TSHITUPA TSHIA 12
Leja muudi ne ditabuja dilelela!
NZAMBI udi udimuija bantendeledi bende bua bikale bamanye ne: ditabuja diabu neditetshibue. Dîyi diende didi diamba ne: “Nuikale badimuke. Muena lukuna wenu Diabolo udi unyunguluka bu ntambue udi ukungula, ukeba bua kudia muntu.” (1 Petelo 5:8) Mmunyi mudi Satana ukeba bua kunyanga ditabuja diebe?
Satana udi mua kubuelela kudi bantu bakuabu, nansha baudi munange, bua kukuenzeja bua kubenga kubala Mifundu minsantu. Bua bualu ebu Yezu wakamba ne: “Baluishi ba muntu nebikale ba mu nzubu muende.” (Matayi 10:36) Balela bebe ne balunda bebe badi bakunange kabena mua kuikala bamanye bulelela budi mu Dîyi dia Nzambi to. Anyi badi mua kuikala batshina mushindu udi bakuabu bela meji bua bualu ebu. Kadi Mifundu minsantu idi yamba ne: ‘Patshina muntu bakuabu, bualu ebu budi buteyi kudiye, kadi udi weyemena Yehowa neapanduke.’ (Nsumuinu 29:25) Wewe mulekele kulonga Mifundu minsantu bua kusankisha bantu, bualu abu nebusankishe Nzambi anyi? Nansha kakese! Kadi, patudi tuleja ditabuja dielela, Nzambi udi utuambuluisha. “Tuetu katuena munkatshi mua badi balukila tshianyima, dialukila didi difikisha ku dibutuka, kadi tudi munkatshi mua badi ne ditabuja didi difikisha ku dilama anyima ne muoyo.”—Ebelu 10:39.
Vuluka tshilejilu tshia Dumas tshituvua balonde kumpala. Ku ntuadijilu, mukajende uvua umuseka bua ditabuja diende. Kadi pashishe wakadisangisha kudiye bua kulonga Dîyi dia Nzambi. Bia muomumue, wewe musuminyine ne kuenza tshidi tshiakane, udi mua kufikisha balunda bebe ne balela bebe bua kuenza bia muomumue. Misangu ya bungi, mulela uvua kayi utumikila Dîyi dia Nzambi ‘wakatuadija kuditumikila kakuyi dîyi, ku diambuluisha dia bikadilu bimpe’ ne “kanemu kakole” bidi nabi muntu udi ne ditabuja dilelela.—1 Petelo 3:1, 2.
Satana udi ukeba kabidi bua kufikisha bantu ku diela meji ne: badi ne malu a bungi a kuenza adi abapangisha bua kulonga Mifundu minsantu. Mmusue bua ntatu ya mu nsombelu, bu mudi malu adi akutatshisha ne dipangila dia makuta, ‘bifimpakaje dîyi’ bua ditabuja diebe ‘kadikuami mamuma.’ (Mâko 4:19) Epuka lungenyi lua mushindu eu ludi lukupangisha mua kumona kule! Mifundu minsantu idi yamba ne: “Bualu ebu budi bumvuija muoyo wa tshiendelele: bafike ku dikumanya wewe, Nzambi umuepele mulelela, ne yeye uuvua mutume, Yezu Kristo.” (Yone 17:3) Bushuwa, kutungunuka ne kulonga malu a bungi adi atangila Nzambi ne Yezu Masiya mbualu bua mushinga budi bufikisha ku muoyo wa tshiendelele mu mparadizu!
Elabi meji bua Mose, uvua mu dîku dia bukalenge mu Ejipitu. Uvua mua kuikala mukebe bubanji, lumu ne bumfumu. Kadi Mose wakasungula “bua kukengeshibua ne bantu ba Nzambi pamutu pa kuikala ne disanka dia tshitupa tshîpi dia bubi.” Bua tshinyi? “Bualu wakatungunuka mushindame bu uvua umona Yeye udi kayi umueneka.” (Ebelu 11:24, 25, 27) Eyowa, Mose uvua ne ditabuja dikole kudi Nzambi. Wakateka malu a Nzambi kumpala kua dikeba ende masanka, ne Nzambi wakamubenesha bikole menemene. Wewe wenza bia muomumue, Nzambi neakubeneshe pebe.
Satana udi mua kuteta bua kukuteya mu mishindu mishilashilangane. Kadi ki mbimpe ukuluke mu buteyi buende. Dîyi dia Nzambi didi ditubela ne: “Nukandamene Diabolo ne yeye neanunyeme.” (Yakobo 4:7) Mmunyi muudi mua kumukandamena?
Utungunuke ne kulonga Mifundu minsantu. Ikala ubala Dîyi dia Nzambi dituku dionso. Longa malu adidi diamba. Tumikila mibelu idimu. Wewe wenza nanku, ‘newambule bia mvita bionso bia kudi Nzambi,’ biakuambuluisha bua wewe kukandamena Satana padiye ukuluisha.—Efeso 6:13.
Ikala udisangisha ne bantu badi ne ditabuja dilelela. Keba bantu bakuabu badi babala, balonga ne batumikila malu adi mu Mifundu minsantu. Bobu abu badi ‘basakangana ku dinanga ne ku bienzedi bimpe, . . . bakankamijangana.’ Nebakuambuluishe bua kukola mu ditabuja.—Ebelu 10:24, 25.
Ikala usambila Yehowa. Lomba diambuluisha kudi Nzambi, ne mueyemene. Kupu muoyo ne: Nzambi mmusue kukuambuluisha. ‘Nupuile Nzambi ntatu yenu yonso, bualu udi uditatshisha bua bualu buenu.’ (1 Petelo 5:6, 7) “Nzambi ngua lulamatu, kakulekela bua nutetshibue ne diteta dinudi kanuyi mua kutantamena, kadi palua diteta, nealongolole kabidi njila wa kupatukamu, bua numone mua kuditantamena.”—1 Kolinto 10:13.
Satana udi uyobola Nzambi wamba ne: kakuena muntu udi mua kutungunuka ne kumutendelela padiye ukenga. Kadi wewe udi ne mushindu wa kuleja ne: Satana mmuena dishima! Nzambi udi wamba ne: “Wikale ne meji, usankishe mutshima wanyi, bua mmanye mua kuitaba kudi muntu udi umpenda.” (Nsumuinu 27:11) Bushuwa, ikala mudisuike bua kuleja ne: udi ne ditabuja dilelela!
[Kazubu mu dibeji 29]
Mmunyi muwandamuna?
• Mmunyi mudi Satana mua kuteta bua kunyanga ditabuja diebe?
• Mmunyi muvua Mose muleje muvuaye ne ditabuja dilelela?
• Mmunyi muudi mua kutantamena padibu bateta ditabuja diebe?
[Tshimfuanyi mu dibeji 28]
Uvuaku mupete buluishi bua mushindu eu anyi?
[Tshimfuanyi mu dibeji 28]
Ulombe diambuluisha kudi Nzambi
[Tshimfuanyi mu dibeji 28, 29]
Udisangishe ne bakuabu badi ne ditabuja dilelela