TSHITUPA TSHIA 1

Nzambi udiku uditatshisha bua bualu buetu anyi?

LELU buloba mbuwule tente ne ntatu. Mvita, bipupu, masama, bupele, dikosa dia mishiku, ne malu makuabu mabi bidi bikuata bantu miliyo ne miliyo. Udi pebe mua kuikala utuilangana ne ntatu ku dituku ne ku dituku. Nnganyi udi mua kutuambuluisha? Kudiku muntu udi uditatshisha bua bualu buetu anyi?

Tuikale bashindike ne: Nzambi udi bushuwa uditatshisha bua bualu buetu. Udi wamba mu Dîyi diende dinsantu ne: ‘Mukaji udi mua kupua muanende utshidi wamua mabele muoyo, bua yeye kafuidi muana wa balume wakulelaye luse anyi? Bulelela, bantu aba mene badi mua kupua muoyo, kadi meme tshiena nkupua wewe muoyo.’a

Kumanya bualu ebu kakuenaku kutukolesha ku muoyo anyi? Nzambi mmutunange bikole menemene kupita mudi mamu munange muanende (dinanga dikole menemene ditu nadi bantu). Nzambi kakutulekela nansha kakese! Bushuwa, ukadi mutuambuluishe mu mushindu wa dikema. Mmushindu kayi? Mpadiye utuleja tshia kuenza bua kuikala ne disanka: tudi ne bua kuikala ne ditabuja dilelela.

Wewe ne ditabuja dilelela, newikale ne disanka. Ditabuja dia nunku nedikuambuluishe bua kuepuka ntatu ya bungi ne bua kupita bimpe ne ntatu iwudi kuyi mua kuepuka. Nedikusemeje kabidi pabuipi ne Nzambi, nedikupeteshe ditalala dia mu lungenyi ne dia mu muoyo. Ditabuja dilelela didi difikisha kabidi ku diakalenga mu matuku atshilualua: muoyo wa tshiendelele mu Mparadizu!

Kadi ditabuja dilelela ntshinyi? Mmunyi muudi mua kudipeta?

[Mêyi adi kuinshi]

[Tshimfuanyi mu dibeji 3]

Nzambi mmutunange bikole menemene kupita mudi mamu munange muanende