalia. Kadi kavua mujimije lungenyi luende lua bu-misionere to, bualu Luka udi umubikila ne: “muambi wa lumu luimpe.” Tshiambilu etshi tshitu misangu mivule tshileja muntu udi umbuka kuende bua kuya kuyisha lumu luimpe miaba idilu kaluyi luanji kufika. Muanda wa se: Filipo uvua ne bana ba bakaji banayi bavua baprofete udi uleja ne: bakalonda nsombelu wa lukunukunu wa tatuabu.

Baledi bena Kristo ba matuku etu aa badi ne bua kuvuluka ne: bana babu balela ke bayidi babu ba mushinga mukole. Nansha bikala baledi aba bavua ne bua kulekela imue midimu ya mu bulongolodi bua Yehowa bua majitu a mu dîku, anu bu Filipo, badi mua kushala basadila Nzambi ne muoyo mujima ne kuikala baledi ba tshitembu.​—Efeso 6:4.

Bena mu dîku dia Filipo bakapeta mushindu wa kuleja diakidilangana pavua Paulo ne balunda bende baye kubamona. Ela meji muvuabu bakankamijangane! Pamu’apa dîba adi ke divua Luka mupete mushindu wa kusangisha malu avua atangila midimu ya Filipo, akaluaye kufunda mu Bienzedi nshapita 6 ne wa 8.

Yehowa Nzambi wakakuata mudimu bikole ne Filipo bua kutungunuja malu adi atangila Bukalenge. Lukunukunu lua Filipo luakamuambuluisha bua kutangalaja lumu luimpe mu teritware mipiamipia ne bua kukankamija nsombelu muimpe wa mu nyuma mu dîku diende. Udiku musue bua kupeta masanka ne mabenesha a buena aa anyi? Nenku udi ne bua kuidikija ngikadilu ivua nayi Filipo muambi wa lumu luimpe.